Avion je stiga točno u dvi ure. Bigmamma i njen junior su dogibali do one trake ča vrti kufere. Pripoznali smo se oma iako se nikad u životu prije nismo uživo sreli. Mali je oma bacija prvu minu… mama tufer, mama tufer… ma nije sine tufer nego kufer i ne sramoti me prid svitom odgovori mu bigmamma. He… junior mi je oma lega, bezrezervno.
Cilim putem do Splita nam je lila kiša ka iz kabla ali nam to nije pokvarilo raspoloženje.
U mene doma je bilo veselo samo tako. Troje dice i pas u punom naletu veselja. Kiša mi je pokvarila gušt gradelavanja pa smo opalili rezervnu varijantu, lešo ribica i hobotnica pod pekom. Popili smo po žmul vina i nazdravili. Kako mi je i žena bila doma, njih dvi su se skompale u minut i parilo mi se ka da sam višak. Je, kad se dvi ča moredu govorit spoje to je mirakul. Ma bilo mi jih je gušt slušat kako se smiju, kako su pune radosti, ali san isto uteka malo u stranu kad su počele priče o porodu i o i o i o e…
Brzo je doletilo 5 uri i otišli smo do našeg šjor skroz-a. Uletili smo mu u kuću ka tornado, bigmamma, junior, moja galebica i ja, onako grlati i bučni kakve nas je Bog da.
Skroz i njegova gospoja su nas dočekali domaćinski, srdačno. Oma smo nazdravili s bićerinom i kako je loza s kojom san ja nazdrvija bila ka likarija, nastavija san tako nazdravjat još uru i po. Pala je dobra zajebancija, smijali smo se i razgovarali lipo u veselju. Junior je isto bija u elementu, skinija se i svojim bravurama onako dava svoj dičiji začin atmosferi.
E tu san se sitija da bi vajalo napravit koju sliku i evo nas, bigmamma i galeb u tinelu našeg skroz-a…
Ma i tu nan je vrime uteklo i tribalo jih je vodit na trajekt. Kad san ih ispratija čutija san se ka da mi je negdi otiša rod rođeni. U tih par sati koje smo proveli skupa parilo mi se ka da se znamo 100 godina.
I zamisto da odemo doma, moja premila polovica i ja smo odgibali do kumova. Taman dva semafora prije nego smo stigli do njih zove kum i pita di san i jesan li za bluziju.
Kako to izgleda kad nas dva slušamo blues ovjekovječila je moja draga…
Popija san pive 1,2,3,4… , ajmeeee srmota a jutros, bolila glava u 3PM. Ali nema odmora dok traje obnova. Danas smo čoporativno s kumovima otišli u Soviće u šoping. Nakupovali pizdarija i poklona za Božić i na kraju završili u Klis na janjetinu. Evo sad smo se vratili doma i jeba me pas ako više mogu gledat na oči. Gren pod tuš i oma u posteju.
Zdravi i veseli bili.
Ps.
Za sve one ča bi tili vidit više slika nek se strpe dok se bigmamma ne vrati jerbo je ona sve slikavala.
|
