Lipo mi je počeja dan, devetnaesti prvoga ... Otac mi je u bolnici, a ja gren na pregled. Na popravni. Opet ona ista noga ... tresen se ka šunferina prin nego je ko kresne oba škatulu, oće li mi dotur Dragan reč da i ja ostanen u bolnicu. I robu san skupija sa sebon, za svaki slučaj. Lagano, svako malo, upiren oči u Onega Gori i nadan se da san potrošija sve monade za dva miseca unaprid. Ma je ...
Zove me u nika doba @pechina: A je li znaš ko je partija? Želko Didović! Da se nisan zareka da neću beštimat, ako mi se otac škapula, sad bi mu sve bija skresa, po svitloj tradiciji pokojnoga Vjekića ... ali nisan. Sta san na balun, prikrstija se i krenija zvat po redu, Buiša, Žutoga, cilu ekipu iz naši maškar ... Nažalost, nije bija lažnjak 
Zna san da je Želko jema problema sa srcen, kad san ja leža u bolnici, bili su me on i Buiš obać, a bili su obadva na svoje preglede. Želku je još onda pumpa trokirala. Zamalo su mi balun donili, a ja nogu operira, prst okinija. Jedva san uspija objasnit mojin cimerima, ča su ležali sa menon u sobi, da ono nisu bila dva luđaka, nego ozbiljni, oženjeni ljudi sa dicon. Ma je isto sviman sta upitnik povr glave sve dok nisan iša doma. Sviman, osin jednoj sestri ča se rodila u Mašogradu, pa jon nije tribalo crtat.
Kaki je Želko bija, kako ga ja poznajen, ne bi se začudija da je i Svetoga Petra, onega ča sve ključe drži u rukan, uvatija zajebavat.
Ja se ne mogu sitit, kad san njega vidija grintavoga, loše volje. A nije da se znamo par dan, vengo cili život. Generacija. Tako da mi je ovo sve još i duplo teže. Nismo se ni uvik ni u svemu slagali, Bože moj, svi smo mi ljudi od krvi i mesa. Ali smo, i on i ja, volili maškare i sve okolo toga, još od početak, od ponovnoga pokretanja dviiljadite godine. I tot bi pristala svaka rasprava, svi bismo potegli, koliko je ko moga.
Kako ko okreneš, sve pri oli posli završi na maškaran. Nije lipo ... Najprin Meho, pa sad Želko. Ljudi ča su u mašogradskin maškaran od početka. Dokle ovo pišen, još se ne zna ča će ove godine bit sa maškaran. Jeman svoje mišljenje, ali ću ga zadržat za sebe, i poštovat ću svaku odluku koju Udruga donese. KPU Kampanel, naravno, a ne mojon greškon spomenute „Poklade“ na TV, kad san na kvizu bija ... jema dobri razlozi i za i kontra održavanja.
Kako me je ovo stislo od nove godine, nisan mu se moga njanci poć žalovat kad mu je ocu bija sprovod. Zva san ga na mobitel, i to je bija, nažalost, zadnji glas ča san čuja od njega.
Kad je mene mater jedan put pitala kad ću se uozbiljit, reka san jon da oću kad me digne nji šest. I pobiga na vrime da me ne pogodi pršuron ča jon je bila u ruci. Kad malo bolje promislin, pari mi se da san to od Želka čuja. Zajebava se do kraja. Kad je osta brez posla, reka je da više nije kokakoličar, da je sad uličar.
Laka ti hrvatska zemlja, Željko Didoviću, pozdravi nan Mehu, i nemoj sad brzo reč da van fali još koji igrač gori za bacit na male branke. Reci Onemu da ferma malo ... i počivaj u miru Božjemu.
|
