geomir

OSMARTNICA

Ovo djelo je slika stvarne prošlosti.
Svaka sličnost sa stvarnim osobama i događajima je namjerna.
Kliknuti na link i slušati originalni izgovor teksta

Aktiviraj link i prati napisani tekst


Ovih don kad se čulo i vidilo po radiju i po televiziji martvašku mužiku,
breconje zvuon i pope kako molidu za ispratit u pokuoj višnji
stori, obišni televizijski sinjol ča je živi 53 godišćo, a umor je,
jerbo ga je zadovi novi digitalni sinjol, ano domini 2010,
Forani i Bročani spomienili su se da ni baš tako kataklizmički zazvonila
osmartnica ča je prin 25 godišć izošla u Pometu,
s kojuon son objovi smart Jadrolinijine brodske pruge 603
koja je godišćima bila pupak ča je veživo ta dvo naša škoja
jedon s drugin i sa Spliton.
(„ča je pusta Luondra kuontra Splitu grodu“ kako se tuo kanto u pismi).



U osmartnici je pisalo:

„Slomjena sarca javijemo pritužnu i guorku vist da je danas,
dona 30. šetienbra 1984. posli daleke i tieške bolesti
ispustila svoju plemenitu dušu Jadrolinijina pruga 603
SPLIT-SUTIVON-BOBOVIŠĆE-MILNO-BUOL-JIESA-VARBUOSKA i nose.
Pokuojnica je još u vrime čorno-žute krajevine počiela vozit jude i robu
ča je nastavila činit na tuoj ruti i posli parvie gvere,
bez pristonka, svakega rabotnika i tako bila spona meju namin
i glavni divertimenat generacijima malomišćanskega svita Broča i Fora,
a zonjih godišć vikendašima i bruojnin turistima.





Drogo pokuojnica biće ispraćena tužnin fišćotima broda Porozina.
Njezin svitli lik ostaće non zauvik u lipoj uspomeni.
Neka jon je vična slava i fola!
Duboko ožalošćeni:
Sutivjani, Bobovišćani, Milnarani, Boljani, Ješani i Varbuovjani
s Jadrolinijinin agientima kako i mnogobruojna vikendaška i turistiška svuojta.“




Ko ča isprid tv digitalnega sinjola, kako smo rekli, nestaje obišni sinjol, tako su i
Jadrolinijini brodi tipa „Porozina“ „Pašman“ „Takovo“ „Valjevo“, „Ohrid“ i drugi
nestali isprid trajektih ča moredu ukarcat ne somo veći bruoj putnikih,
nego i veliki bruoj autih i kamionih karcatih puston robon i materijolima.

Kad su čitali tu osmartnicu Forani i Bročani
(oliti Bročani i Forani, kako se iz kojega kantuna gledo)
nisu mogli, a da se ne spomienedu i vaporih na garbun
ča su zaminili braciere i trabakule.




Dočekovonje vapuora je bila poslastica.
Tuo je bi dogođaj koji se ni smi propusti, jerbo uvik se moglo vidit ništo novo.
Gledolo se kako kuštoje, strohovolo da ne pukne cima, a uvik se atiento
i kurijužo pratilo kuo je sve duošo dok su se putnici iskarcovali priko skale.



Vinć je škripo dok je uz riči „vira“ i „majna“ dizo robu iz stive broda
i kalovo je na rivu di su fakini sa karima, a posli i s traktorima,
ča su zaminili kare, raznosili robu po butigima ili već za koga je tuo bilo naručeno.
Posli njih su duošli moderniji motuorni brodi,
ča su bili žveltiji i bez parvie i druge klaše kako su tuo prin bile na vapuorima.

Mlaji, ča sad putujedu trajektima ala „Tin Ujević“ „Marjan“ „Hektorović“,
a i katamaranima i gliserima, moredu doznat iz ovie osmartnice
ne somo kako su putovoli njihovi stariji,
nego i koliko jin je vridila ova brodska veza koja in je kuštovala isprid kuće
i dobotu nikad se ni dogodilo da radi grubega vrimena ni bilo partience.



I žunta od mojie bonde.

Kako ča smo čuli u Osmartnici, pruga 603, na ruti: Split-Varbuoska-Split
je upokojena, jerbo je Broču i Foru narieso apetit u svakon pogliedu,
a ča pruga 603 već ni mogla dat.
Broč je dobi glavnu štaciju u Supetar, a For u Pajiz,
di su sad dohodili trajekti koji su privozili ne somo čejad
nego i auta svih vorstih ča prijašnji brodi nisu mogli.
Ti brodi rojeni 50-tih, 60-tih su isto tako upokojeni,
izriženi i prodoni kako storo gvožje.





Ostali su živi, Postira i Premuda i još dondanas trafikodu,
jedon na roti Dubrovnik – Elafiti, a drugi Moli Lošinj, Srakane, Unije, Susak.

Anke, od Zadra do Preko vozi Lara, a od Šibenika do Vodica bruod Tijat.

Jadrolinija, govori, imo voju izgrodit Novo Postira somo se nezno ka`će.


Autor: Dinko Matković
Autorov blog: Insulano

Prošti: Geomir
Fotografije: Geomir (1., 3., 4., 7. s neta))


Manje poznate riči:

martvašku = mrtvačku
zadovi = zadavio
veživo = vezivao
daleke i tieške = duge i teške
svakega rabotnika = svakog radnog dana
tužnin fišćotima = tužnim zvižducima
svuojta = rodbina
garbun = ugljen
braciere i trabakuli = nazivi drvenih brodova
vapuor = parabrod
kuštoje = pristaje
cima = konop za privez broda
atiento = pažljivo
kurijožo = znatiželjno
vinć = dizalica s vitlom
vira - majna = diži - spuštaj
iz stive = iz utrobe broda
kalovo = spuštao
fakini = obalni radnici
karima = kolima na ručni pogon
po butigima = po trgovinama
žveltiji = brži
kuštovala = pristajala
dobotu = umalo, skoro
žunta od mojie bonde = moj dodatak