geomir

ponedjeljak, 03.06.2019.

VINSKI PUT

Ovo djelo je plod fikcije. svaka sličnost sa stvarnim osobama i događajima slučajna je.

Kliknuti na link i slušati originalni izgovor teksta



VINSKI PUT
Nikoliko godišć posli Druge gvere Vinkota Damijonića vinski put odve je
iz Molega mista na škoju u Veliko sloviensko misto di ga je vinorska zadruga sa škoja
poslala da otvori Prodajalnu dalmatinskih vin.
Ta butiga imala je konobu di je u karatilima bilo čorno vino od molega plavca
i bilo vino od bojdanjuše i parča, a u damijonima Vinko je doržo prošek i rakiju.



Izvonka je bilo lako intrat u tu molu butigu s velikin bonkon,
ispod kojega su bile damijonice, a na bonku butilije,
a bilo je i žmulih, jerbo je Vinko prodovo vino i na žmule
onima ča su tuda somo pasovali.
Pametni mladić sa škoja odma je vidi da slovencima
veće prodo vina na žmule kad napravi bevondu pok je s vrimenon
dolivo i u butilije malo vodie i posol je, bome,
dobro kuri i za zadrugu, a i za Vinkota.



U grodu se pročulo za dobro vino iz Dalmacije
i u prodajalnu je dohodilo sve veće judih s butilijima
i tako je Vinko žvielto uči slovienski i steko prijateje,
a dobro je nauči jazik kad se oženi i posto slovienski zet iz Dalmacije.

Iako je Vinko surgo u Sloveniju di mu je bi posol, a kasnije i fameja,
ni zaboravi svuoj škuoj i s famejon bi dohodi liti na more,
a onda je prijatejima provjo kako je putovo parvi put deset urih
u feroti za Sloveniju i kako je odma razumi nike slovienske riči.

„Parvu sloviensku rič son ču – provjo je Vinko -
na MEJI u Dobavi di putnici čekodu dok se promini ferota iz Zagreba
i kad mi je ta rič intrala u uho
pomisli son na puste meje i mejoše na našemu škoju.
Konduktier non je reko da će u Zidanom mostu bit ZAMUDA.
Muški putnici ostali su mirni i odma son kapi da ni perikula,
da konduktier ništa ne priti našoj muškosti.
U Zidani muost smo malo zakasnili,
ma smo odma nastavili put iz parviega TIRA.



Izgledalo mi je da Janez ni nojčešće ime u Sloveniji,
jerbo su Slovienci češće spominjoli JURJE,
kad su vadili mijore iz takujinih.
I Slovenci rečedu GREMO i oni su DOMA, a ne u TUJINI,
a niki govoridu da imomo, a niki da nimomo istu DOMOVINU.
U Sloveniji slušoš VALCERE i POLKE i u autobusu,
oni volidu popit koju KAPLJICU DOMAČEGA.
Kad son ču rič DEŽ zno son da je tuo naš dorž,
Slovenke su DEKLICE, a na našemu škoju diklice,
KUMARI su kukumari.
I oni rečedu ko i mi MOTIKA, VINO, gruožje je GROZDJE,
cukar zovedu SLADKOR, a mi mirimo slador u mastu i tako daje –
ča hoće reć da su Dalmatinci i Slovenci
imali dobre veze i vezice i prin prodajalnih vin i modiernega turizma.



Ma kad son ču da Slovenci rečedu RUMEN zanamisto žut,
JABLAN za stablo od jabuke, LUNA in je Misec
ča ga ne more ćapat naša luna. GOTOVO je siguro,
KURIT ni hodit nego grijot, KOPAT je i kopat i kupat se;
ZAHOD ni zahod iliti kundut nego zapad, ..... ečetera
– zbaguti son se i pristraši da će mi se izmišat sve riči.

Od tie nevoje sposila me moja Marica ča mi je stivala
tako dobro sve slovenske riči u glovi da Slovenci mislidu
da već nison Vinko, dalmatinac, nego zali njihov Janez,
foli bi se tako Vinko prijatejima u svuome mistu na škoju.
.


Autor: Dinko Matković
Autorov blog: Insulano


Prošti: Geomir
Fotografije: Geomir

Manje poznate riči:

u karatilima = u buradima, manje bačve
damijona = opletena staklenka, demižona
je doržo = je držao
intrat = ući
i na žmule = i na čaše
somo pasovali = samo prolazili
dobro kuri = dobro ide
žvielto = brzo
surgo = bacio sidro, usidrio
provjo je = pričao je
ferota = želježnica
intrala u uho = ušla u uho
odma son kapi da ni perikula = odmah sam shvatio da nema opasnosti
mijore iz takujinih = hiljadarke iz novčanika
zbaguti son se = zbunio sam se
stivala = složila
zali = pravi, originalni
- 19:50 - Komentari (13) - Isprintaj - #
  • Bome si napisa cilu odu Vinkotu (Donabellina 03.06.2019. 21:56)
  • Opasan Vinkot sa onom vodom u vinu.
    Da mi je videti njegovu hrabrost u Zidanim mostu.:))

    Odličan tekst, uživala sam slušajući i potsećajući se mnogih zgoda, više nezgoda pri razgovorima u mojoj obitelji :)) (mecabg 03.06.2019. 22:44)
  • Gušt je slušati moga imenjaka, prije san pročita i sve razumija!
    Svaka čast Geo... Ovo je za etno muzej.. enciklopediju!
    Biće da si ga Ti i snima dok je priča!? Laka mu zemlja:( (nisan EL DIABLO 04.06.2019. 01:13)
  • @ane, @nisan, ne pratite pažljivo ča ste pročitali!!

    Ovo piše Dinko Matković, a Geomir prepisuje
    i čita tekst.
    Lipo piše.
    Autor: Dinko Matković
    Prošti: Geomir.

    @meco, nema više takvih Vinkota!! :-))) (geomir 04.06.2019. 09:31)
  • Lepo z vinsko potjo, a vlak mogoče bo imel zamudo eno uro. Lipo si prepričo Dinka, a i ja imam sličnu konobu. Na Kvarneru i u Istri oko Buzeta ima dosta sličnog sa slovenskim. (gogoo 04.06.2019. 14:35)
  • dobaaar, od gušta posluša....i naravno sve razumi......po jednoj bondi i jo sa fora :) (delicatus 04.06.2019. 18:09)
  • Morala sam još jednom doći i slušati.
    Mnogo mi se dopalo. (mecabg 04.06.2019. 18:33)
  • @gogoo, eto, kako Dinko kaže i mi imamo sličnih riječi!
    A kako i ne bi kad smo svi Balkanci!! :-)))

    @delikatus, neka naših!!:-)))

    @meco, ako ti se dopada imaš linkove
    na do sada objavljene Dinkove humoreske,
    a bit će ih još desetak. (geomir 04.06.2019. 23:03)
  • Iz čega ti ovo štiješ? Jie barba Dinko objovi libar sa svin ovin gončicama? Bilo bi lipo imat doma i tin libar.
    Jo imon somo onin njeguov libar obo poslovicima i frazemima naše Varbuoske. (čempriš 08.06.2019. 09:17)
  • @čempriš, još ti je navrime proštit dvi-tri ove Dinkotove gončice
    i bit koautor zbirke, kad se bude štampala!! :-) (geomir 08.06.2019. 10:08)
  • A nej, nej...nijećeš me ćapat na otu baketinu:-)
    Ma svakako moreš računat na moju svekoliku pomoć kad se budeš odluči štampat otin libar! (čempriš 08.06.2019. 14:05)
  • a ebga Geo... u pravu si!...
    Mislija san da to priča moj imenjak i da si ga Ti snima...
    a da si prepisa govoreno to mi je poznato i iz ranijih postova!
    Ne mogu virovat da Ti ono čitaš, il si odglumija Dinka! :)
    Nikako ne mogu povezat tebe i oni glas! (nisan EL DIABLO 12.06.2019. 23:03)
  • @nisan, svi mi zamišjamo jedan drugega ovako na neviđeno!
    Šta si misli da ću bit ka Oliver Mlakar!?? :-))) (geomir 13.06.2019. 20:32)

    		•
    DNEVNIK.hr10Nakon prijave pratite svoje najdraĹľe blogere i kreirajte vlastite liste blogera!Naslovnica