Nekad su me čudile prognoze za ribare koje su se minjale deboto svake dvi-tri ure, i obično su izgledale ovako nekako - Dobro u svitanje, podnošljivo do podne pa loše do 14 sati. Ponovo podnošljivo do mraka, dobro do 21 pa podnošljivo do malo iza 4 sata. Ostatak noći loše.



I zamislite samo koje ste možjane morali imat za usvojit sve tajne sunca, miseca, kurenta, plime i oseke!? A danas je sve drugačije.

Nima više primalića, lita, jeseni i zime nego se sad sve pritvorilo u šuć-muć pa proli. U svitanje se smrzneš ka lignja patagonika, a već u devet uri brišeš kapje znoja sa templa, do podne vazmeš šugaman i greš se kupat u more, a onda pozapodne padne snig i nakon toga opali bura šćeto neto, zatvori Maslenicu i Svetu Mariju Magdalenu. Na banj nosiš skije i sanjke umisto maske i peraje, na snig mudantine, šal i rukavice, nikad ne znaš koji će škerac sad udrit.

Ma neka, isto je uvik lipo u premaliće. Ruže su procvitale, behara više nema, ali zato su se masline okitile resama, pupovi su nabrekli i jedva čekaju da se u cviće pretvore.



U portu maloga mista živo je, domaći guštaju u svome miru prije nego šta furešti navale. A vi barba Toma, ča činite, ča činite....



A barba Toma će - Ol se ne vii-i-idi da pitura-aa-aa-ajennnnnnn, svoju mižeee-e-erjuuuuuu...

Ma neka je mižerja, isto je lipa, ma isto je smišna, a tu su i pravi meštri o zanata koji dobro znaju kako valja valjak držat u ruci.





Ipak, neke je uvatila mala snaga...



A ča je kume, jesi to malo ubija joko na šentadi an?
Ma biži, ispeka sam za obid palamide na gradele, joooo ča su bile slake kad san ih potoča ujen, a oni se petrsimul i vlaški luk stopija sa jazikom... ma isto mi se pari da mi ona četvrta čaša vina baš i ni bila o' potribe....

Penšjunati naslonjeni na osunčani zid javnoga zahoda grijedu škinu i bistridu politička pitanja.



A ča misliš, ko bi sutra moga pobjedit?
Ja ima osjećaj da bi moga Karamarko.
A za koga ti igra?
Šta za koga igra?
Jel u Bajerna oli Čelzija?
O đava ti čelzije odnija, ima bit da tebi već na osamnjajst stupnjeva čelzija prokuvaju možjani.

Ja isto navijen za Bajerna. Tamo igra naš Brane.
Koji Brane?
Oblak bome!



Premaliće u Dalmaciji.
Ma ko to more platit...



Da se ča ne zaudobi.