Cili četvrtak i petak u Splitu je padala takva kiša da se parilo ka da je nebo palo na zemlju. Promet po Splitu , kad učini otakvo vrime, postane živa katastrofa. Tonobili se rumbajedu, vozači bogaju i beštimaju jedni na druge...Petaju roge jedan drugome kroz ponistre o svojih auti...Pješaci skaćedu priko lokvi ka klokani a vitar jin izokreće lumbrele i nosi kapeline. Bujice vode slivadu se nizbrdo a šahte ne moredu popit toliku vodurinu pa cili grad popliva. Ajme majko...koja ludnica nastane...Jedino dica, ka i uvik kad je nika dežgracija - guštadu i trčidu uokolo ka muve bez glave - mokri s knjigan o skule na kostima u ruksacima koji su se napunili kiše pa su protapanjali...tako da iz svakoga curi ka niki minjaturni slap...ili se pari da se te knjige stalno pišaju po leđima od naših pućkoškolaca.
A za pegulu, mala mi je uvatila niku priladu. Triba je vodit u ambulantu po ricetu. Živi kažin...! Vozi stalno gori - doli. Na Bačvice u SDP.... pa doma na Pujanke..pa u ambulantu...tako skoro do na Skalice.... kraj Vicka...a sve brišući rukavon o jakete stakla koja se stalno maglidu iznutra...u autu. Još mi ne radi livi žmigavac...a auto trokira i kašje ka da se i ono razbolilo. Ubila ga ova amazonska vlaga i kišurina koja se prosula na moj bidni Split.
Popodne dolazi dotur Željko Jovanović, Davorko Vidović i naš dobri Duško Plećaš...najboji tajnik esdepeja - svih vrimena....Bit će ka nika tribina i instruktaža o socijalnoj politici, zdravstvu i potribama starije ćejadi o kojoj SDP triba brinut i metnit to u svoje programe za lokalne izbore....šta će, naravski, sve tribat kasnije i provest u praksu.
A narod se ionako nabrusija na ovega Milinovića ča je navalija na sirotinju i na mali svit...a najskoli na penšjunate - sa novin nametima i haračima...ka niki ajduk i arambaša - a ne njiov ministar o zdravja.
Judi se vataju za glavu.
Ma ča mu je ?
Oli je popizdija ?
Ma di on živi ?
I sve tako....
Navećer dolazi i Zoran...naš prišidente o Stranke, jer u subotu gre na osnivanje esdepeja u Otoku kraj Sinja...okle je i Norac...a poza tin gre i u Trilj na esdepejsku Konvenciju, jerbo nan je, nažalost, prišidente tamo umrija...pa triba izabrat novega. Bog mu da pokoj..rekli bidu naši stari !
I tako u toj gunguli...ko će drugi na moja vrata vengo šjora File.
Marinko moj...vodi me na tu vašu tribinu o socijalnoj politici..jerbo jeman ja puno tega za reč ! Nek se i moja čuje...!
Ma di će te, šjora File - po ovoj neveri...Tribali bi gondulon a ne auton vozit do na Bačvice.
Ako triba gren ja i sa sandolinon. Samo ti mene vodi.
Ma uvatit će te koju bolešćinu. Svu će Vas probit ova kiša i vitar. Past čete sutra u posteju, Neću vas ja jemat na savisti, e...!
Ma slušaj ti, čeprguzu jedan - jema da me vodiš i basta ! Evo se gren ja spremit za poć.
Ma di će te...!
To Van je tek popodne...Nima priše !
Aj dobro....Ma da me nisi privarija !
Neću...odgovorin joj ja...a sve mislin šta bi izventa da je nikako urazumin da ne izlazi iz kuće po ovemu vrimenu.
Jušto uto naleti joj sin i ja ga brže - boje uvatin sa strane, da nas ona ne ćuje...i lipo čoviku objasnin kako mu je mater navalila za poć na esdepesjku tribinu - a mene je straj da se ne razboli po ovakemu vrimenu i da je najbolje da stoji s miron - doma.
Ništa ti ne brigaj - znan ja kako ću s njoj izać na kraj...lipo mi odgovori čovik... i mi se pozdravimo a ja odem nazad u Stranku.
Jušto u to stiga je Vidović a poza njin i Jovanović...Bidni, cili su se išempjali vozeći po ovon vrimenu lipo iz Zagreba...i to svaki sa svojin auton...jerbo dotur Željko triba odma noćas nazad u Riku a Davorko u Zagreb. Čekadu ji novi stranački posli.
I dok smo tako sidili i čakulali u moju kancelariju...zazvoni telefon.
Zove sin od šjore File.....
Nikako je uspija nagovorit da ostane doma - ma ona oče reč svoju ovako priko telefona.
Aj, daj je....
Jesi li ti Marinko?
Jesan, jesan...šjora File !
A lipo si me zajeba...Nagovorija si ovega mojega tukca da me ostavi doma jerbo da se ka puno briga za moje zdravje....E ko te ne zna...kupija bi te za po šolda !
Dobro, dobra..A ča mi oćete reć ?
Da ča ? A svašta ! U zanje vrime samo priko telefona s tobon se more razgovarat...Neš ti face ?
Pa nisan ja kriv šta ste me nikidan zvali u Zagreb telefonon...
A da su čin ću..? Su peglon ? Ola ludonje !
Ajde recite..recite višje...
A ča si tako nervožast. Evo ti izbori kucadu na vrata. Tribaš jemat malo više pacijence su biračima, jesi li me čuja...! Još ja ne znan kome ču dat svoj glas. e...!
A ja san čuja da ćete ga dat hadezeju !
Ma ko ti je to reka...jezik mu, dabogda, usa ! Prin bi krepala vengo za nji glasovala...!
Ajme meni...nemojte tako žestoko...i grezo !
Ma ča nemoj...! Ja san i otila doć doli do u Vas na tu tribinu da rečen tin tvojin zastupnicima da opauče onoga Milinovića tako - da mu se sve zavrti u onoj njegovoj tintari...Čula san ja ča je on danas reka..Čula san ga ja dobro !
A ča ste to čuli ?
Lipo je reka da on nima ča slušat vas esdepejce oko ote reforme o zdravja - jer da ste vi izgubili izbore...i po njemu su grajani tako rekli svoju..I finito ! Nima više...ni pitanji ni odgovora..!
Ma kako to ?
E, a tako - lipo ! On je na pinku drugovačiji način reka ono ča van je drito u čunku sasuja i Sanader u Saboru. Da on odgovara samo svojin glasačin i nikomu više...A sad je ovi tudum o ministra to samo ponovija ! Ma zamisli ti koji su to judi...Oni mislidu da je to vlada samo za hadezejce i njiove glasače. A za druge ništa ! Sanader onda i nije naš prišidente...Nije on prišidente sviju građani - vengo samo od svojih glasača i članov njegove stranke ! Ma di to jema ? A sad ovi to ka papiga ponavlja !
Je..tu ste u pravu !
A ča jin onda dajete reta i pružate jin ruku kad jin je o potribe ? Onda vas zovedu upomoć. Ka..Ajmo sad svi skupa kontra kriminala i kontra mafije ! Ka da je ta mafija pala s neba...? A kad jin štokod kažete, recimo o zdravju - onda ča ? Ča se desi ? A ništa ! Onda vas opauče meju oči. Ko vas šljivi esdepejski lapani...Tribate nan samo kad mi to očemo. Samo za zamličit oči Evropi i za ništa drugo....
Paaaa....
E papaji ti koliko oš, Marinko moj...Ma je to tako. Eto je ovi Milinović reka da nima on ća su vama raspravjat jerbo su izbori završili. Ma dojde mi za poludit..kad vidin ko nas to vodi ! Ma di je to živilo do sad ? Ko ji je to svitova da se dilidu od naroda i da nas stalno zajebajedu...?
To su oni sami izventali iz svojih glava...!
Lipe glave..nima ča ? Oti Milinović prvo je reka da triba ukinit onu participaciju od petnajst kun...jer da je to, ka, bila greška...falinga. A sad je ukinija to svoje ukidanje...i opaučija nas još žešće po žepu ! I to mu je ta reforma o zdravstva....Ma zamisli ti ludonje !
Eto...sve ću to prinit Željku i Davorku šjora File ...ma sad moram fermat čakulat jerbo jeman još puno tega učinit za ovu tribinu !
Tija bi se ti mene liberat ča prije a ..Znan te ja tico..
Ma nije...
Aj dobro, dobro...ne traži sada skužu...kako bi mi začepija justa...Rekla san ti ča san jemala a sad ću vidit ča će te vi učinit od svega tega - pa ću onda razmislit oču li joli neću glasovat za vas.
Samo Vi razmislite...Ali tija bi vas na kraju ništo pitat. Prvo ste meni rekli da san ludonja pa ste poza tin i za Milinovića rekli da je ludonja...Pa ko je onda ovde lud ?
Lud je narod koji viruje ludonjama !
|
