01.02.2009., nedjelja
KOKTELSI „ POJAČAVAJU“
|
KOKTELSI „ POJAČAVAJU“ (TATJANA UDOVIĆ) Nikola, Mauro i Tomi su kantautori sakega albuma od Koktelsi – saki je autor četire pjesme, a Mauro je uz to zadužen za aranžman Koktelsi su va vreme recesije i krize zišli van z noven dvostruken albumon „Pojačavamo“, z ken govore da oni nete stegnut cinturini nego jih otpustit i još više pojačat, i to z parolun: Trdo spreda, mehko zada, pune bukaleti i ŽIVIO PUST! 
Kako su se to Koktelsi pojačali lepo nan je špjegal Tomi Kresevič, jedan od autori teksta i glazbe, te član oviste simpatične i energične skupine mladeh glazbenici.  Sada kada si povedaju da rabi stegnut cinturini, oni su izdali album. Ne samo ča su juden dali audio cd z 12 noveh pjesam, nego su dali i bogat dvd z spoti i raznemi gostovanji – pak su prvi bend na oven područje ki je storil dvostruki album.  Osin tega, si ki su bili na ken od zadnjeh koncerat od Koktelsi, mogli su videt da su se mladići pojačali i kroz scenski nastup, aš kako oni reču, ne žele bit štufni ni sebe ni juden, pak vavek rabi delat neč novega. Se pjesme na albume su nove, osin „Lude kuće“ ka je bila vezana uz seriju „Ćo mi – ćo ti“ i ka je još va vreme snimanja albuma najavjevala da Koktelsi opet neč punun parun parićuju. Aktualni singl z albuma je „Bombon“.  Tista pjesma je već jako dobro zaživela aš su malice z Kumpanije z Halubja na nju delale koreografiju za Izbor krajice Rečkega karnevala 2009.  A maškare, same po sebe su Tomiju i ostalen članon benda va krve. Oni pust živeju celo leto, vavek su kostimirani i puni force i kuraja, a Tomi nan je povedel da je on sam kako mići bil Mučićev zvončar.Tomi je z glazbene familije. Nono sope armuniku, otac mu je kantal va grupe „Priomorci“, a fermal je sost kad se j' Tomi rodil, pak Tomi reče da mu je jednostavno bilo sujeno va živote sost. Glazba je za njega strast bez ke ne more. On stvara kako bi neč prezentiral i povedel juden. Prišal mi je jedan mladi par i za moju pjesmu rekal: „Ovo je naša pjesma“. Srce mi j' zajedno poskočilo! Isto tako je istaknul da ga je posebno razveselilo čut kako Slovenci z svojen naglaskon kantaju njihe pjesmi. Ćo, Slovenci kantaju po domaći!  Tomi smatra da je bit kantautor najlepše zanimanje na svete aš čovek ima priliku va judeh pobudit emocije – kako veselje tako i tugu, aš oni se poistovjete z pjesmun i intimun kantautora. On govori da stvorit svoju pjesmu i se stavit na hartu je jedan intiman čin, aš kroz pisanje umjetnik daje čoveku jedan presjek onega ča se dogaja va njemu.  A uz Koktelsi moremo samo stat i podržat jih va njihen „pojačavanje“ aš mladići su to stvarno zaslužili – na prven albume su se judi smeli ča neki izdava neč na čakavsken zajike, aš to ni va mode, pa da ki će to naslišat, no sejno danas zad njimi stoji već peti album, hijade prodaneh cd-ji i čuda nastupi, a oni z još više kuraja nastavljaju stvarat na našoj voljenoj trdoj domaćoj besede. Za to njin moremo reć samo jeno velo HVALA i pojačajte se do daske!  |
