Dragi moj Sveti Mikula!
Znan da su zajebana vrimena, znan da je recesija, znan da nan se okruženje pritvara u plantažu banan. Oli bumbaka (pamuka, za sjevernjake), ča mu ga dođe deboto na isto.
Znan da će za puno nas Božićnica ostat misaona imenica, ča bi se lako moglo dogodit i sa darovima za dicu.
Jebe me se ko je kriv, nisan ti ja od takovi ... uostalon, svi ćemo, pri oli posli, dospit kod Onega Gori, pa će on prisudit. Bez obazira u kojoj je ko stranki, i glede mede koliko je ko učinija za Našu Stvar (talijanski: cosa nostra)
Zato te, dragi moj sveti Mikula, neću dušit sa spiskon ča bi sve meni tribalo, jerbo bi bija duži nego govor uvaženoga diktatora Fidela Kastra, i to kad je bija u najbojoj formi.
Zadržaću se samo na par najvažniji:
- Najprin, želin mašo zdravlja ciloj mojoj familiji ... i samo mrvicu sriće!
- Ka drugo, kako ti i piše u opisu radnoga mista da si zaštitnik pomorac, čuvaj mi onoga moga mlajega, Zlato mamino, da lipo po redu baca kamenčiće u Panamski kanal i da se lipo redno vrati doma oko Tri Kralja, kako je i namirija ...
- Ne tribaš mi sutra donit ništa, vengo jednu čikolatu. Od deset deki ... Daj drugima ča in je potribnije.
Ako i ne doneseš, neću se najidit.
Kad bi mi se ispunile ove tri želje, ne bi bilo sritnijega čovika od mene u Zapadnin Kaštilima.
Jema još jedna mala, mala, mala ... koju san se mislija bi li je uopće i napisa.
Znan da nisi svemoćan. Nije ni Oni Gori, ča ti je šef, i njemu se omakne koja ...
Ali molin te, ako ti ostane još malo force kad i ako mi ispuniš ove prve tri želje, molin te, promišaj mac (bunt, za sjevernjake) karat, izbaci sve lišine iz njega i podili nan malo fante, konje i kralje.
Da bude malo lipše kasnije, kad moja Vinka bude igrala drugu partiju.
Nagleda san se lišini cili život ... samo san jednu napolitanu akuža, kad mi se moja prinčipesa rodila, ajde, računaću i one tri trice godinu i misec dan ranije ...
Ali dosta mi je „kaputi“ i "češlji" za cili život.
Moran večeras ranije poć leć, da mi se ne pripadneš kad dođeš. 
Neću te više gnjavit, moran ča ostavit i za tvoju prijatejicu, za iduću šetemanu (sedmicu, za sjevernjake).
Trudija san se bit dobar, pa se nadan da neću u mojoj bičvi (čarapi, za sjevernjake) nač koju grezu šibu.
Zdravi mi i veseli bili!  
|
