geomir

R O J O NJ E

PARVO PO MUŠKO

Koji me javal natiro da počnen vižitovat bloge?
I ondar zaguco kako glomac!
I sad son se navuko da već ne mogu pensat, a da mi se marcheline, gustirne, ondjeli, cvorovici, moljci i ostola blogo-čejad ne vartidu prid očima. I po donu i po noći.
A ne znoš ni kako izgliedodu i sve ti tuče umožjone kako će tuo bit
ako i kad se iskontroš š`njima?
Za reć pošteno, niki su se na niki nočin i prižentali, a i za defati
blogi su in njihove legitimacije.

Evo, od gustirne son vidi bucol.
Ma koliko je duboka, i kad bi po u nju bi li se utopi?
Ne bi tukalo, jer voda iz nje je guštuoža,
kad se napije čovik se rasfriško, lipo mu je.

Ondjel je štorija za sebe. Cili je vonka škvare.
Ovuon je mene u ovo uvoli! Ovuon je bi ješka koju son zaguco.
Obo njemu (ne somo jo) znomo i veće nego ča je potriba.
A opet, ne moreš ga ćapat ni za riep ni za glovu.
Jedino je siguro da je cili u oblocima, kako i priliči ondjelu.

Danica govori, da ovuode razbije brigu!
Lipo, ma tuo oće reć da vajo imat brigih, a tuo onda ni dobro!
A i ona je diguoda briga komuguoda, ma ovuon u oblocima ne obado.

A mojac, ko mojac.
Svukuda se zavukuje i ondar svega vidi i svega zno.
Javije se od tamo nindir di ni naših sluov s kočulima, pok muku muči
kako hi nacrtat i da se nojdedu jušto tamo di vajo da budu.
I crta li crta.

Marčelina je pok opet na svuoj nočin zavartivena.
Na sinusoidu! Sad je guore, sad je duole.
Jedon put non pritisko mihur, a drugi put non doje mislit.
Klik ovamo, klik onamo! Pok opeta klikneš, a nje ni nindir!?
I tako nos darži pod škotu da jidrimo kako ona hoće.


A ča mislite da son sad ovo od svoje voje napiso?

p.s. (svima)
Kuo ne razumi, žvielto, u roku odma, naručit od Dinkota vokabulor.
Emajl mu je malo duole ispod!

p.s.(žiensken svitu)
Svaka čast! Apiena sad znon ča tuo hoće reć - rojat!


Da vi bide poubavo na dušata dodeka ke čitate
stisnete go triangolnikot vo sredinata.