Ovogodišnja svetkovina Vele Gospe i Svetog Roka je bila vrlo sadržajna. Naša, sućuraška, muška klapa „Podvorje“ je izabrala baš blagdan sv. Roka za svoj prvi samostalni koncert.
I nije to bija jedini „prvi“ oti dan. Ka voditelje su izabrali Marijanu, koja jema, ča se tiče tega posla puno „utakmic u nogan“ i neočekivanoga debitanta Ivicu Žegarca Žutoga Kipušu. Pari da najavljijen kojega španjolskoga oli mexikanskoga „dona“, ali u Mašogradu to morate dobro naglasit da ne bi ko pomislija na Ivicu Žegarca Žutoga Ciplića. Jo ludega mista, di nije čoviku dovoljan jedan nadimak vengo i mora jemat po duzine.
Po mome skromnome mišljenju, Žuti se pokaza ka dobitna kombinacija jer je sa svojon konferanson zabavija puno puncato Podvorje ...
![Photobucket](http://i952.photobucket.com/albums/ae4/umorno_oko/klapa%20podvorje%202011/podvorjekaipak.jpg)
... ne da je bilo puno puncato ma su ljudi i po skalan do Glavice sidili.
![Photobucket](http://i952.photobucket.com/albums/ae4/umorno_oko/klapa%20podvorje%202011/poskalan.jpg)
Neću ni spominjat da je i oni „balkon“ na Glavici, poviše pozornice, bija dupke pun.
Inšoma, Žuti je malo i razbija tremu prvoga nastupa. I sebi, i klapi i još kome. A kome?
Pa da prostite, i meni ...
Jesan i ja koji put snima, i pisa, i meća reportaže na Portal, ma mi je ovo prvi put da sniman ka ono službeno, i to gori u Gospe na Hladi, na misi i procesiji za sv. Roka, i ovo večeras na koncertu.
Tribalo je nadomistit našega @iskrenoga, koji je na bolovanju, i ovon prilikon mu želin ča brže ozdravljenje.
A van se svima unaprid ispričajen ako san ča falija ;)
Molajmo mi sad moj CV, vratimo se na koncerat.
Prilično ambiciozno je zamišljen, da bi se klapa Podvorje, pod ravnanjem maestra Rajmira Kraljevića, pridstavila na domaćemu terenu na premijernome koncertu. A za šlag na tortu, pozvane su i gošće, ženska klapa „Neverin“. I to ne samo za ukras ....
![Photobucket](http://i952.photobucket.com/albums/ae4/umorno_oko/klapa%20podvorje%202011/neverinke_1.jpg)
... vengo šinjorine, osin ča figuraju za vidit, itekako lipo znadu pivat ...
![Photobucket](http://i952.photobucket.com/albums/ae4/umorno_oko/klapa%20podvorje%202011/neverinke_3.jpg)
![Photobucket](http://i952.photobucket.com/albums/ae4/umorno_oko/klapa%20podvorje%202011/neverinke_4.jpg)
... jerbo nisu zaludu osvojile nagradu na Festivalu dalmatinskih klapa u Omišu ove godine.
Svaka čast našin gošćama, ali svi su željno iščekivali naše momke iz sela, koje je maestro Kraljević, uz naporan radi i vježbanje, ušestija u pravu ozbiljnu klapu.
![Photobucket](http://i952.photobucket.com/albums/ae4/umorno_oko/klapa%20podvorje%202011/podvorje_1.jpg)
![Photobucket](http://i952.photobucket.com/albums/ae4/umorno_oko/klapa%20podvorje%202011/podvorje_3.jpg)
![Photobucket](http://i952.photobucket.com/albums/ae4/umorno_oko/klapa%20podvorje%202011/podvorje_2.jpg)
Publika je uživala u pravim starim klapskim standardima, kao i u novim obradama popularnih pjesama, u kojima su se smjenjivali „Podvorje“ i „Neverinke“, da bi sve završilo sa jednom velikom „mješovitom“ klapom na pozornici, kad su, na bis, za veliko finale zajedno otpjevali „Pismo moja hrli tamo“ ....
... nakon čega su nas Marijana i Žuti pozvali na ponovno druženje i dogodine.
Zdravi i veseli bili! ![mah](https://blog.dnevnik.hr/img/hr/smiles/mah.gif)
|