Marketing
Home, sweet home!
Eto, tribalo mi je koji dan da malo sredin utiske 
Ne znan za Vas, ali meni mozak na ovu vrućinu radi u leru oli nikako 
Fala Van lipa sviman na komentarima ... Njezino Veličanstvo, oli da citiran "najlipši dil familije" je u ponediljak (10. 7.) napokon izašlo iz bolnice.
pa se sad, ka ča se i vidi na sliki, more na miru posvetit litnjoj zanimaciji ... Neka malo gušta, jerbo u deveti misec gre u jaslice.
Završila je i meni i zakonitoj noćna mora. Jema bit da je Šefica ovo sve podnila na puno boji način od oca i matere. Nije revala. Nije ronzala. 
Najjači momenat koji ću pamtit dokle san živ je, ja mislin, jedno popodne kad san ja doša "u smjenu" a ona je još nanila. Sidin uz posteju, i ja pomalo kunjan oli čitan novine, a ona se trzne, otvori okice, vidi mene uz posteju, pa se uz blaženi smješak okrene na drugu stranu i nastavi spavat još po ure 
Bitno je da je vidila poznatu facu 
kad je otvorila oči, a ono drugo će ionako proć.
Vrućina je, a straj me sad odvest kupat je na Gojaču, da ne bi ponavljala gradivo po likarima ... Počekaćemo još koji dan, pa ćemo se poć banjat malo dalje. Pisak, na primjer. A ni u Mašogradu ne fali osvježenja, ka ča je na ovoj slici čovik maloj učinija cili umjetni potočić sa slapon.
I neću Van reč ko je, jerbo u našen ludome selu nima puno svita ča jema pacence ovo napravit, pa če van lako bit pogodit. Mala Šefica broji dane kad će jon dioć striko Neven, a ja brojin dane kad ću se odselit. Još malo! I meni i njoj! Pozdrav svima iz užarenoga Mašograda, ma gdje bili. 
Post je objavljen 15.07.2006. u 15:34 sati.