Štefek Međimorec
subota, 02.07.2016.
POSTAL SEM PESNIK, I TO PROVI
POSTAL SEM PESNIK, I TO PROVI
Jo sem več f petem razredo i škola mi dobro ide. Nemam niti jenoga keca. Sako ljeto idem na produžno i popravek, alji se nazodnje navek zvlječem. Najbolje mi ide fizički i domačinstvo, a i s hrvackoga imam trojko. Jo joko voljim čitati knjige, alji ne se, nek samo nekoje. Meni se joko vidlo kak nekoji pesniki i književniki znodo ljepo napisati kaj je čoveko ljepo unda i čitati. To se mej joko zvidlo, pok sem i jo počel pisati pesme i tak sem postal pesnik, i to provi. Pesnik se po gracki velji pjesnik.
Na ficljeke papera sem počel pisati pesme, i to sakojočke: o morhi, o pajdošima, o poljo, o japici i mojki... O mami sem ne štel niti jeno pesmo napisati jerbo me žifcera dok pišem pesme i stolno nekaj palamudi. Rekel sem ji:
– Kaj stolno klofraš, kaj ne vidiš da sem jo pesnik i pesmo pišem. Naj me ometati i naj mi smetati.
Jempot nam je drogarica Trezika, koja nas vuči hrvacki, rekla da za domačo zadačo moramo sastaviti Jesen. A jo sem jo piatal, alji bi jo mogel napisati pesmo o jeseni i rekla mje da morem. Evo moje pesme:
JESEN
Potiho, potiho dolazi nam jesen
Več nega obadi i konj je ne tak besen.
Lišče pada sa drveča grana
Ober mene je preljetela vrana.
Ljudi skopajo na poljo kalampera
Skoro saki den je dešč i to me žifcera.
Grozdje je pobrono i sprešano zdonja
Zemlja je več zdena i kadi se z oronja.
Ljudi se sprovljajo kuruzo pobrati
Samo nevaljoši bero po sveti Kati.
Več vam ne znam napisati kaj
I tu je pesmi o jeseni kraj.
Pesma je bila gotova cakom-pakom. Čas posla. Glasno sem f školji moral prečitati pesmo i dobil sem plus četri. Drogarica mje rekla:
– Stjepane, moraš paziti što pišeš! Ne smijemo krasti stihove od drugih pjesnika. "Tiho, o tiho govori mi jesen" napisao je poznati hrvatski pjesnik Dobriša Cesarić. Ti si, Stjepane, od pjesnika preuzeo početne stihove. Imaš li još kakvo pitanje?
– Drogarica učiteljica, jo nemam nikvo pitanje, nego bi vas samo nekaj štel pitati. Kakve to ima veze kaj je te Cestarič napisal isto kak i jo. Znači da smo doživelji isti doživljaj. A, drogarica, rečite vi meni alji te pesniki dobro živido ot te svoji pesmi ilji i oni morajo iti na polje delat?
I unda je drogarica Trezika odgovorila nekak po stručno kaj sem jo zapraf ne nikaj razmel. Pok sem ne bedok kaj bi priznal da sem ne nikaj razmel jerbo bi mogel dobiti slabo oceno.
Kojekaj bi vam mogel napisati o tomo kak je to zapraf teško biti pesnik. Kuljko se vremena tak potepe dok se napiše jena pesma. Grintavec mje rekel:
– Kaj se, Štefo, drogarici Treziki v rit rivaš s temi pesmami? Kaj misljiš da boš dobil boljo oceno? Štefo, naj se vu te pesme ftikati jerbo boš još postal cvikeroš. Si pesniki imajo cvikere, a nazodnje boš još ponorel.
Jo znom da je Grintafco bilo žal kaj i on ne zna pisati tak ljepe pesme kak jo. Alji sem ipak odustal ot toga da bom i dalje pesnik jerbo se za sako pesmo joko zmočim, a so to moka vljezne na ficljek papera. I odlučil sem da več nam pesnik, nego književnik i da bom napisal knjigo. I to je ve to knjiga kaj čitate. Drogarica Trezika mje rekla da moram samo joko puno čitati i da morti bo nekaj z mene.
I počel sem čitati kaj nori kak da sem ponorel. Nejljepše knjige so mi bilje Junci Pavlove ulice, Vinetu, Kekec i Budaljec, Pirgo, Šegrt Hlapčić i druge. I tak sem se jo čisto znogla preobrnol s pesnika f književnika.
subota, 25.06.2016.
SAT PIJONIRSKE ORGANIZACIJE
SAT PIJONIRSKE ORGANIZACIJE
Saki petek popolne smo melji sat pijonirske organizacije. Naša učiteljica, drogarica Dragica, je odredila da bo nam pijonirski rukovoditelj Frenki. Frenki je bil por ljet stareši od nas. Te Frenki je potlji postal doktor i to provi, alji ne mom.
Na sato pijonirske organizacije smo nekaj čitalji ilji smo se igralji. Frenkijo smo moralji govoriti „druže“, kak provomo učiteljo, a mel je i šibo i si koji so ga ne posljuhnolji so dobilji packe. Nejpre smo z Maljih novina čitalji nekaj kaj smo za domačo zadačo unda moralji sastaviti. Ak smo bilji dobri, unda smo moglji čitati kaj smo štelji. Mi si dečki smo čitalji stripe: Tarzan, Malji partizan, Tim i Tom Tejlor, Mirko i Slavko... To kaj smo f stripima prečitalji, to smo se celji den f parko pret školom igralji dok je bil veljki odmor. Grintavec je jempot štel pokozati kak Tarzan skoče z jene grane na drugo grano i unda je tak z dreva copil kaj sje roko premeknol.
Deklje so obično zrezovelje sljičice koje smo moralji ljepiti v albume.
Jempot je Frenkijo ne bilo volja kaj bomo čitalji, nek je rekel da to štivo z Maljih novina prečitamo za domačo zadačo i sastavimo. Unda smo moralji saki som nekaj popevati. Jo sem popeval Kat čuješ trubo, ti uzmi sombrero, a Grintavec je popeval Aj, čavela. I unda se Frenki zmisljil i rekel je da se bomo mi dečki hitalji, a deklje so navijalje. Sakomo je Frenki odredil protivnika s kojem se moral hitati. On je slabešega na jakšega hujstril, a i deklje so navek navijalje za slabeše i menše. Slabešima so se delalji norca, samo kaj se bodo bolje srčano bilji.
Došel je red na Grintafca. On se moral biti protiv Naceka Frotrovoga. Nacek je bil malo preveljki za svojo visino, alji je bil suhoterni. Nacek je rekel Grintafco:
– Grintavec, se mi se čini da si boš ti po podo zobe iskal!
A Grintavecmo je rekel:
– Naj mi se nikaj nagrožati! Ak treba, jo te bom hmoril!
I Grintavec se zapičil pravac na Naceka. Tak so se kefalji kaj je se proščalo. Jo sem navijal za Grintafca jerbo je on moj pajdoš.
Na krojo je Grintavec i pobedil. Pokljekel sje na Naceka i za vuha ga gori zdigal,
Nacek je počel cviljiti i predal se.
Došel je ret i no me. Jo sem se moral biti protif Ferija Mendekovoga. Feri je bil
droben, alji nabiti. Malo me bilo stroh kaj mi na kaj naprajel ilji kaj mi na kaj ftrgel, a sigurno me bo i boljelo dok me nekam žugne. Feri mi velji:
– Kaj je, strahopezdec Štef? Vidim da si mi stroho!
A jo mo veljim:
– Feri, naj srati gluposti! Bomo vidlji što je bolji!
I počelo je. Feri se hapil tak kak sem se jo ne nodjal. Podmeknol me i, culo ti
cusravo, jo sem tak ljusnol, kak sem dogi i široki, kaj sem skeknol. Unda se hitil no me i počel me gristi za roko. Frenki je viknol:
– To je nepravilno! Ne sme se gristi!
Unda sem ga jo za losi prijal i hitil sem ga pot sebe. I veljim jo njemo:
– Saci moj!
Ščapil sem ga za vrot i počel sem ga gotiti. Frenki je prekinol borbo i rekel je:
– Štefek je pobedil jer je Feri grizel, a da sem ve ne prekinol, Štefek bi ga zagotil! Potlji sake borbe smo si jen drugomo moralji dati roko.
I tak je prešel i te sat pijonirske organizacije. Na krojo sata smo se f klopi si moralji stati, a redor je išel nopri pozdrovljat. Stisnol je šako i šako je pretisnol na sljepočico i fest viknol:
– Mirno! Za domovino s Titom!
Unda smo si mi moralji tak šakom pozdraviti i unda je redor viknol:
– Pozdraf!
A mi smo viknolji:
– Zdravo!
A potlji toga je Grintavec viknol:
– Skoči na kravo!
Frenki ga je mom pozval nopri i dobil je pet vroči packi na sako roko. Unda smo
si pograbilji svoje torbe, a deklje cekere, i dimo. Mi dečki smo uglavnom melji s plotna domaj zašite torbe kaj bokci, samo nekoji malo bogateši so melji nekve store strgane taške. Deklje so uglavnom melje z ljoščinja pljetene cekere. A na ručkama so viselji pljehnoti lončeki. Saki lonček je bil scinjani jerbo je po stopot ljupil po kamenjo dok smo torbe nahitalji. S tejo lončeki smo jelji f školji, i to hrono.
Frenki je rekel da ne smemo domaj reči da smo se f školji hitalji i bilji, alji nešče je itak povedal. Jo i Grintavec smo ne. Tak je to došlo i do drogarice Dragice i ona je zmenila Frenkija. Več nam je ne bil pijonirski rukovoditelj, nego mesto njega je došla jena puca.
subota, 18.06.2016.
SVATI
SVATI
Kolji pol sedem v jutro so bandisti zaigralji v naši vuljici. Čujem jo „dunde-rete-re, dunde-rete-re“. Vujec Roki i još nekof čovek so bilji pozoviči. Vujec Roki so bilji fest pot šusom. Japa sje naručil igrati Četiri staze. Prije toga sje dve rakije gotnol i bandisti so počelji igrati, a on je popeval:
Četiri staze, preda mnom stoje, neznam na koju ču pooooooč
Na koju got pođem, u Petrinjsku dođem i tamo me čeka pendrek.
Vujec Roki so melji v jenem žepo flašo z rakijom, a v drugem flašo z vinom i saki je pil kaj je štel. Unda so bandisti od naše hiže dalje po vuljici marša igralji i išlji so pot korak i sukalji so se ljevo-desno.
Došlji smo na gosti i unda je bil zojtrek. Bil je čaj, a to je bilo zapraf kuhano vino, i zdigani koloči. I meni se ot toga čaja malo počelo motati. Unda smo jelji čurke i hladnetino pok sem nekak došel k sej. Unda smo pre strico Ivijo, čija je čerka Dorica išla zamoš i to za svojega moža Zdrafkeca, gljedalji kak se veže venjčenjak na hruško. Podeljilji so nam cimere i prepičilji so nam cimere na opravo. Kapiton je bil moj krsni kum Vinci i kum Vinci so moralji spričovati. Nekaj so šljebekovalji i stolno so govorilji:
– Tak droga moja rodbina...
Stric Ivi i strina Jona, kakti hižni japek i hižna mamica, so otpralji pljesa i pljesalji so valcera. Stric Ivi so se tak ozbiljno držalji kak pes f čono, a strina Jona so se samo pocmehovalji.
Unda smo skupa išlji k mlodenco Zdrafkeco. Mi deca smo bilji nopri, za nami zastavnjak i podzastavnjak koji so držalji črljeno zastavo koja je mela cambljine na krojo, a na vrho je bila fteknjena jaboka f kojo je bilo napikano nekvo paperno cvetje i dolji so viselji papernati sakojočke forbe krep-paperi. I zastavnjak i podzastavnjak so melji belje rokavice i to je mej bilo joko ljepo.
Pre Zdrafkecovi hiži so pok kum Vinci počelji šljebekovati:
– Faljen bodi Jezoš Kristoš! Tak droga moja rodbina...
Jo sem dalje ne štel posljušati jerbo mje to več bilo dosadno.
Unda smo pok nazoj išlji k Dorici. Tu se Grintavec joko štimal jerbo je on pefca nesel i dobil je ot sokačice nekve drobne dinare. Dok smo išlji k Dorici, nopri smo bilji mi deca, z jedne strone zastavnjak, f sredini Zdrafkec, a z druge strone podzastavnjak. Za njimi so išlji muški, za muškima kljencari i podekljiči, unda žene, a na krojo pljeh-mužika.
Pok so stric Vinci spričovalji i prepovedalji se iste bedastoče. Strina Jona so doneslji sveto vodo i posvetilji so Dorico kak da so veljičasni. Dorica, Zdrafkec, kapitoni, hodnač i pocneholja so se prijalji za roke i kak mala deca so išlji kolji stola. Misljil sem da bodo počelji popevati Ringa-ringa-raja. Dorica i se žene so se počelje plakati. Išlji smo v opčino i f cirkvo na venčanje. Si smo nuter išlji pod zastavo. S cirkve smo išlji k Dorici i unda so bandisti igralji venčenjaka. Muški so hitalji f tenjer peneze, a bandisti so krotko igralji kaj je što štel.
Mi deca smo se fljetno najelji i ajt vun. To je bila priljika kaj smo moglji kaditi. Matek s Prekmostja nam je rekel kaj se zmečemo i kupimo cigaretljine. Kupilji smo nekve s filterom. Rekel je Matek da mi deca ne smemo kaditi Drove ilji Ibare jer bomo raka na pljuči dobilji. Jo sem mel beloga ropčeka i unda smo moralji fest poteči cigaretljina i v belji ropček puhnoti dima. Ak je bil ropček žoti, unda je bilo f cigaretljino puno nikotina i trebalo je cigaretljina vgasiti. I drugi so puhalji v moj ropček i ves ropček je bil žoti. Kaj nej to mama primetila, ropčeka sem f krej hitil. Dok smo tak kadilji, došla je znoglo Matekova mama. Mi smo mom cigaretljine skrilji za rit, a Matek je ne ftegnol jerbo mo je mama došla s hrpta. Fljetno je roko s cigaretljinom porinol v žep od jakne i samo najempot se cigaretljin vun žepa pokozal jerbo se žep presmodil. Mama ga je scopala i mom je moral ž njom iti nuter. Mi drugi smo bilji stroho pok smo počelji snega jesti kaj namo smrdelji po dimo.
Čenjčec, de smo negda jo i Grintavec race i goske nagonjalji, se zmrzel, alji je ljet bil vijanec i unda smo mi begalji po tem vijanco. Akat tamo, najempot je nekaj spraskalo i jo sem prepal. Odišel sem pod ljet. Grintavec mje jeno debelo veho porinol. On i drugi dečki so me vun zvljeklji. Bil sem moker kaj copi. Kaj ve? Ajt se dimo presločit. Jo veljim Grintafco kaj pemo po poljo kaj nas na nišče videl. Domaj sem si obljekel sakidešnjo opravo, a to mokro i blatno svetešnjo sem obesil na štalji kaj se bo sušila.
Potlji me na svatima mama pitala zakaj sem f sakidešnji opravi, a jo sem rekel da sem se presljekel kaj se nam zblatil jerbo se stolno vuni nekaj igramo.
Pok smo išlji jest i unda z lomorom. Bandisti so na sakem križonjo stalji i igralji so za pljes. Pljesalji so i oni kaj so bilji svati i oni koji so ne bilji. A igralji so some ljepe pesme: Četiri staze, Simeroni, Ja pijem čašu gorkih suza, Jedan dan života, Autobus Kaljipso to je ljepi hobi moj, Imam konja zvanog Smokija, Da bi se zrušilje Teljegrafske gore i sakefeljejočke druge. Dok smo došlji do Doričine hiže, pok smo išlji jest. Unda so nekvoga muškoga obljeklji kak ženo, a na glovi je mel ropca i popevalji so Baba gljive brola i si so moralji f tenjer hititi nekve peneze za sokačico. Dever i pocneholja so pljesalji na zelje i stolno je dever moral potlji krotkoga pljesa reči:
– Mlodem na veselje, storem na poštenje!
A primeš i šere kapiton so mo odgovorilji:
– Tancarom na zdrovje!
Ako se dever nekaj zabunil i krivo rekel, pok je za kazno moral sokačicom iti dalje pljesat.
Dorica se ve morala oproščati ot svoji roditelji jerbo je morala iti v Zdrafkecovo
hižo za sneho. Moja mama je dola igrati pesmo: Ružica sem bila, ružica več nebom i unda so se se žene joko plakalje. To je meni bilo joko bedasto. Kaj se ve si rožđijo? Ak je Dorica ne misljila za Zdrafkeca zamoš iti, unda so se ne trebalji ženiti, a ne se ve rožđiti. Noto je morala prije misljiti. Obglobal sem još dve bocke i pomalji smo se pakovalji dimo spot. Puno svotof je bilo na heljaj jerbo so se celo vreme naceđalji s futakom ilji, kak nekoji veljido, z direktorom. A dok te futak šupi v glovo, kak so reklji sosed Jondri, unda si f tomlji tri dni. I Grintafcova mama je bila pijana kak majka.
Drugi den je Dorica bila mloda sneha. Išla je f cirkvo na fpeljovanje. Veljičasni Ante so ji dolji štolo, a štola je kak šol kaj veljičasni imajo kolji vrota kaj jim po vroto ne puše. Dorica je morala to štolo za jen krej prijeti i veljičasni so jo peljalji kolji lontora. To je meni ne bilo baš poprovomo jasno zakaj se Dorica za štolo morala držati jerbo je ona mogla normalno iti. Pok je ne bila pijana! Potlji meše je Dorica hitala drobne peneze, a deca so se borila što bo več penez zgrabil po zemlji i celo vreme so vikalji:
– Mloda sneha dinara!
Na obed drugi den smo moralji nazoj iti na gosti, a to se zove prviči. Meni je to več bilo dosadno i rekel sem mami da jo nikam nem. Mama mje za obed dola meso z lodrice i kvošene vugorke i ljepo sem se najel.
Dok so nam roditelji išlji na prviče, jo i Grintavec smo odišlji na vrt i f stajici korzinja smo kadilji. Saki smo skadilji samo jenoga cigaretljina jerbo smo znogla počelji strašno krehuntati i bilo nam je momica, a puna stajica je bila dima. Kodelo se kaj se se dimilo. Grintavec je rekel:
– Štefo, jen cigaretljin nam je dost. Vidiš kak več krehunčemo. Ako si još jenoga vužgemo, sigurno bomo raka dobilji!
I nesmo več kadilji.
Na večer je išla mama hronit i na štalji je našla mojo zmržnjeno i blatno novo opravo. Jo sem na opravo čisto zobil. Vikne ona meni:
– Štefo, hodi nuter!
A jo jo pitam:
– Kaj idemo večerjat? Jo sem ne gloden!
A mama velji:
– Dojdi mom nuter, imam te nekaj pitati!
I dojdem jo f kuhnjo, a mama me pita:
– Štefo tje bilo ljepo na svatima? Bi se ti još gostil?
A jo veljim:
– Ah, mama, znoš da je na svatima navek ljepo i da smo si srečni kaj se gostimo. A mama velji:
– Unda se boš još jempot gostil!
A jo jo pitam:
– Mama, a što ide zamoš?
– Mama mi velji:
– Tvoja rit ide zamoš i ve jo bom jo zgostila!
I žuk pok žuk s šibom po riti. Prije nek sem jo dospel pitati zakaj me bije, mama
mi velji:
– Ve si se još jempot gostil kaj si zmazal novo opravo i kaj ste f stajici kadilji. Tak sem se čisto neplanerano još jempot gostil.
subota, 11.06.2016.
NA PAŠI
NA PAŠI
Mi smo f selji melji kanose koji so pre Drovi svinje pazilji. Kanos je rano v jutro z nekvom trobentom trobentoval po vuljici, a to je bil znak da se morajo svinje pustiti na pašo.
Melji smo i čerdore. Oni so pazilji krave. Isto tak je i čerdor rano v jutro kutil krave po selji. On je pocal s korbočom tak kaj je se proščalo. Meni je to bilo joko ljepo, pok sem ga prosil kaj bom i jo probal. Unda sem fest zamohnol, a korboč je ne počil, nek se zamotal kolji mene kak kača. Se sem bil sprelojtreni. Počel sem se bečati i vikati:
– Pustite me vun, pustite me vun!
Z vremenom ljudi so se menje puščalji krave i svinje na pašo, a i čerdori i kanosi so se zdošlji i se se to dotrglo zanavek.
Mi deca smo rado išlji s kravomi na pašo jerbo smo se moglji do milje volje igrati, a i nekvo hasen smo naprajlji. Jo i Grintavec smo navek išlji skupa. Nejprije smo hodalji za grobje i tam smo se unda pincekovalji, loba ritalji, z deklama se igralji graničare i pomalji smo se hapljuvalji kaditi. F nedeljo smo znalji iti f Storo šumo. Tam smo se igralji tofkače, kauboje i indijonce, tarzane, partizane i Švobe. Alji jempot je f Stori šumi moja krava zginola. Dve vure smo jo iskalji i komaj smo jo našlji. V grmjo je lježola i pomalji preživala.
Alji unda smo počelji hodati na igraljišče za Jadanom. Tam smo se shođalji s celoga sela. Oni z Gašparičevoga kota, dečki z Črne Pešte i Beloga Beča i mi z Gornjega kraja. Tam nam je bilo joko ljepo jerbo je ne bilo puno grmja i krave so nam bilje na videlji. Za Jadanom smo uglavnom loba ritalji. Navek je nešče donesel mantljina, a to je bilo puno ljepše nego dok smo ritalji s prepičenem gumenem lobom.
Š Črne Pešte je dohođal i Tonček. On je išel z menom f školo. Si smo ga zvolji Konj Češelj zoto kaj so oni melji tak suhoga konja kaj so mo se rebra vidla prek kože i rebra so mo zgljedala kak češelj. Tonček je isto bil tak joko suhi – noge so mo bilje kak botice, pok smo unda i njega, kak i njegvoga konja, zvolji Konj Češelj. Jempot nam je f školji drogarica učiteljica Dragica podeljila sljičice na kojima je bil nekof joko suhi dečec z Bijafre. I unda smo mi drugi den moralji donesti peneze za toga dečeca z Bijafre. Grintavec je rekel drogarici Dragici:
– Drogarica, jo predložem da drugi tjeden pobiramo peneze za Konja Češlja jerbo i on zgljeda kak da je z Bijafre, a ne š Črne Pešte. Trebal bi se i on malo opkohljati.
A drogarica Dragica mo je rekla:
– Ivane, zašto tako ružno govoriš? Ne kaže se predložem, nego predlažem, ne tjeden, nego tjedan i tako dalje i tako dalje.
A Grintavec ji odgovori:
– Ampok, drogarica, si smo mi domoči i si se razmemo, kaj bomo ve štacunorilji. Konj Češelj je joko dobro loba rital i oni de je on igral navek so pobedilji. Tak je
dobro znal sukljati kaj si ti dišel na jeno strono, a on z lobom na drugo strono.
Te den smo mi za Jadanom naprajlji prvenstvo. Igralji so Doljjončani, Gornji, Črna Pešta i Belji Beč. Koji so zgubilji, te so ispalji. Praf smo mi Gornji igralji protif Črne Pešte. Nam je na golo bil Grintavec. A to so ne bilji provi golji, nego so z jene strone za stativo bilje hlače, a z druge strone Grintafcova bela majica. Konj Češelj je bil som pret Grintafcom i dol je gola. Si š Črne Pešte so počelji skokati, akat tamo, imamo mi kaj za videti. Nega nam jene stative. Grintavec je počel vikati:
– Neje gol! Neje gol! Kaj ne vidite da nam je Štefekova Cveta gola pojela.
Moja Cveta je žvenčila Grintafcovo majico. Jo sem fljetno dobežal i v zodnji, i to posljednji, čas sem z obedvema rokami počel vlječi Grintafcovo majico s Cvetine lampe. Vun je stol još samo jen rokof. Nekak sem jo uspel vun scukati. Majica je prije bila čisto bela kak snek i bila je zapraf onak malo pljehnotosifkasta kak belji pljeh, a ve je bila žočkastozeljena i so z prelami i jen rokof, on za kojega sem jo z lampe vun vljekel, se resporal. Grintavec se prijal za glovo i rekel:
– Ve sem nahrdal kaj tvorec f pormi.
I unda smo počelji Cveto f čerevo boksati i to tak fest kaj je zatuljila, zritnola se i begac.
Mi smo zgubilji, alji so unda bilji finalje. Igralji so oni z Gašparičevoga kota protif Črne Pešte. I več je utakmica bila skoro gotova, culo ti cusravo, nešto zaviče:
– A de so nam krave?
Niti jene krave na vidiko. Se krave so se rezišlje po poljo ilji so odišlje Fojsak. I mi begac krave iskat. Saki svojo kravo zove, alji se nečejo glositi. I dok smo došlji Fojsak, naša Cveta je mirno lježola v grmjo i preživala. A Grintafcova Đunđa je samo zbelno i zbešnjeno gljedala, tuljila je i so je bila nekak pukljava i debela. Mom smo znalji da se mlode rosne detelje najela i da se naduva. Samo je na mesti štrptala. Grintavec velji:
– Ve moramo ž njom begati kaj precera inače se bo respočila.
I mi begac z Đunđom po senokošaj, alji je nikaj ne hasnelo. Počelje so ji pene iti z lampe. Vidlji smo da vrok šolo bere i jo veljim:
– Jo idem po kuma Jožija, oni so skorom kak provi veternor, makar so zapraf ne, i oni se vu to razmejo.
A Grintavec mi velji:
– Kaj unda tu drmiš? Beži po kuma Jožija!
I jo begac. Srel se po poto Grintafcovoga japo, soseda Jondrija, i rekel sem jim da jim se krava Fojsako naduva. A sosed Jondri so reklji sosedi Mari:
– Mara, elj ve vidiš to! Te junec grintavi posrani me bo na nikaj sprajel. Jo se močim kaj Kristoš kaj se f hižo nekov dinar dosmica, a te pekljenski duh mi bo se zarojtal. Zgrabilji so sosed Jondri fljetno becikljina i direkt pravac Fojsak.
Došel sem do kuma Jožija i rekel sem jim kaj se dogodilo. Kum Joži so do penzije delali v Apatino i dok so došlji f penzijo, nazoj so se vrnolji v Međimorje. Oni so navek po gracki govorilji. I oni so zgrabilji becikljina, zelji so si cekera i f ceker so nametelji nekvo meštrijo i ajt Fojsak.
Kaj se pripetilo so čulji i tetec Fronci i oni pravac direkt Fojsak. Reklji so:
– Ako je Jondrijeva Đunđa mojo koruzu zgozila, unda bo platil globo ilji pe v rešt. Dok so kum Joži došlji, reklji so Grintafco:
– Da sam ti ja otac, ja bih tebi pokazao tvojega Boga!
A unda so reklji:
– Vi muškarci primite kravu za rogove i za rep i čvrsto ju držite da vam ne pobegne.
I unda so kravi fpičilji trokera f čerevo i vun je zljetela nekva zeljena ščava i se koji so bilji bljizo je pošpricala. Unda so kravi zaljepilji nekvoga ferbanta i reklji so sosedo Jondrijo:
– Andrija, pozovi sad odmah veterinara i on će da ti kaže šta moraš dalje da radiš!
Dobežalji so i sosed Đuri. Oni so melji zemljo Fojsako. Melji so kaj za videti. Latje je bilo pojeđeno i kuruza zgožena. Počelji so vikati:
– Pok meni so krave pojelje tri metre kuruze! Što bo to meni platil?
Sosed Jondri so reklji Grintafco:
– Samo dok se to prede, boš ti meni splatil! Ti muljec jen neotesani, grintavi!
Jo sem mom znal da bom i jo nadropal dok moja mama to zezna.
Grintafcova Đunđa se čisto oporojla kak da je čisto nikaj ne bilo. Alji sosed Jondri so reklji:
– Ti i Štefek več nigdor ne smete iti s kravomi skupa na pašo na isto mesto. Ak vas jo zahlopim, ti Ivo boš domaj vehje cepal ilji peš z mamom graha brot.
Sosed Jondri so znalji da je Grintafco nejhujše delo vehje cepati i graha brati. I tak smo mi več ne holji skupa na pašo. A kaj se tu more?!
subota, 04.06.2016.
MLATILKA ILJI DREŠ
MLATILKA ILJI DREŠ
Sako ljeto dok smo poželji, voza z žitom smo ne dimo peljalji, nego mom direkt na gmojno de je bila mlatilka ilji, kak so nekoji govorilji, dreš.
To ljeto smo mi melji pšenico f Šloprogo. Zoto kaj je moj japa delal na Grockem pok je ne mogel delati napoljo i zoto kaj smo melji samo jeno kravo, mi smo sopregovalji s sosedom Đurijom i s sosedom Dorom. Tak smo i to ljeto želji na poljo. Sosed Đuri so s kosom želji i na kosi je bila jena debela šiba koja se zove locen. Moja mama i soseda Dora so nabiralje pšenico i vezalje f snope. Jo sem moral zobačiti, sestro Katico paziti i snope f stajico slagati. Nafčil sem se da se po strniščo noge morajo vlječi i unda te ne špeca i unda se ne napičiš.
Moja sestra Katica je još bila mala i neje znola hoditi po strniščo, pok je stolno vikala:
– Mama, mama, mene joko pika!
Stolno se bečala. Unda sem jo jo posel na ponjovo, alji je unda počela bečati da ona na soma. Unda sem ji rekel kaj pe v deteljo ružice brot jerbo je detelja praf precvela. I unda smo išlji nametat voza. Ober dreki smo ponjovo prestralji kaj pšenica koja se zrulji ostone f ponjovi. Nazodnje smo žrt svezalji i ajt na vos. Spupalji smo se na vos i jo i sosed Đuri, a nazodnje smo i Katico poteglji. Krave so bilje nekak samolodne i stolno so grabe zahođalje. I tak smo se dopeljalji do jene veljke grabe i najempot je nekaj skreknolo i zaproščalo i mi ljusk – skupa z vozom smo se prehitilji. Sosed Đuri so viknolji:
– Deca, ve nejpre iščite mojo kapo!
Dobežalji so i ljudi koji so bilji tam na poljo i pitajo soseda:
– Đuri, kaj se pripetilo?
A sosed veljido:
– Am, ročica se ftrgla!
I unda sem jo za jeno roko Katico vljekel pešice, a z drugom rokom sem vojke
scukoval i krave tiral, a sosed Đuri so z rasovami voza držalji i tak smo pomalji išlji. Dopeljalji smo tak voza do gmojne. Tam se joko prošilo od mlatilke. Bilo je joko vroče i ljudi so lježalji pot kolji i čakalji dok dojdejo na ret. Stolno so moralji voza porivovati. Nekoji so več unda melji gumenjoke, a ne drvena kola. To so bilji oni provi gazdi. I tak smo mi pomalji porivovalji našega voza se bljiže i unda je najempot mlatilka stola jerbo se remen ftrgel. Mom so se muški skutilji i saki je nekaj predlagal kaj bi trebalo naprajti kaj bi mlatilka nazoj predelala. Remena so nekak složilji, alji unda se nekaj pošemerilo na traktoro i celji den so ga poprovljalji. Rokek z Dolnjega kraja se joko napil i stolno je nekaj palamudil:
– Dejte ve ovak, dejte ve onak! To je tak ne dobro!
Sosed Đuri so se nekaj razmelji f traktor, pok so i oni nekaj poprovljalji, alji Rokek je i dalje palamudil. I unda so se sosed Đuri tak resrdilji kaj so Rokeka zobačama tak poteglji kaj je skeknol i reklji so mo po gracki:
– Budala jedna pijana! Nemoj ti meni predavati konjsko pismo kako se traktor popravlja.
I traktor je predelal, a jo veljim sosedo Đurijo:
– Sosed Đuri, to ste ne dobro poprajlji jerbo traktor stolno pomalji šči. Voda se sceđa z one kiblje.
A unda so se sosed Đuri i no me resrdilji pok so reklji:
– Štefo, ak naš tiho i tebe bom potegel zobačami kak i Rokeka!
Ljudi so se počelji svaditi što je za kem došel i što je prije na redo. Jenomo čoveko so i voza prehitilji jerbo je bil bezobrazen kak prasec praseči. I konačno smo i mi bilji na redo. Stric Ivi so s kol na dreš snope hitalji, mama je bila na drešo i pojose ot snopi je rezala i podovala, sosed Đuri so bilji pre vreči de je pšenica curela, soseda Dora i soseda Bora so slamo othitovalje i hitalje na kola na kojima so sosed Donči voza slagalji. Jo sem zobačami pljeve zobačil.
Dok smo došlji dimo, mama je bila joko srečna jerbo smo dobilji puno pšenice makar smo i voza prehitilji. Poslala me je f štacun kaj donesem pol kilje jegera i jeno pivo, a sebi sem smel kupiti jeno veljko mošnjico karamelji.
subota, 28.05.2016.
SOSED DONČI SO VU VOPELNICO DOLJETELJI
SOSED DONČI SO VU VOPELNICO
DOLJETELJI
Sosed Donči i njiva žena, soseda Bora, so živelji na jen drugi nočin nek drugi. Sosed Donči so joko puno čitalji sakefeljejočke knjige i unda so rado o temo povedalji. Bilji so kušten čovek, alji, z druge strone, i smešen jerbo so se somi štelji sprobati.
Tak smo jo i Grintavec bilji pre sosedo Dončijo i pitalji smo njis:
– Sosed Donči, a kaj ve ljepoga čitate?
A sosed Donči so reklji:
– Deca, ve vam čitam kak so f stori Grčki jen jotec i sin ljetelji po zroko s perjem koje so si somi naprajlji i svezalji, i ljetelji so dogo i joko visoko. A Grintavec zapita:
– A zakaj se to zove stora Grčka, a ne samo Grčka?
A sosed Donči veljido:
– Zoto, deca, kaj je potlji bila normalna Grčka, isto kak je pri nas bila stora
Jugoslavija, a ve je normalna Jugoslavija.
A unda so sosed Donči reklji:
– Ve vam bom rekel jeno svojo tajno, alji ne smete to nikomo reči. Jo vam bom, deca, isto tak poljetel kak i jotec i sin f stori Grčki. Alji nemam dost goskini krilji. Ve pete vi po selji i probajte mi nabajti goskina krila kaj bom mogel poljeteti.
Tak smo jo i Grintavec išlji ot hiže do hiže i reklji smo da nas je mama poslala kaj nam dodo goskino krilo s perjem jerbo je to mami treba kaj bo meljo kaj ji ostone na deski na koji mesi mogla f kibljo nazoj pomesti.
Bilji smo pre teci Malči, vujni Franci, strini Joni, sosedi Dori, kumi Ljubi i kumi Ruži. Skoro sigdi smo dobilji goskino krilo s perjem jerbo se te žene imajo goske. So to krila i perje smo odneslji sosedo Dončijo. Sosed Donči so se to skupa sprelajtrilji i ot sega toga so nastala dvo veljka krila. To krila so si sosed Donči sprevezalji na roke i reklji so nam:
– Deca, ve vam bom jo poljetel. Ak me dogo na dimo, rečite moji ženi Bori da sem odljetel f Podravino i da s Podravine s cugom dojdem dimo jerbo sem si zel i peneze za cuk.
I unda so si doneslji lojtro i po lojtri so odišlji na krof ober porme i po čerepo na kukmo. Dok so bilji na kukmi, unda so s kriljima počelji mohati i zgljedalji so kak stori anjgel. I unda so se samo odrinolji i poljetelji. Culo ti cusravo, znogla so zapikeralji prema dolji i doljetelji so vu vopelnico koja je bila jeno pet metri ot porme. Pret por dni so sosed Donči vopno gasilji i vopno je bilo još mefko tak da so prepalji vu vopno do vrota. Vuni so jim bilji samo glova i roke s perjem. Unda so nam viknolji:
– Deca, donesite zobače i zvlječite me vun!
Jo i Grintavec smo doneslji zobače i zvločilji smo soseda Dončija vun z vopelnice.
Dok smo ji vun zvljeklji, sosed Donči so bilji se belji od vopna i zgljedalji so kak stori anjgel koj je vu vopno opal. A jo njis zapitam:
– A kaje sosed Donči? Reklji ste da bote f Podravino odljetelji!
A sosed Donči so prekljelji:
– Vrok ti mater! Zgljeda da sem malo predebelji. Mora mi malo brenka splahnoti. A i perje kaj ste mi doneslji je bilo prestoro i preveč suho. Mora biti perje od mlodi gosek.
Vutemtoga so došlji vun s hiže i soseda Bora. Prijalji so se za glovo i viknolji:
– Hrbudljin jen stori! Čisto si ponorel! Kaj si pok ve naprajel?
A sosed Donči so reklji:
– Dej bodi stiha, Bora! Imaš srečo kaj sem ne f Podravino odljetel jerbo bi ti unda morala kravom jesti dati, krave napojiti i korzinje naseči. A ve bom to, kak i saki den, jo naprajel.
subota, 21.05.2016.
FTOPLJAL SEM SE
FTOPLJAL SEM SE
Mi smo se holji kopat v Bloce, k Meljinima, f Storo šumo i na Krče. Dok sem još bil malji, unda sem se hodal kopat v Bloce. Bloce so jen rokof ot Drove i voda je ne joko glaboka. Tam je z nami puno pot bil Francek s Prekmostja i on je ne bil baš po provem i neje mogel čisto zgovorjati reči. Mel je sestro Marico, a i to Marica je bila nikot nikam. Bilji so bokci. Marica je bila joko mala i Francek ji je navek govoril „nata Trotka“. A štel je zapraf reči „naša Krotka“. Zoto kaj je bila mala, zvolji so jo Krotka.
Francek se ne kopal, nego sje samo noge namakal i gljedal je pucke. Znal je reči: – Ti imat tak malo rit kak nata Trotka.
V Bloce je f nedeljo hodal i stric Ivi i to samo zoto kaj je pazil na svojega sina Franceka kojega so si zvolji Aci. Aci se vu to vreme vučil plavati kak i mi drugi. Stric Ivi je begal po brego i stolno je Acijo nekaj komanderal kaj se na ftopil. Vikal mo je:
– Aci, Aci, muljec jen! Kam te vrok to nese? Kaj ne vidiš da je tam tunja?
Dok sem več por metrof znal po pesji plavati, unda sem se hodal kopat k Meljinima. Tam je glavni bil Bači. On je potlji završil pravoslavnoga fakolteta, a to se skračeno velji pravo. I postal je sodec, alji ne nogometni. On je nas malje pazil kaj se namo ftopilji. Mi smo se hitalji s kompa od meljina i po pesji pravac direkt k brego. Por pot si zamohnol i več si se mogel stati.
K Meljinima se znal dojti kopat i sladoljedor Fadel. On je ne znal plavati. Jempot so ga dečki namigalji kaj skoči s kompa i kaj bo zrokami samo mohal i bo preplaval. Fadel je skočil, alji je počel piti i malo je potonol pok je malo vun z vode zišel. Počel je vikati:
– Bači, Bači, spasi me!
A Bači mo vikne:
– Bom te spasil, ak nam sem podeljiš puno kibljo sladoljeda, i to zabadaf!
A Fadel mo vikne:
– Donesem!
A Bači njemo:
– Ne jeno, nego dve kiblje!
A Fadel njemo vikne:
– More dve, samo skoči po me!
Bači je skočil i zvljekel ga vun. Si smo se sladoljeda tak najeli kaj smo skoro rigalji. Mi smo melji šibo posađeno, i to v Meki. So šiba je zarosla z veljkem dračom – s partizanom, z osetom, z dremljavicom i drač je bil tak visoki kaj smo šibo ne moglji kopati, nego je trebalo nejpre drača spljeti i stopram unda se mogla šiba kopati. Mama je pljela, a jo sem drača vun nosil k krajo. Več mje bilo tak vroče kaj sem bil se moker kaj spirek. I meni pone na pamet jedna dobra ideja. Drova mje tu pod nosom, a meni je tak fest vroče i močim se kak Kristoš, i veljim mami:
– Mama, jo sem joko žejen. Jo idem k Drovi vodo pit.
A mama mi velji:
– Pok imaš vodo v bacono!
A jo ji veljim:
– Je mama, alji to voda je več tak topla kaj scaljina. Ak bom to vodo pil, bom dobil proljeva.
I mama mje rekla nek idem, alji da sem mom nazoj.
I jo begac. Zagozim se jo v Drovo i gozim i gozim, i voda mje stopram do popka. I veljim jo som sebi:
– Štefo, ve samo gazi dok ti bo voda do vrota i unda se hiti i plovaj samo k brego!
Tak je i bilo. Alji voda me počela dolji nesti. Probam stati, alji nemrem. Mošem jo po pesji i misljim si, ve se bom ftopil i to mje Božja kazna zoto kaj sem mami zlagal. I tak sem sigurno zgljedal kak sladoljedor Fadel. Malo sem bil pod vodom, malo sem bil ober vode. Da je ve bor Bači tu, misljim si jo, i več sem si joko puno vode spil i brehal sem i zahljikoval sem se i negda teda sem se uspel stati. Se mi se motalo i ljegel sem si na breg i joko fest sem brehal. Dok sem se malo opkohljal, odišel sem k mami, a mama mi velji:
– Štefo, kaj si tak bljedi kak stena?
A jo ji veljim:
– Mama, idemo dimo, mene joko glova bolji i slabo mje!
Tak smo se sprajlji i pravac dimo. Večer sem dvopot zmoljil Anđelje čuvaru milji jerbo sem bil siguren da me je samo moj anjgel čuvor spasil kaj sem se zapraf ne ftopil v Drovi.
subota, 14.05.2016.
ZARON SMO KURUZO PORALJI
ZARON SMO KURUZO PORALJI
Makar sem bil još joko malji, moral sem z mamom iti v jutro prije školje kuruzo porat. Mama je rekla da je potlji joko vroče i da so obadi i unda je krava samolodna. Mi smo melji Cveto, a jo sem joko štel kaj bi se zvola Đunđa kak i od Grintafca, alji je to mama ne štela.
V jutro rano smo se stalji, mama mje skuhala belo kovo i nuter sem si koruznoga kruha nadrobil, pojel sem to onak posponi i ajt porat. Na kola smo hitilji pljuga paroča, zapreglji Cveto i ajt napolje. Znalo mje biti zima i mama me zamotala na kolji s štolnem gunjom ilji s ploftom.
Peljalji smo se kre zemlje vujca Rokija i vujne France. Oni so več poralji. Melji so kravo koja se zvola Manca. Mama jim velji:
– Bok dej tetec!
A tetec ji veljido:
– O, Trezo, kaj i vi idete v borbo?
A mama pita teca:
– F kakvo borbo?
A tetec veljido:
– Jo se celo vreme borim i z Mancom i z Francom! Nikak mi kravo ne tira. Kot Manca, tot Franca! Pol betvi kuruze sem vun sporal!
I tak smo se i mi hapilji. Jo sem bil bos i bilo mje ljepo dok sem išel po redima koje smo več sporalji, a po gruđjo me joko špecalo. Dok so mi noge bilje več joko žareče, unda sem potegel z nogom po betvi kuruze jerbo je betva bila rosna i mom mje bilo lježi. Ot kraja je Cveta bila posljušna i ljepo je išla, alji dok so jo počelji obadi napodati, unda je počela noreti. Žurila se i moral sem jo po gopco z bičom čehati dok smo došlji na kraj zemlje kaj mi ne pobegne k kolji. Jo sem ji ljepo milostivo govoril:
– Ajde Cveta, samo pomalji. Išče tripot gori-dolji i pemo dimo.
Alji Cveta je bila se hujša. Mama vikne:
– Dej tiraj kak spoda ilji bom s tem bičom potegla i tebe i Cveto! Kaj ne vidiš da bo so kuruzo stoncala. Z jenom nogom ti gozi jenoga reda, a z drugom drugoga. Nazodnje sem jo moral čehati i z lancom cukati. Išče smo melji samo vroti sporati i unda dimo. Akat tamo, to prasica Cveta, dok smo se na vrotima bračalji, stola mje na nogo. Se zvezde sem videl i viknol sem:
– Mama, Cveta mje nogo prek pretrgla i od ve bom plantavi!
I unda sem jo počel tak čehati i f čerevo boksati i z zdravom nogom ritati kaj je zarožđila i skupa s pljugom pobegla na ljucko zemljo tak kaj jo je mama komaj zastojla. Mama je ne bila no me srdita. Samo mje nogo z gunjom na kolji zamotala i rekla: – Dok dojdemo dimo, namožem ti kosano moščo na kruh i gori ljuka i dok to se poješ, bo ti i noga prešla.
Cveta je tak s kolji ljetela dimo kaj eroplon, pok jo je mama morala celo vreme scukovati i vikati:
– Heha Cveta, heha Cveta!
Dok sem išel f školo, kak i saki den, išel sem po Grintafca. On je bil se krmežljivi i posponi, a jo mo veljim:
– Pok kaj vi nemate domaj zrcalo? Si se pogljedal kak zgljediš? Tak zgljediš kak da si se s pozderja stal, a mi smo več sporalji jeno mekoto dok si ti hajo-pujo.
subota, 07.05.2016.
KANJE, POZOJI, POSVEČORI
KANJE, POZOJI, POSVEČORI
Negda je bila skoro pret sakom hižom drvena klopica de so se ljudi na večer shođalji i spominalji. To je mej bilo joko ljepo jerbo smo i mi deca kajkaj toga čulji. Nejveč ljudi je bilo pret hižom soseda Đurija i sosede Dore. Jo i Grintavec smo se nejpre z drugom decom igralji nagonoče, ilji tu sem ti na grodo, ilji smo se pincekovalji, ilji za škednjom činjkalji, ilji ajncalji ak smo melji kaj drobni penes. Deklje so se igralje graničare ilji neka puca-neka puca. Dok se več malo bolje skmičilo, unda smo se igralji skrivoče. Dok je več bila trda noč, unda smo si selji pret klopico na trovo i posljušalji kaj se stareši menijo. Ak so se menilji nekaj kaj nam je bilo dosadno, unda smo dišlji dimo. Alji nejljepše je bilo dok so sosed Donči počelji povedati priče. Si smo ji joko posljušalji i vuha smo melji gori. Oni so navek povedalji o kanjama, pozojima i posvečorima.
Reklji so da potlji pol noč kanje ido z grmja vun i joko so opasne. Za ljudima bežido i ak je čovek ne fljeten, unda ga hmorido. Saka kanja ima več glovi i saka glova te navohne kam se gojt skriješ. Znodo dojti i f hižo.
Nejmenje opasni so posvečori. Oni nedo nigdor bljizo ljudi, alji so navek tu. Ako nešče ide kesno dimo od nekod, on vidi posvečora koj z lampašom sveti i proti čoveka. Posvečor je dalko ot čoveka, alji ga čovek vidi. Posvečor more joko fljetno bežati i najempot je pret tebom, pok je za tebom, pok je sa strone i unda, tak vedljido sosed Donči, samo treba mirno iti dalje, ne je vobiti i celo vreme Boga moljiti i unda srečno dojdeš dimo.
Joko so opasni pozoji. Pozoji dojdejo v noči f hižo i unda jošejo ljude i ne dajo jim spati. Pozoj si sede v noči na tebe i zajoše te i gnjete te i ne da ti dihati. Alji sosed Donči veljido da se čovek ne sme predati. Saki čovek bi trebal meti pod zglovjem noža kranjčeca i dok pozoj dojde, noža otprati i z nožom mohati – pozoj unda som ot sebe nestane.
Jo sem spol na otomano i od unda dok so to sosed Donči povedalji, sako večer sem mel pod zglovjem noža kranjčeca, alji, fola Bogo, pozoji so me ne došlji jahat. I unda sem potlji ne mel več kranjčeca pot zglovjem.
Denes so ti pozoji, posvečori i kanje izumrlji i jedostavno njis nega. A i ljudi so klopice resteplji i si samo domaj gljedido teljevizora. I ve je več ne tak ljepo kak je bilo dok so na životo bilji pozoji, posvečori i kanje.
subota, 30.04.2016.
Kak smo jo i Grintavec palji s krova
KAK SMO JO I GRINTAVEC PALJI S KROVA
Saki petek je v našem selji bilo kino. Filme je prikazival Luka z Ljudbrega. Por vur prije filma je prek zvučnikof puščal meksikonske pesme, a unda je počelo kino. Jo i Grintavec smo več por pot štelji pobeči čez vrota nuter, alji nas je Luka saki pot opazil i natiral. Tak smo jempot skoristilji priljiko dok je Luka bil s hrptom obrnjeni ot vrot jerbo se z nekem čovekom spominal. Jo i Grintavec smo fljetno otpralji vrota i zapičilji smo se f salo, zmešalji smo se med ljude i Luka nas je več ne mogel nojti. Film je bil joko ljepi, provi američki i to s kaubojima. Slova so tak brzo na zido begala kaj smo mi to ne moglji prečitati pok smo samo bes čitanja gljedalji filma. Kauboji so se streljalji, jahalji so na provima konjima i po krovima so se plazilji.
To je meni i Grintafco dolo idejo kaj bomo i mi to probalji. Kre naše hiže so brojde ot trsa i jo i Grintavec smo se splazilji na trs, a s trsa na krof naše hiže. Malo smo se škljizalji jerbo je na čerepo bil mehenj. Alji krof je ne bil joko strmni pok smo se nekak doplazilji, kak provi kauboji, do kukme. Selji smo si na kukmo krova. Jena noga nam je bila z jene strone krova, a druga z druge jerbo smo kukmo zajahalji. Dolji smo gljedalji ljude koji so se na polje peljalji i mohalji smo jim. Si so zijalji na nas:
– Bote najempot išlji dolji!
Alji mi smo bilji kaj provi kauboji, zdeni kaj špricer i ničega nas je ne bilo stroh. Najempot je počelo nekaj zujati, a to so bilje jose. Dok smo se plazilji na kukmo, obrinolji smo jim dolji josinjaka i ve so nas napalje. Počelji smo kormoniti z rokami, alji bilo njis je se več. Grintavec velji:
– Štefo, ve smo gotovi. Jose nas bodo zopklalje.
Kak smo kormonilji z rokami, tak smo zgubilji ravnotežo i počelji smo se koturati dolji z krova. Fola Bogo kaj smo ne palji na pot, nego na grunt. Dokuturalji smo se encvaj do brojdi i nekak smo se zgrabilji za šibe ot trsa i nesmo fest palji, a jo sem misljil da si bom kičmo ftrgel. Malo smo si samo lakte i koljena zoguljilji. Grintavec mi velji:
– Štefo, jo drugi pot bes pištolja nem na krof. Da smo melji pištolje kak provi kauboji, moglji smo se jose postreljati.
Drugi den dok sem došel s školje, mama mje za obed dola zdruzganoga kalampera i kiselo zelje. Dok sem se najel, velji mi mama:
– Štefo, došlji so te teca gljet! A jo pitam:
– Mama, a de so teca?
A mama velji:
– Za lomorom!
Jo se nasmejem, onak smešno, i veljim: – Pok kak teca morejo vljesti za lomor?
A mama mi velji:
– Morejo, morejo! To je teca šiba.
I žuk pok žuk pok žuk. Tak sem fasoval kak ima biti. Rožđim se i pitam mamo:
– Zakaj si me ve zbila?
A mama mi velji:
– Pitaj strino Jono i strica Ivija kojima si mohal z krova!
A jo veljim:
– Pok tak se po krovo plozijo i kauboji na filmo. Zakaj se oni smedo plaziti, a jo ne? A unda sem još dobil šibom repete zoto kaj sem bil f kini.
Oznake: o meni, o mojim pajdošima i kajkaj toga drugoga
