geomir

Š K A N D A L O T

Ovo djelo je slika stvarne prošlosti.
Svaka sličnost sa stvarnim osobama i događajima je namjerna.
Kliknuti na link i slušati originalni izgovor teksta



Srinje i mlaje generacije, apožito ča živedu u grodu,
su veće čule o kominu nego su ga vidile,
a pogotovo nisu čule ni vidile škandalot,
ča se još ritko nojde u kojemu šufitu na selu
di se sakri prid navalon od čuda eletrišnih
i drugih grijalicih za zinske done.



A škandalot je zasluži da ga ne zaboravimo,
anci da ga stimomo i da mu zafolimo
za svu onu teplinu ča non je u ditinstvu dovo zimi u postejima.




Škojorske kuće grojene su od debelih mirih od stinjo;
duole su bile konobe navar kojih su bili darveni podi,
a tonkin ošituon bile su prigrojene kamare.
Kuhinje s velikin kominuon, komoštrima i trinogima
ča su služile za kuhot, bile su u šufitu ili kojuoj kućici u dvuor.
Ni bilo fumorih i dim je hodi vonka kraj pločih ča su bile kuvierta kućih i kućicih.




Okolo komina bili su bonki na kojima se sidilo i zimi grijolo,
ma somo onu bondu koja je bila voltona prema uognju.
Za ugrijot drugu bondu vajalo se voltat.

U ono vrime tieško je bilo duoć do dinara i za kruh,
a nekmoli skupit šuolde za reparat vrota ili ponistre
pok je u kućima zimi uvik bilo hlodno:
refuli hlodne bure znali su dizot i tapiete na bišavin podima.
Da bidu dici barienka malo zagrijoli lancune,
mame su muletima vazimoli žeravu i punile ramone škandalote,
ča su imali pokriv i darveno daržalo.




Škandalot je, duonkve, bi produženo ruka
ča bi bila prinila malo teplinie iz komina,
ma je i tolisno teplinie puno vridilo,
jerbo se dica ne bi triesla od zimie i lašnje i žveltije bidu zaspola.



Kad su bile kruto hlodne večeri,
mame bi stavile i žeravu u kain i tako bi temperale ariju u kamari.
Ko ni mogo nabavit škandalot dupero je teplu vodu u butiliji
ili bi ugrijo matun, zamoto ga u peču
i stavi ga u posteju da mu steplit lancune i noge
Ma ni teplo butilija ni matun
nisu mogli žveltije i boje steplit lancune negoli škadalot.



A u ovo naše vrime kad non HEP oliti Harvosko elektroprivreda
ne somo priti nego i iskjuči letriku
onima ča ne moredu podmirit na vrime račun,
dobro je s pomnjon pogledot u šufit
di bi se barž mogo pronoć kojin zaboravjeni škandalot
ča bi vos mogo barienka pinkicu steplit.

Autor: Dinko Matković
Autorov blog: Insulano

Prošti: Geomir
Fotografije: Geomir


Manje poznate riči:

škandalot = naprava za grijanje kreveta
apožito = naročito
šufit = tavan
anci da ga stimomo = što više da ga cijenimo
debelih mirih = debelih zidova
fumori = dimnjaci
muletima vazimoli žeravu = željeznim štipaljkama uzimali žar
duonkve = dakle
lašnje i žveltije = lakše i brže
žeravu u kain = žar u željezni lavor
matun u peču = opeka u krpi
žveltije = brže