nisan EL DIABLO

Didov sat..

06 travanj 2022

Balada o ćaćinom satu

Ćaća je jema sat u malom đepu,
Takvoga sata nima više niko;
Iz njeg se vrime razlilo ka mliko,
Ka vino ča je uteklo svom čepu.

Kad bi ćaća zasta da otare čelo
I sat bi sta i mudro bi muča
Nije jema srca da odbroji uru
čoviku ča sidne da umoran ruča.

Na ćaćinon satu briše se i gubi
To vrime u zlatu i ti prsti grubi.
To vrime u zlatu taj leut ča kreće,
Na ćaćinon satu vratiti se neće.

Ćaća se moga i bez sata snaći
Po pivcu, maški, po jugu u zraku,
Al' more biti, ćutija se jači
Sa saton ča je svitlija u mraku.

Pričaju judi starili su skupa,
Sat je bija srce u ćaćinu tilu,
I nije se znalo ča to šuška, lupa
Ča to tira naprid vrilu krv kroz žilu.

Sve dok nisu oba ostali bez glasa,
Sve dok nije zemja rekla zadnje slovo,
Još se nije znalo ča je puklo, stalo,
Jer na njima sve je bilo još ka novo.

Stihovi: Krste Juras