Napokon, prošla je i ova tortura od karantene i operacije angini. Ni meni se nije dalo puno izalazit dokle je Vinka morala stat doma, da ne pokvarimo termin za operaciju krajnika. U nedilju pozapodne smo je odveli, ponediljak je šefica bila na redu tek oko dvi ure, a u utorak ujutro smo već bili po nju u bolnicu.
Ča ti je moderna medičina. Ili je to samo da se mali pacijenti oporavljadu doma, a ne u državnin ustanovan.
Lukav je naš lički medo, ko bi reka za njega, a? 
Inšoma, sve je prošlo u redu, malo je još kunjala u utorak, to ka jučera, a danas je već živahnija. Zauzela je svoj položaj za gledat sve one crtane filmove ča i nije gledala od nedilje.
Jerbo se triba još malo pripazit. Jučer još samo na slamku, vode & čaja. Danas već ritko na plitko, malo griza, i ritki čokolino. I otkrila je sve gušte juve bez ičega na slamku. Triba malo napunit štumik, makar i za zavarat neprijatelja, jerbo je zadnji put normalno papila daleke nedilje u sedan uri, kad in je donilo večeru na Firulan.
Strpićemo se još koji dan, pa ćemo lagano obalazit sve po redu ... Još nismo bili u ono novo kino u City One, koliko smo samo filmov propustili pogledat .... naravno, crtanih.
Čin ozdravi, već moremo udrit po sladoledu. Ako povuče gene od Zakonite, radićemo samo za sladoled  
A neće proć još puno vrimena pa ćemo se moć okupat i u moru, a ne samo ovako, u kadi ...
Ako bude sve kako Bog zapovida, onda bi se moglo malo i u vrtić, bar za ovi završetak vrtićke godine, nigdi polovicon šestoga miseca. Mislin da Vinka jedva čeka malo se još poigrat sa ekipon, prije vengo se svi skupa raziđedu po školan, razredima i drugin obavezama.
Vinka još nije svjesna da jon pristaje najslađe i najbrezbrižnije doba života, di jon je najveća briga bila koji će crtani danas gledat i sa čin će se večeras poigrat. Škola i školske obaveze će jon okrenit životne navike naglavu, ali neka još gušta ovi par miseci.
Samo da sa zdravljen bude sve u redu, a za to smo se, je li, pobrigali sa deložacijon angini/krajnika/mandula ... nadajmo se da će to bit dovoljno i da neće Vinka opet pitat da kad će ona cilo lito bit zdrava da se more po komodu kupat.
Zdravi mi i veseli bili! 
|
