Moremo mi govorit koliko oćemo, pozivat se na kalendar, na paragrafe, moremo mi zvizdit do ujutro da je Lipa Naša još puna turisti, da je temperatura mora još uvik ugodna za banje. Sutra je, tili mi oli ne tili, SLUŽBENO gotovo lito. Barenko za moju Vinkicu i ostale školarce, a samin tin i za njiove roditelje, to ka mene i Zakonitu. Od ponediljka počinjedu druge obaveze, nima se kad ukrest uru-dvi vrimena za skočit na Gabine i itnit se na brzinu u more. A kad bi i doša doli, naša bi pustu plažu. Oli samo sa penzićima, bez dičje cike i vike ...
Srića. Vinkica se okupala ovo lito, i to skoro svaki dan dvokratno, i ujutro i pozapodne. Čak je uspila i babu Vinku nagovorit da vazme kostim u da se gredu skupa banjat. A sezonu kupanja je, zahvaljujući ekipi iz Judo kluba „Dalmacijacement“, zaključila u velikome stilu: odlaskon u akvapark Solaris.
Tribali su poć 28. 8. ali kako je vrime zagovnilo, odgođeno je za jedan dan. Ne znan kako bi sa njon izaša na kraj da se i ti dan kojin slučajen nije išlo!
Lipo, na vazdan, ujutro je sa menon krenila kad san iša na posal, krenili su u osan uri sa Gospice i malo poslin su već bili na šugamanima ...
Jedva san jon uvalija oni mali fotoaparatić, da potegne koju sliku. Ne mogu jon zamirit ča jon nije bilo na pameti puno slikavanja, jema prav dite ča se tilo zabavit, a ne okolo glumit paparazza ka berlavi jon otac  , ali i iz ovo par slik se more vidit da su „Solaris“ skroz naskroz prominili, nije to više samo tri tobogana i gusarski brod ...
... to je sad cila nova konstrukcija, mala rika na kojoj putuju u buvelima i svako malo se sa vrja jedna velika bačva izlije po njima ...
Mogu zamislit kako su guštala dičica ... da bi rič reka, osin onega klasičnoga onelinera iz „Ko to tamo peva“ : „... i tata bi, sine ...“
Osin tega jema još i par tobogani, od oni za strašive do oni ča in nije ništa itnit se sa stine u kajin vode. Naravno, figurativno rečeno, jerbo je sve to osigurano, bez oštri rubova i sa velikin trudon i pažnjon da se nikome zlo ne dogodi ... Naravno, be triba ni spomenit kako se je Vinkica naguštala, i glasan odma za svaku litnju sezonu ovako zaokružit i završit. Sad ćemo se malo zabavit sa librima i opet marljivo učit do idućega kupanja. Skula počinje u ponediljak ujutro, u osan uri, do deset i po, samo „za šalu“, dokle se svi međusobno ne naćakulaju, samo do deset i po, pa onda ...
Zdravi i veseli bili! 
|
