A svitu moj di su ona dobra vrimena.
Da koja dobra vrimena, ma kako me to morete uopće pitat.
A ona, kad bi me judi zvali na žmul vina oli marednu, kad bi ja zva njih na koju lignju oli fetu pršuta.
E pasalo je to vrime.
Sad me samo zovedu da dojden pljeskat i dati podršku nekome govorniku oli da gren zvižđat i petavat roge onome drugome.
Asti sto, oli san popizdija, jeman ja i drugega posla.
Molajte me s porukama, mail-ovima, telefoniman jerbo vas ne bandan i za dišpet ča ste take čimavice neću vas njanci zvat na kafu a kamo li na čagod bojega e…
Enti malega miša evo mi prid vratiman onega ča dili letke, a iza njega je oni ča prodaje osiguranja, a vidin da se prid kućon parkirala i ona ča prodaje masažne vibratore za noge.
Gren se ča zaklopit u banj i činit fintu da nisan doma.
A ti Paško kad vidiš da jih više nima udri dva puta francuskim kjučem po cjevi od vodokotlića pa ću se ja spustit na karte.
E i nemoj da mi ko izi moju slanu srdelu.
E Paško moj jedini si mi ti osta.
Zdravi i veseli bili.
|
