Mato, Mato, kam se tak žuriš na tem beciklinu? Daj stani!
-Kaj me trebaš Štefina? Em, Mara me poslala v dučan po germu. Sfalela joj je, a obečala mi je, da bu pogačke z ocvirkima spekla. Zato se žurim. Je, se si mi zrekel, al ja te nekaj trebam - veli meni moj pajdaš. Nu, kaj je tak važno, reči već jemput. Kaj me trebaš?
- Znaš prešli tijen bil sem v goricama otakat. Dopeljal sem brenkicu vina doma, pak bi štel da to skupa sprobamo. Već zdavno neje mošt, neg je vino, a do sad se je stinulo. Nebi smelo biti mutno od prevažanja. Sad bi moralo biti onak "Prava stvar" -.
E dragi moj pajdaš, takvu molbu zbiljam nemrem odbiti -. Tak sem ondar naslonil beciklina na pljot i oćel nuz put glet kaj kuma Franca dela, a kum Štefina je z podruma donesel krigljinca vina.
- Čuj pajdaš, za ovo se je vredelo zavrnuti. Čisto, bistro, belo i ftečno, to je lek, prava okrepa i za telo i za dušu - velim ja njemu. Kuma je očla krave dojit i na mlekaru, a mi smo se dva seli za stol, z punema kupicama v rukama, z kojema smo gratulerali jeden drugomu. Obedva smo se prije naručkali, saki kod svoje iže i sad nam je jaršanjec baš pasal. Štefina je za čas donel z podruma drugoga krigljina punoga vina, a onda se počel sečati negdašnjijov danov dok smo mi dva bili mladi.
- E moj Mato, zimu ove godine nesmo ni imali. Se je počelo zaran rasti i za čas se budu livade kosile. Da, da začas bumo livade kosili i sušili, al kakov ti je to denes posel? Namonteraš kosu na traktor, pokosiš celu veliku livadu za vuru vremena, dojdeš doma kak da i nesi nekaj delal. Ondar ti traktor pomogne rastepsti travu, prekretati, nametati. El se ti sečaš, kak smo nas dva sami negdar, kakti mladi dečki, išli kosit livadu mam z zabave na gmanju kod nas v Pitomači?
- Sečam se kume, kak se nebi sečal. E, kakvi su to bili dani. Ta mi je zabava baš ostala v pameti. Baš nam je obedvema bilo lepo. Cure su nam bile po čvalji. Baš smo se razbečarili, naplesali, napopevali i kak se razme nusput pili i napili se. Doma smo došli zaran. Bilo je dve vure rano, sečaš se toga? - Joj kak se nebi sečal. Ko nam je kriv kaj smo dugo bili na zabavi. Kosit se išlo zaran. Zato i nesmo išli spat. Dogovor je dogovor. Obečali smo starcima da bu livada na Širinama pokošena do polne. Ti si Mato imal svojega beciklina. Na mojemu se spredrla v nedelju gumija na zadnjemu kotaču, pak sem zel ženskoga beciklina od mamice, da se ne dangubimo. Kose smo raspravili. Saki smo si zeli i još jenu rezervnu. Se smo to z žnjorama sprivezali za governale na becikline, vodera napunili z vodom, vnuter brusa za kosu brusiti deli, zajašili naša prevozna sredstva i pravo na livadu v Širine. Trebalo nam je dobri pol vure vožnje do livade, pak smo okre tri vure rano bili na livadi. Srećom, moj je japa po danu pregazil međe, po travi, pak smo se mam mogli prijeti košnje. Kak je to bilo na početku lipnja meseca, trava je bila zrela, puna semenja, a dišala je bolje nek si parfemi i denešnje pomade. Bormeš smo kosili do jedanajst vur pred polne. Samo smo si par put gutnuli malo rakije, kaj si ti z doma donel. To nam je bilo se. Opće se nesmo nikaj počivali.
- Kaj veliš Mato, koja je to bila sila v nama da smo to mogli? Al povustali smo kak marvinčad. Blizo polneva je bilo, a još nam je fanj komad ostalo za kositi. Od dve vure ranja, ne čudo kaj smo bili gladni, žeđni, i vmorjeni od posla. Mal se nesmo porušili, a mamica, koja nam je trebala frflebunga donesti ni od drača. Nema mame, pak nema! Nama se čvalje osušile na trešće. Ti Štefina si bil gazda na livadi, kad tvoj japa ne bil znama. Meni je dodijalo. Počelo mi se i spati. Nigdar nebum zabil. Blizo na livadi bila je vrba. Pod njom lado, samo kaj ne govorilo i zvala nas k sebi. Za čas smo se dogovorili, spraznili do kraja polička z rakijom, polegali pod vrbu, zarkali i zaspali kak topi. Dok mi je bilo najlepše, sečam se kak sem senjal da se z svojom curom Marom kušujem, zaškrobentalo je i zabesoktalo znad mene, a bormeš i znad tebe.
- O vi mrcine jene. Muka vas velika spopala. El ste poto došli na livadu? Crkavat ste došli, a ne kosit. Na zabavi ste lokali do ranja. Znala sem ja da v pondeljek nebu nikaj od košnje. Lenčine lene, el se tak dela? Mesto da ste zgotovili, vi crkavate v ladovini. - Joj mamo najte se ljutiti - sečam se pajdaš kak te je bilo sram pred mamom. Onak nakostrušen kak jež i naglo sprebuđen, rekla je da samo klimlješ z glavom, a da je to leko, kad je glavrdanja prazna i suva kak rasušena kaca. Nigdar nebum zabil kume kak si joj ti lepo rekel. Mamo, mam, neje junak onaj ko viće i špota, nego onaj koj trpi. Pital si ju i zakaj nje tak dugo nema na livadu? Vi samo vičete, a ja bormeš neznam el smo bolje žeđni, el gladni, a vas nema kak da ste v zelju prepali.- Neznaš, jel da neznaš, a mojega beciklina si znal zeti, vikala je tvoja mama. Zakaj me nema tad dugo? Dok sem pišće vlovila, očistila i spekla, kolače v košaru nametala, rakiju natočila, oču sesti na beciklin, a mojega beciklina nema. Tvojga sem prnjavoga našla, zato me tak dugo nema, mrcine jene, mrcinske. Pešice sem došla za vama .Tu malu livadu trebali ste i zabiti da ste kosili. Još treba i rede trave rastepsti. Sad da ste mam išli jest, a onda da ste z kosama mesto z rasovama i rede rastepli. Neje samo vama i meni je vruče. To se dela zranja, a ne sad na polne -. Joj kak nam je fini bil ruček. Spraznili smo košaru kaj bi rekel "keks". Mami smo tvojoj pomogli se kaj je štela, samo da nas pred curama ne osramoti i spripoveda kak smo rkali i spali, mesto livadu kosili -.
E Štefin moj, lepi su to bili dani. Bilo je lepo, al dok je čovek mlad nikaj mu neje teško. Tak smo se denes nadivanili. Istina je da sem v dučan zabil otiti. Nesem ja zato bil kriv. Kriv je bil krigljinec kojga je Štefina stalno vodal čas v podrum, čas v kunju. Doma sem došel bez germa, pak na špot.
Vaš Bača Mato
Pitomača.net
|
