umorno

28.07.2006., petak

Kako popit tri litre vina u 3 sekunde?

Dvi litre Debita i litru Kašteleta? Lako, ako ste spretni ka i ja nut

Stvarno mi je krajnje vrime da smršavin. Kako san to otkrija, pitate se? Lipo! headbang

Isa san nisto kupit u butigu, i kako san se šesno okrenija, sorija san po stalaže sa vinon. Vata san boce po zraku. Moran pitat šefa butige jema li video nadzor, jerbo bi snimke moga "događaja" poharale sve natječaje za šaljivi kućni video lud

I na kraju san stvarno jema sriće. Najpri, nisan ni kapi prolija po sebi, i najskoli, doli su na tleju bile još dvi boce koje nisu pukle thumbup

Ipak me srića nije DO KRAJA napustila ... smijeh

Krajnje mi je vrime da gren na godišnji, kojega ću ovi put headbang

opet iskoristit RADNO. Naime, selimo se, ne daleko, ali ako ne ništa, barenko se u banju mogu na miru rastegnit a da ča ne razbijen, i mogu se uspravit u kadi. Jupiiii!
Ajde, lipo se provedite po godišnjima, sunčajte se, i kupajte se, makar u kadi! mah

- 15:48 - Komentari (5) - Isprintaj - #

15.07.2006., subota

Home, sweet home!

Eto, tribalo mi je koji dan da malo sredin utiske thumbup

Ne znan za Vas, ali meni mozak na ovu vrućinu radi u leru oli nikako nut

Fala Van lipa sviman na komentarima ... Njezino Veličanstvo, oli da citiran "najlipši dil familije" je u ponediljak (10. 7.) napokon izašlo iz bolnice.

pa se sad, ka ča se i vidi na sliki, more na miru posvetit litnjoj zanimaciji ... Neka malo gušta, jerbo u deveti misec gre u jaslice.
Završila je i meni i zakonitoj noćna mora. Jema bit da je Šefica ovo sve podnila na puno boji način od oca i matere. Nije revala. Nije ronzala. blabla

Najjači momenat koji ću pamtit dokle san živ je, ja mislin, jedno popodne kad san ja doša "u smjenu" a ona je još nanila. Sidin uz posteju, i ja pomalo kunjan oli čitan novine, a ona se trzne, otvori okice, vidi mene uz posteju, pa se uz blaženi smješak okrene na drugu stranu i nastavi spavat još po ure zijev

Bitno je da je vidila poznatu facu kiss

kad je otvorila oči, a ono drugo će ionako proć.
Vrućina je, a straj me sad odvest kupat je na Gojaču, da ne bi ponavljala gradivo po likarima ... Počekaćemo još koji dan, pa ćemo se poć banjat malo dalje. Pisak, na primjer. A ni u Mašogradu ne fali osvježenja, ka ča je na ovoj slici čovik maloj učinija cili umjetni potočić sa slapon.

I neću Van reč ko je, jerbo u našen ludome selu nima puno svita ča jema pacence ovo napravit, pa če van lako bit pogodit. Mala Šefica broji dane kad će jon dioć striko Neven, a ja brojin dane kad ću se odselit. Još malo! I meni i njoj! Pozdrav svima iz užarenoga Mašograda, ma gdje bili. mah

- 15:34 - Komentari (6) - Isprintaj - #

07.07.2006., petak

A tako je lipo počela ova nedilja ...

More van se činit da san malo izmiša kalendar, ali mi se nemojte čudit. Napokon smo u nediju (02.07) uspili poć na Šoltu, ka ča vidite i na ovoj slici "najlipšega grada na svitu" ali iz malo nesvakidašnje perspektive, jerbo se ne vidi Sv. Duje.

Ali figura ovako rano ujutro i brez njega, jerbo je vapor bija u sedan manje kvarat (6:45). Bartul Kašić, popularno zvani "Coto". Lipo nas je i pri ure vrimena odveja na misto, a plašili smo se oćemo li opet odgodit, jerbo je noć prije puvala lipa bura. Eto, i to smo odradili, Vinka je obašla pradidovinu, pa sad moremo diko poć i samo se okupat cool

. Morali smo brzo nazad, jerbo smo tribali i u Kaštila poć timbrat kartelu. Sva srića, jer smo na Šoltu donili kišu, i to lipu. Kamo sriće da su pizdarije pristale na tome

Ono ča mi se dogodilo sa gumon/auton san već napisa, bilo je onako na prvi balun, u afektu, ali zato je u sridu stiglo glavno sr**je. Vinka zafibrala. A još se nije oladija termometar od zadnje viroze. Rigoleto. Proliv.39 i po fibre i ne mores je skalat jer sirup povrati a sa čepićima je na ratnoj nozi odavna. Mogli smo je samo tuširat headbang

Ajme. Dajemo jon pit svako malo, ali više izajde vengo ča ulize. Ajme. I nima druge, na hitnu dječju. Ostavilo je namo. Privižitalo cilu. Infuzija. Muka mi je bilo nju, onako veselu i živahnu, gledat kako leži onako lešo-lešo, oči na polak koplja, ka ča se i vidi na sliki:

Ajme. Znan da se pri oli posli dite triba ono ča se reče "odbit od sise" ali nima gore muke vengo ostavit je samu u bolnici. headbang

Molin, kumin, prispavat ću na balkonu, nikome neću smetat ... Ne mere! Amen!
Eto, sad san ugrabija malo vrimena, pazi je baba Vinka, Zakonita radi, a ja san doša ništo napravit doma. Triba od čega i spizu kupit rolleyes

Zadnja situacija: no rigoleto, no fibra, no proliv. Nadan se da će na tome i ostat. Ako mi ne odgrize ruku kad je gren pogladit, koliko je bidna gladna njami

Dosta za danas. Nadan se da ću po nedilji pisat koji veseliji post. Dosta mi je crnila za danas, a i šire mah

- 16:29 - Komentari (7) - Isprintaj - #

04.07.2006., utorak

Šta se dogodi kad kupiš najjeftinije gume ...

Ovo bi tribala bit ka reklama ... za Savine gume ... tako je ispalo. Jutros san se uputija oko jedanaest manje kvarat (10:45) sa mojin Punton kupit dvi nove gume. To je tribalo trajat jušto do kraja marende, popit kafu u kafiću kraj vulkanizera i nazad na posal pri kraja marende. Ali, od toga je ispa triler ... sa hepiendon, doduše. Prominija gume i uputija se nazad, a ono auto trese, baulja, da mu je koji pandur da puvat na auspuh garant bi bija pozelenija. I pandur i aparat. Nazad. Vulkanizer prominija felge, križali gume, samo ča nismo prolili kršćenon vodicon, ali ne pomaže. Trese i dalje!
Ja se ka kroz maglu sitin da mi je moj serviser reka da kad počme trest da je vrime da prominin disk pločice.
Ne budi lin, odo u grad. Prominili disk pločice. Centrirali trap. Oni ča je centrira trap, optužija ka glavnoga krivca njezino veličanstvo GUMU. I to novu!
Došlo pet i po, vulknizer radi do šest. Nazad! Doplatija još sto kun, za pinku bolje gume. I? Ča mislite?
Sad je sve u redu. Nima veze ča je došlo sedan uri popodne, meni tlak veči vengo u napumpanoj gumi ...
Bitno je da je sve u redu, a one gume iz naslova, sa početka priče, moremo samo bacit u Piranski zaljev ...
I uvik se sitin onega iz naslova. Ne vridi samo za gume. Vengo za sve. Ne mora bit najskupje. Samo da nije najjeftinije. Samo pinku bolje. I sve u redu.

A vrime? Pa nismo u Americi da je vrime novac. Bitno je čako i naučit. headbang

Amen!

- 02:14 - Komentari (2) - Isprintaj - #

01.07.2006., subota

Voćna salata!

Zašto ovakvi naslov? Zato! Jer mirita! Mala tare voće sve sa reda. I, fala na pitanju, čini jon dobro. Puno dobro! thumbup

Još malo pa u taktičku situaciju uleće i tuta (kahlica, za sjevernjake) a dotle, Vinka tare trišnje, višnje, šljive, praske (breskve), barakokule (marelice), grožđe ... a nije jon strana ni kripnija spiza. Par postov niže ste vidili kako je mala odlia sama se mašit za salam. Nikidan je u babe Slobodne jila i pancete. To je njon sve salam. Reka san babi neka jon proba dat i malo luka (češnjaka za sjevernjake), a ja ću jon kupit skije i neka odma gre trenirat u austriju ovu zimu. Lipo bogami! njami

A dotle se ona (vidi sliku) lipo ljulja ka da nisu njezina posla. Čin je malo oteplilo, satrala je šefa, staniocu i pet kilometri pruge i umela ujca Antu da jan mekne ljuljačku. Tako da sad kad gremo u Kaštila, ne gremo u babe Vinke , nego gremo na ljulje. Eto, ne mogu više, majke mi, gren se kupat. Stojte mi dobro ...

- 15:24 - Komentari (3) - Isprintaj - #

Kupanje, kupanje, kupanje ...

Triba se svakako okupat, makar i u kadi ...

Došlo je i vrime kupanja ... ne samo u kadi. Na moju veliku žalost, nisan moga prisustvovat premijeri ... tako da niman nijednu sliku tega povijesnoga događanja, ali mogu virovat na rič mojoj rodici Jelici, ča čuva malu ... najpri nije tila ulist u more, a kasnije kad se cila ekipa uletila unuitra prskat i bacat, ušla je i ona. A kad je tribalo izać, nikako vanka ... Klasika naughty

Vi mislite da pritjerujen, ali niste u pravu. Ovo je fala Bogu Vinki već treće lito. Prvo je lito jemala par miseci, pa ka eto nećemo je kupat jer je još sitna. Drugo lito, to ka lani, taman da ćemo je počet kupat, a onda se razbolila, pretrage simo, pretrage namo, i kad je to sve finilo, onda se vrime "usralo" pa se tako ni ja nisan lani okupa njanci jedan put. headbang

Nadan se da ću ove godine ispravit. Evo, po ko zna koji put, gren na Šoltu, lipo je vrime, Zakonita sutra ne radi, pa ćemo skupit strica Mirka i odo lipo na Šoltu. Opet premijera. Još Vinka nije bila tamo, na pradidov otok. Eto, nadan se da ćemo i to sutra ispravit. I obećajen i koju sliku sa Šolte thumbup

A ko zna, možda se malo i itnemo u more, makar sa trajekta. Nikad se ne zna zujo

- 15:14 - Komentari (1) - Isprintaj - #

<< Prethodni mjesec | Sljedeći mjesec >>

Ovaj blog je ustupljen pod Creative Commons licencom Imenovanje-Nekomercijalno-Dijeli pod istim uvjetima.

<	srpanj, 2006					>
P	U	S	Č	P	S	N
					1	2
3	4	5	6	7	8	9
10	11	12	13	14	15	16
17	18	19	20	21	22	23
24	25	26	27	28	29	30
31

umorno_oko

Opis bloga

Linkovi ...

Ovamo volin povirit ...

Moji E-mailovi: