Eto, spojili smo se, naravno. PC san prvi od tehnike spojija, a sve ostale žice i žičice moredu i pričekat. Malo bolje dane, ili da mi malo pade tlak, da ča ne zabucan od grinte i živac ...
Prida san ključe ... reka da san sve platija ča san triba platit, a na njegovo tj. "gazdino" navaljivanje da platin razliku struje reka san da priznajen samo službeni obračun od "Elektrodalmacije" jerbo mi njegova besida, iz iskustva, ne znači baš ništa. 
Jača je bila "časna reč" pokojnega Slobe vengo njegova. 
Ostalo mi je platit razliku struje, vodu za prvi misec i telefon.
E tu mi je naletija na minu. Odjavija je telefon, ali nije ADSL. I on mi uporno tvrdi da san ja prista da platimo ADSL popolak, jerbo kod raskida triba platit ostatak do kraja godišnjega razdoblja.
Je, govorin, tako smo se dogovorili, popolak. E, a onda mi jemaš dat još trista kun, opet će on.
Ne, dragi, loše te gre matematika, ja san ovod već šest miseci, polak san platija a ostatak plaćaš ti, koji si i potpisa ugovor.
Prvi put da san bija zadovoljan sa "politikon" našega dragega T-COMa. Povlačin barenko polak ča san grubo reka o njima.
I jopet ču reč, nikome ne želin zla ... njegovoj ženi koja je grubo bolesna želin da ozdravi ča pri ... a njemu ne želin ni manje ni više vengo ča on želi meni. I dosta više o temu ...
Nije Lassie, ali je Vinka, vratila se u ridnu kućicu 
Kakvi bija da bija, mislin na ovi stan, ipak se ovod Njezino Veličanstvo i rodilo, na ovoj je taraci napravila i prve koračiće, 
ovod je vidila svoj prvi snig u životu 
... a to dite ne zaboravlja.
Možda ovo i nije najbolji stan na svitu, ali je ovi gazda barenko za četiri klase boji od onega "gazde" u zadnji šest miseci. A sad ... ča bi reka moj pape ... mac naprid ...
Gremo u nove radne pobjede ... Maškare 2007. godine ...
Lagano se krčka "Mašogadur", a pošto smo pod zakletvon da ne smin objavljivat nove slike, evo jedna iz arhive ...
... di san se nazad par godin slika sa našin poznatin lokalnin tv/radio voditeljen zvanim @Rumeni.
Dovidova, i sritni mi i veseli bili! 
|
