Vratija se Šime… di je bijaaa… di je bija da je bija lipo mu je bilooo.
Je svitu moj bilo mi je lipo, ma da lipo, bilo mi je ka u raju.
Oma čim smo partili trajektom parilo mi se da gren u sanatorij.
Trajekt je krenija u 6 uri a mi smo bili na lignje već u 8 ipo. Kako je prošla prva noć ulova evo prilažem dokaze u donju sliku.
Par smo jih oma bacili na tavu a ostalo u led.
Sutradan ujutro smo se spustili doli u misto na kavu i jeger. A kako je lipo… a pogledajte i sami…
E… onda smo lipo otišli doma čagod pojist i pošli smo u hobotnice.
More lipo, bonaca…
samo glebi i mi…
Nakon po ure uletila je prva hoba (3kg)… kum se borija s njom po brodu i deboto me posla u kurac ča san se uvatija aparata i slikavanja…
Da ne bude baš sve po PS-u pobrinula se kuma kad se zapetljala…
Kako bilo… lipo je bilo vidit ulov ča smo ga donili doma…
Da ne bi bili samo na morskom meniju pobrinija se kum kad je užga svoju pričuvnu kužinu oli ti ga gradele.
ali sve ča je lipo kratko traje, došlo je vrime od partence, i bilo mi je stvarno tuga ostavit ovu milinu (Milnu)…
Danas je bila malo teža artiljerija na repertoaru. Otiša san do Tugara vidit svoje dvi tuke koje će partit na oni svit za koji dan…
i normalno dat ruku (bija san konobar) dok su se bikarili prajci od kojih je jedan i moj od ravnih 123 kila…
Eto svitu moj, kad san nakon svega tega stiga doma i počeja ženi pričat kako mi je bilo, ča se sve dogodilo ovako me je gledala…
Je li joj faca onaka zbog moje priče ili zbog vina, zaključite sami… ali kad smo popodne legli i digli se za popit kavu pari mi se da joj je bija niki osmih na licu… e… ča se mora nije teško :)
Dunkve, dabogda se ovako patija cili život ča od srca i vama želin.
Zdravi i veseli bili.
Ps.
Sutra gren na jedno krštenje di triba polizat pjate i di nije pristojno ostavajti spizu koja se stavi na stol… opet ću se ispatit ka pas.
|
