Lovec v kâlne vode
23.02.2006., četvrtak
Vitez od Magisterija
|
Čitam v novinami spominek z Đapićem. On je prepisal svoj magisterij pak sad zmišla kak je udba kriva kaj čisti hrvacki sineki curiju kak tudum z trsja na ispitemi na fakultetu. Ne on prepisal svoj magisterij zato kaj ne znal kaj bi pisal. A ne. To je bila borba protiv udbe. Đapić se je tak boril protiv srbočetničke okupatorske čižme. Tak je on potkapal mrsku komunističku vlast. I zato je i komunizem prepal i zato nesmu zgubili v ratu, a morti zato i Janica medalje osvaja. Sam zato kaj je Đapić magisterija prepisal. To je plemeniti i domovinski čin. Ne Đapić bil primitivec i sileđija kak ja kaj sem se z puškum boril z kalne jame. On je to odigral kak pravi majstor. I v svoj grad se je vrnul posle, dok je sve svoje borbe i bitke završil. 10 let posle rata se je Đapić vrnul v svoj grad na Drave. Taj grad je morti kojega metka pretrpel i morti je koja mina opala na koji trg ili vulicu. Ampak se to ne vredno strava kaj ga je Đapić imal dok je svojega magisterija prepisival. Nemate vi pojma kaj je on sve žrtvoval za svoju zemlu. |
:: 15:19 :: Komentari (0) :: Isprintaj :: #
15.02.2006., srijeda
Kaj sretno Valentinovo?
|
Mislim si ja, kaj, čemu, kaj to znači kad negdo nekomu zaželi sretno Valentinovo? Kaj bi to trebalo značiti? Pa ne to Novo leto pa da nekomu zaželiš da mu bu sretno. Kaj ne to nekakvi intimni praznik? Ako imaš nekoga unda mu zaželiš i pokažeš kak ga voliš, ženska iznenadi fakina z pičkastem, pardon, čipkastem vešom, a muž skoči oblečen v črlene bokserice na kojemi je narisani veseli spermič. Negda su ženska nosile podoblačke, a muški nesu imali gače pa neznam kaj su oni delali za Valentinovo, kak su iznenadili jeni druge. Ampak, to je intimni praznik. Praznik za one kaj se vole. Bezveze mi je kad mi puca na kiosku jutro veli "Srečno Valentinovo, gospon". Ili si je ona mislila kak bi bilo dobro da se v telefonske govornice, ko Supermen ili Spajdermen, preslečem v črlene bokserice z veselem spermičem, i da zapremo kiosk dok si ne pokažemu kuliko se volimu. I unda ti na poslu si vičeju "Srečno Valentinovo". A kak je firma velika ti si misliš kak su oni si gledeli snočka neki pornić koji na kraju završi z velikum orgijum pak su si nadrkani, pardon, napaleni, zapoleni, opaleni... A kaj ja tu govorim? Pak bu ispalo da je Valentinovo nekakvi porno praznik? Valentinovo je osobna stvar sakoga pojedinca i negvoga partnera ili ice ili morti stvar trokuta, četvorokuta, petokuta i tak dale, ovisno o tem kakve neki čovek, pa i žena, ima sklonosti, mogučnosti i potrebe. Negdo nemre voleti samo jenu osobu, on mora voleti više njih, ko čela leti od cveta do cveta i praši se kak stigne. Je, al opet mene vleče ova tipkalica na seks. Lubav. Valentinovo. Oni koji se vole. Oni se nek srečno želiju i voliju. Koji kurac mi brkati stokilaš ima želeti srečno Valentinovo? Osim ak on ne, znate, gej, pa mu je to okej. Ampak ja nesem i unda jedino kaj mu mogu je da mu zaželim da se goni u materinu, tam otkud su ga zvlekli ili otkud se je sam skopital van. A tam je užival u lubavi svoje matere. Ali ak ne Edip unda mu na Valentinovo tam ne mesto. Nek dojde na Majčin dan, unda ga bum poslal u materinu i to bu prigodno. Valentinovo je za zalublene. I za cvečare kaj unda poskupiju 200%. I njemi srečni Majčin dan. |
:: 08:05 :: Komentari (3) :: Isprintaj :: #
11.02.2006., subota
Ivek i Vesnica ili do to tam ne dela svoj posel?
|
Rekel je Ivek da Vesnica ne bila dobra ministrica. 5 je dni v tjednu delala ko ministrica, a unda je fušala za svoju stranku. I Ivek ni pet ni šest i dal je Vesnice otkaz. A ona je rekla kak je je rekel da ju voli, ampak da je to razlaz. Sigurno ju je prosil i da si ostanu prijateli. A još su kakti i nejakve vesti curele čez pipu z koje su lokali novinari, a Vesna je valda otpirala pipu. I tak je to. Sad si bu Vesnica odmorila v saborske klupe. Nigdo ne zametil kak je Ivek rekel da je Vesnica delala svoj posel. Najveći problem su nami političari kaj ne delaju ono kaj bi trebali delati, već celo vreme delaju za svoj račun. Takvi ni 5 minuti ne delaju ono kaj bi trebali delati. Ali se dok su v prave stranke ne moraju se bojati da buju stolec zgubili. Takve nek Ivek najuri. A zakaj je zapraf Ivek stiral Vesnu? Pak mu Vesna se mejne znači, nejna stranka je se mejna. Ivek bi ziher štel jaču stranku. Jača stranka je HSP. Tam v te stranke je blizu Mate Granić. Nemu se Vesna zamerila. Iveku se više splati biti dober z strankum od Mate, bu više glasova donesla. A morti se bu Mate i v adezeja vrnul. I unda je šapnul Iveku kak bi mu bilo jako milo ak Vesna više nebi bila gospođa ministrica. I tak je Ivek odigral onak kaj se Mateku dopalo. P.S. Nek mene Ivek veli kaj mu na mestu ministra dela Branko Vukelić? Glumi vrgajna v šume. Nit kaj čujemu da dela, nit kaj govori, nit kaj pita, niti viče. Vesna je i v Knjazu v emisiju stigla dojti i pokazala kak je blizu malomu čoveku. A Branka ja nes čul ni da je reči de rekel. Valda od posla ne stigne. Sam ne mi baš bistro kaj tuliko dela?! |
:: 23:01 :: Komentari (1) :: Isprintaj :: #
06.02.2006., ponedjeljak
V avutu
|
Ak voziš avuta i mobiteleraš i nek te policaj vidi, budeš platil kaznu. Fale se oni kak su fajn penez nabrali od mobitelerašof. Još prije nek kaj su taj zakon donesli ja sem govoril kak je bezveze da se govori sam o mobiteli, vozači mogu fajn toga delati dok voze kaj je morti opasnejše nek spominek prek mobitela. Problem je kad bi sve to počeli nabrojati unda bi amandmanov na zakon bilo više nek kaj prejde avutov jutro čez Zagrebačku vulicu v Gorice. A i kakav bi to šalabahter trebal saki policajec imati pri sebe na kojem bi se to bilo zapisano? Kak rola papera za šekret. Zamislite se kak stoji policajec na ceste z rolom papera. Zaustavla avuto, a vozač sav sreten zleti van, zeme policajcu šalabahter i pobegne v najbližu kukurizu da si malo olakša život. Zapraf da si zbriše trag olakšajna. Taj spomen mobitela v zakon su zgurali sigurno neki uvozniki one slušalici i ostaloga pribora za spominek bez ruki. Čital sem v novinami da vozač kaj ima taj pribor i onaj kaj ga nema isto ne paziju i da taj pribor niš ne pomaže vozaču da sigurjenše vozi. A kaj je z onemi kaj si fruštukaju u avutu? Kaj je z ženskami kaj se v jutro pudraju i šminkaju v avutu? Neki vozač si bu i novine prečital dok se polehko vozi čez gužvu. Oni kaj puše su isto tak grdi, pogotovo ak su malo nespretni z cigaretum pak im pepel leti po celem avutu, a i žara ima segde. Oni kojemi negdo drugi puši valda ne voze pak nesu opasni za promet, ampak imal sem za čuti da je i takve zgodovini bilo za videti, vozi čovek, a ženska mu puši. A morti je bil i muški, sam je imal duge lasi. Imal sem za videti na našemi cestami i one kaj voze decu, a deca na zajdne zicu na pol vese čez šajbu z avuta van. A mamica vozi i mobitelera, kaj bi drugo, i opće ne vidi kaj je deca delaju. Ili vidi pa ju ni briga. Za takvu mater je premala kazna samo vozačku zeti. A čera na parkeralištu, ide ženska z avutom van z parkerališta, na rikverc i još mobitelera. Pa kaj ne mogla malo pričekati dok spominek ne završi? A zna se da je ženska kaj v rikverc vozi more napraviti veču štetu nek tuča dan prije žetve. Nesu sam mobiteli grdi. I pojas nečemu služi. Veliju da pametni znaju čemu služi pojas. Negda ne bilo takve edukativne reklame pa je jen moj pajdaš skoro najebal. Ne mestu suvozača je vozil špeceraj i flašu kojnaka. Flaša kojnaka ne bila svezana. I kad je pajdaš z avutom krenul podbreg, krenula je i flaša. Pajdaš se hitil da spasi život nesretne flaše i avuto je krenul v grabu. Da je flaša bila svezana to mu se ne bi dogodilo. Morti to ne bila baš flaša kojnaka, pak mi pajdaš nek oprosti ak sem dezinformeral javnost, a onomu kaj je v flaše bilo se nemam kaj ispričavati, to je nestalo v grlu i spišano v nepoznatem pravcu. Negda se ne splati vezati. Ne spasi te taj pojas navek. Ima jedna stara, poučna zgodovina o dva Slovenca, Muji i Hasi, i nijovem sudaru. Mujo se ni vezal, a Haso je. I zabiju se oni v banderu, avuto totalka, Mujo je zletel čez šoferšajbu, strgal si ruku, nogu i sav se podropal. I dojde nemu policajec i veli: "Pogleč se Mujo, sav si strgan, podropan, nebu te takvoga Fata prepoznala. A Haso se vezal. Pogleč ga. Ostal je na svojem mestu v avutu i zgleda ko da je živ." |
:: 08:14 :: Komentari (2) :: Isprintaj :: #
05.02.2006., nedjelja
Samoposluživanje turizem
|
Naši turistički težaki nesu baš najbole raspoloženi. Nekak se čoveku čini da bi oni najrajši da turisti samo dojdeju, ostaviju peneze i da se vrneju tam otkud su i došli. Turisti nesu takvi, oni bi šteli nekaj za svoje peneze. Turistički težaki bi šteli sam peneze, samo kaj jem se neda tak brzo i fletno posluživati turiste kak ovi očeju. I tu se dešava ono kaj se stručno zove sukob interesa. To je tak zavuzlano da ni Aleksander Makedonski to ne bi mogel odvuzlati. Najbole bi bilo da mi, prvi na svetu, zmislimu samoposluživanje turizem. Turisti dojdu, platiju i unda se sami delaju. Saki turista dobi čitabu kaj treba delati. Polu pansion bi značil da se turista sam treba skrbeti za sebe, čistiti, kupiti špeceraj, pripremati jelo, popraviti ak kaj treba v sobe ili na hiže v koje se smestil. Puni pansion ima prava i obveze polu pansiona, ali turist treba još delati okolo hiže, kositi travu, čistiti vulicu, pomoći oko vatrogasnoga doma... Morti bi unda turistički težaki dočekivali turiste z veseljem. Selski turizem Mi tu pri nami nekak posramečki razvijamu selski turizem. Tu i tam nekoji čovek skopa rupu v zemle, neleje vodu, nahita ribe, dene nejakve klupe i to je ribnjak. Ima još i birtiji koje imaju malo zelenila oko sebe, igralište za decu, a morti se vidi i susedov kokošinjec ili čak i štala. I to bi bilo to. Ja sem si navek študeral kak bi napravil nekakvo eko selo za bogatune de bi se mogli odmoriti od brzoga života. Selo bi napravil od drvene iži z slamnatemi krovi. Tu bi bila i štala i ostali prateći objekti, vrt, jarek z melinom, pole z kukurizum i šenicum. Gosti bi spali v ižami na kreveti v debelemi blazinami, dok bi oni kaj nemreju baš puno platiti spali v štale na slame. Ranili bi se samo z domačum ranum: sir, mleko, vrjne, kukurizni kruv, žganci z maslom, žganci z zeljem, mlinci, purice, štrukli, pražetina, frigana juva, trganci...Pila bi se domača pijača, za bogatune mešno vino, a za one na štale čisti direktor, delanec, tudum...Klasne razlike naglasile bi se i z čistum šlivovicum naspram tropove rakije. Za goste bi bila organizerana i rekreacija. Kakav pilates, to su zastarele tehnike, treba organizerati motikates i roglates. Roglates bi bilo nekaj slično prevračanju, kupičanju i nametajnu sena. Motikates bi imal različite tehnike: okapanje vrta za rekreativce, okopajne kukurize za poluprofesionalce, kopajne trsja za najbole profiče. Dodatni bonus za se bila bi i krasna boja kože, koja se nemre dobiti v solariju, a i na moru je teško dobiti tak dobru boju. A za bildere imamu posebni program: delajne drva v šume, bez motorke i bez traktora s kojem bi vozili. Nema toga bildera kaj ima bolše i čvršče mišiče od običnoga šumskoga radnika koji saki dan napravi trideset metri drvi. To bi bil pravi selski turizem. A na tragu je i našega turističkoga ideala: samoposluživanje turizma. Stare stvari V stare, drvene iže za turiste trebalo bi deti i starinski nameštaj, staro posudje i druge stare stvari. Samo kaj smu takve starine hitili čem smu napravili lepe, nove, zidane iže. Po sele još ima stare, drvene iži de bi se fajn toga moglo najti. Imal sem za čuti da su si nekakvi Talijani deli na nišan takvi stari nameštaj pa bi morti čak i delali tvornicu v koje bi opicanili takve drvene starine i spremali za prodaju. Ne bi me niš začudilo da oni to i naprave i da naši ludi za drobne peneze daju nekaj na čemu bu negdo drugi posle velike peneze namlatil. Još stareše stvari To da se pri nami ne poštuju starine i da bi negdo drugi na tem puno veče peneze zaradil videl sem ovo leto tam dole pri moru. Našli su nekakvi rimski vojni logor i počeli su ga skopovati. Turistom bi tak nekaj bilo fest zanimlivo. Ima sam jen mali problem, ni ga moči najti. Nema putokaza, oznake niti ničega kaj bi zabludele turiste do tam dopelalo. I bole je da nema, ono kaj bi tam videli sam bi nam za sramotu i špot bilo. Z glavne ceste, do na pol skopanog amfiteatra, pela jedna na pol našudrana cesta. Pri amfiteatru nema nikakvoga znaka, nigdo to tam ne čuva, čak ga nesu ni ogradili pa do god oče može tam dojti i delati kaj oče. Ovce se paseju oko kamenja i se je tak idilično. 'bemti pa ja sem skroz pozabil o čemu je reč. V samoposluživanje turizmu buju turisti sami delali znake i putokaze, ogradili staro kamenje, napravili zgodne kučice, a unda buju nutre delali prigodne suvenire. Načelnik opčine bu sam saki mesec došel peneze pobrati. Valda buju brzo zglasali taj samoposluživanje turizem, prije neg kaj slučajni turisti odneseju se kamenje iz amfiteatra. |
:: 12:00 :: Komentari (0) :: Isprintaj :: #
04.02.2006., subota
Nemojte se sekirati
|
Nemoj se sekirati, sad buju izbori, buju kampajne da nam skreneju pažnje, donesli buju v naše selo ražnje, delili buju kobasice okretali buju janjce i prasice tak da zabimo masnice, prazne novčanike i naše prazne kartice ... (Edo Majka, Sevdah o rodama, slobodni prepjev) Bil sem v jedne bertije i baš su se ludi spominali gdo bu išel na kobase i kotlovinu kaj je drugi dan, za svoje glasače, spremala lokalna stranka. Mene je ta slika odma bila fajn poznata i odma sem se setil da sem to čul od purgerizeranog bosanca na negvem novem cedeju. On je još sekaj nadrobil kaj nesmem ovde spomenuti da ne bi blog dobil oznaku i zabranu da ga nesmeju čitati oni kaj imaju mejne od 18 let. Političari misle, a tu i tam to i zgledi tak, da su glasači bedaki. Oni misle da buju za komad mesa, kaj se morti ne ni dobro speklo, dobili glas. I onda spreme fajn mesa. Drugi pak voziju glasače, i za šalu i za praf (na izlete). Negvo veličanstvo, bedak glasač je popularen v izborne dane i si se trgaju zajnega. A dan posle izbora bedak glasač je kakti i Fašnik dan posle Fašnika. Zgoreni, negde v čošku, nigdo ga ne jebe ni pet posto. Oni za koje je glasal več si misle kak buju unovčili dionice kaj su jem ih daruvali bedaki glasači. Lahko je reči, naj biti bedak. Nemaš ti za koga kaj glasati pak da se osečaš kak pošteni i pametni čovek. I unda oni kaj su mejni bedaki nejdu na glasovališta več doma spijeju. A morti su oni i veči bedaki od one kaj zijdeju na izbore? |
:: 08:32 :: Komentari (4) :: Isprintaj :: #
03.02.2006., petak
Prosci
|
Sinek moj, nemoj živeti od toga kaj buš prosil; bole je mreti nek prositi. Čovek kaj furt gledi na tuđega stola ne živi kak se živeti spada. On bu zakalil grlo svoje z jelom tuđem, a školovan i odgojen čovek od toga beži. Slatko je prositi vusnicami onoga bez srama, ali ga v dropcu vužiga kak ogen. (Knjiga Sirahova, 40,28-30) Božji fuš Neki dan sedim v birtije, pijem kavu i študeram si neakvu knigu. Kratim si vreme prije posla. V študeranju me zasmetala neakva babica. V ruke je imala žutu plastičnu čašu i zreciterala mi je svoju molitvu za prosidbu. Dok sem se ja prešaltal na tu frekvenciju, nezin šapat je več odletel nebu pod oblake. Negde po repu zajdne reči sem lovil da je i Boga spomenula. Kuliko put sem več čul garanciju kak bu Bog platil. Siroček, ne čudim se kaj v zajdne vreme veliju da ga nigde nevidiju. Sigurno si je našel nejakvi fuš pa dela od jutra do zutra da zmogne tulike peneze kaj bu moral platiti kakti jamac. Bilo me je sram kaj si ja tu topim rit i čitam novine dok sirota mora delati, pardon, prositi, pa sem zvadil i dal je sav sitniš kaj sem v žepu imal. Zgleda da su i drugi gosti v birtije bili srameči kak i ja pak se čulo kak zvoni sitniš v žute plastičnjače. Nesu tam v birtije, v to rano jutro, bile nekakve lenčine ili nejakvi tajkuni. Se su to bili radni ludi kaj su išli na posel. Baš si mislim, jel si do od te radnikov morti zagruntal kak je babica za čas posla zaradila onuliko kuliko oni zarade za dve-tri vure pravoga posla?! A ne mi ta babica zgledala kak nejakva velika sirota. Još je v dobre kondicije bila. Kak Janica se je odskijala od stola do stola. Nekak ne verujem da ju je nejakva velika sila strirala na prošnju. Prije bi rekel da je babice to, ak ne profesija, a unda barem hobi. Nekak sem v životu videl kak oni, kojemi nekaj zbila treba, ne prose. Leže jem je delati nek prositi. Bog kakti brend Na sakom proščenju bute, polek gverca i pečenice, zestali i bogce. Negda su i bogci bili druge fele. Seli su, ili su stali na svoje mesto, i tak su mirno, rekli bi dostojanstveno, obavlali svoj posel nadzora novčanog tijeka v svoju škrabicu. Vreme se je premenilo. V denešnjem društvu reklama je najvažneja. I kaj unda buju jadni prosci, od tulike reklami po vulicami do bu primetil jednoga prosjačkoga delatnika?! Če su baš denes popularne druge vrednote, Bog je još navek dober brend. I tak su prosjaki na sav glas počeli verglati elegije koje uz krešendo železnjakov polehko prejdeju v patetične ode koje fale milostivu ruku, a v podloge se stalno vrti Negvo ime. Istraživajna tržišta, kaj su platili prosci, su pokazala kak je nijova cilna skupina još navek bliža starim vrednotami, pa se za nijov posel, v ovem času, splati rabiti Negvo ime. Nesem ja protiv prosjakov. V Knige piše “ne uskračuj milodar siromaku, i ne daj da dugo čekaju oči uboga.” Ne govorim ja protiv toga, samo me smetaju oni kaj baš i nesu ubogi i kaj više put imaju većega bogatstva neg oni kaj jih daruju. Ma nek prose, kad su si več takov posel zebrali, a Boga nek ostave na miru. Bole da odu na Hitro točka haer i nek si tam otpreju obrt za prosjačke delatnosti. |
:: 08:31 :: Komentari (3) :: Isprintaj :: #
02.02.2006., četvrtak
Drug
|
Negda smu si bili drugovi jedni drugemi. Ne računam tu ženske kaj su bile drugarice. I unda dok bi god negdo nekomu rekel kak je on dober drug, v mene se je jen vražiček stalno smejal. Doma smu znali kaj je to dober drug. Tenki i dugi kolec z kojem bi slive tresli, a koji put i črešnje, višnje, ruške ili jabuke. To je za mene bil dober drug. Drug je bil dober dok je nekaj trebalo stresti, zrušiti. Ak si štel jabuke za zimu spremiti unda si je moral z rukami brati. Nesu smele potučene biti, a z drugom nemreš nek tuči i vudriti. |
:: 08:30 :: Komentari (0) :: Isprintaj :: #
01.02.2006., srijeda
Baltazar
|
Sigurno med vami ne onoga kaj se ne bi setil profesora Baltazara?! Ziher ste si puno put študerali kak bi nam v ova teška leta baš dobro došel jen Baltazar kaj bi nekaj zmučkal i rešil naše probleme. Neki su si Baltazara zamenili s konobaricum na šanku, pak jem ona mučka (i meša z guzicum i z sesci, prava selska konobarica mora imati dober dekolte) i unda bar malo zabiju na tegobe. Ampak nema profesora Baltazara, i nema... Čak ni ovoga narisanoga. Tu i tam se negda reprizera na televizije, ali to su stare epizode. Nekaj su naši mutili z Slovenci pak su šteli napraviti 3D Baltazara, ampak valda ne bilo dosti penez. I sad neki dan vidim kak su napravili 3 nove epizode i kak buju opet delali Baltazara. Fala dragomu Bogu da je nekomu došlo z riti v glavu. Poglečte si kakvi se samo crtani vrtiju na našemi televizijami. Nemreju deca niš pametnoga navčiti, si se samo tučeju, a o tem kak se glavni junaki ponašaju i kakve se mrske reči govoriju, da i ne govorim. Ne mislim sad tu na ove crtane za velike. Južno gmajne (v orginalu South Park) je jeden dober crtani, negda zna biti tak dobra kritika društva da je šteta da ga oni, koje se ta kritika dotikavle, ne glediju ili ne razmeju. A najviše su me rastužili Japanci i oni nijovi crtani. Negda smu znali čuti kak su ti Japanci vredni, kak i po par let nejdeju na godišnji, kak se vubijaju ak jenu minutu zakesne na posel. I do bi mislil da su ti vredni Japanci tak pokvareni. Pikaču i pajdaši samo govoriju skupi se, skupi se kaj ne niš drugo nek kaštiguvanje z kojem očeju dece v glavu zabiti da moraju stalno kupovati i kupovati i kupovati. Ampak nesu ti skupi se crtani ono najgore. Najgori su oni kaj su jako blizu nijovemi porno mangami i v kojemi ima i pedofilije. Nemrem se sad setiti kak se zove onaj crtani o malomu borcu čijemu staromu vučitelu sako malo skočiju oči i počneju sline cureti čem vidi malu curicu. I unda se žale kaj nam je mlada generacija takva kakva je. Da se ja vrnem našemu Baltazaru. Baltazar je crtani za koji nijen pedagog nebu rekel niš mrskoga. On je baš takov kakov bi crtani za malu decu moral biti. Najpopularniji je v skandinavskemi zemlami koje su još prije zabranile nasilne crtane filme. Još je živa stara pripovest koja govori kak ste tam mogli videti laki pornić v 8 navečer, ali Tom&Jerry se je mogel videti dok je več bila grda kmica i dok deca več dugo spijeju. I tak su mali šveđani i norvežani zavoleli Baltazara. Zapamtete si to vi mladi galebovi kaj po moru nagajnate fureštice. Zapraf vi z našega kraja nemrete biti galebovi, nemate vi dosta fjake za mirni let, vi ste prije škajnci. Saki mladi škajnec kaj ide na more i kaj misli loviti nejakvu šveđanku mora v pričuve imati jenu ili više majci na kojemi je narisani Baltazar. Lepo speglanih, prosim. I čem mladi škajnec vidi šveđanku odma da ko Supermen navleče majcu z Baltazarom. Čem šveđanka vidi Baltazara odma je bu toplo oko srčeka i setila se bu kak je je lepo bilo dok je prije dnevnika v pol osem gledela profesora Baltazara. Kak je odunda malo zrasla, i kak sigurno i grešne misli ima, ziher si bu zgruntala kak taj mladi škajnec dela čuda v krevetu baš kak i profesor Baltazar (ili grmlju, ne zebira ona, ipak je ekološki osveštena) i odma se bu tak rastopila da škajncu nebu nikakvo kaštigovajne da ju primle pod svoje krilo. Zato lepo prosim, mladi škajnci, zabite si to v glavu, Baltazar je mamac broj jen za šveđanke i nezine susede. Letele buju ko muve na drek. Ak slučajno...ma kaj gluposti pripovedam...kaj slučajno...ak ziher lovite nejakvu šveđanku na majcu od Baltazara lepo prosim da mi razglednicu pošelete. Fala lepa. |
:: 15:28 :: Komentari (0) :: Isprintaj :: #
Jutro v birtije I
|
Čitam novine... Ni na šekret bez Washingtona U Zagrebu spomenik braniteljima po uzoru na washingtonski. Odma mi se zdigel tlak čem sem to prečital. Več mi je pun q toga noroga amerikanizma. Zagrebačkom pročelniku za kulturu se tak dopal spomenik za poginule v Vijetnamskom ratu da bi on štel takvoga i pri nami. Valda mu na pameti ne bilo i to da bi naše vojnike poslal u neki novi Vijetnam. A kaj naši umetniki nebi mogli sami zmisliti nekaj bole i dostojanstvenije. Ipak je umetnička tradicija v ovemi kraji malo duža nek kaj je to v Amerike. Neki naši političari nemreju bez Washingtona (jebemti zakaj jem je tak dugi naziv glavnoga grada), najrajši bi preslikali se kaj tam vide. Ja mislim da je bole da njemi Đorđ Dablju Buš Nebuš da azil pa da se si oni nami lepo mekneju z grbače. Pametni znaju čemu služi Bosna Znal je Tuđman, stari tenisač, zakaj nami treba Bosna. Ne on tu Bosnu štel sam tak, znal je on kaj se v Bosne skriva. Ljubo, kaj su ga stirali z Banja Luke, najviše se ošvical i nadelal da bi Hrvacka osvojila onu zdelu za šalatu. I unda čera, još jen mladi tenisač (Marin Čilić) kaj je došel z Bosne (zapraf z Međugorja) napravil je veliko iznenađenje i zgledi se da imamu još jenu veliku tenisku nadu i priliku za nova veselja i runde v britije. Da nesu raspičkali tu Bosnu, skup z Hercegovinum, i da je postala država kak treba, već bi denes bila teniska velesila, a zdela za šalatu bi bila v nečije druge vitrine. Znal je Francek, znal... |
:: 08:10 :: Komentari (0) :: Isprintaj :: #
Hamdija i Bik Brader [NC-17]
|
Znate kaj, moja Bara gledi taj kurčevi Bik Brader. Baš je večeres gledela emisiju o tem Hamdije kaj je zel milijona. I unda, očeš-nečeš, i ja sem nekaj malo videl. Prije nek kaj sem v birtiju na belu pobegel. Taj Hamdija v one iže ne kurcu mrdnul, sam je ležal i vugibal se z fotelje na krevet, z kreveta na fotelju. Treba biti pošten i reči kak ni drugi nesu ni kurcem mrdnuli, a nigdo se ne ni pomrdal, če je baš celi narod sam to čekal. Jedino je Ivek navlačil svoju meštriju saki dan ko po receptu. 3 put dnevno do špricajna. Valda mu je doktor to prepisal. A morti i veterinar. Nega ima v sakem selu, a doktora nema. I taj Hamdija. Čem sem videl kak mu iža zgleda (crveni kožnati kauč i fotelje, isto tak crvena fasada na iže) sem se zapital: koji kurac ste glasali zajnega da dobi milijona? Baš mi ne zgledi ko čovek kaj nema, kaj je morti kruva gladen, kaj mu treba pomoči. Bole bi bilo da je milijon dobila ona Daca. Ne mi ni ona nikaj posebno, ampak bi barem peneze potrošila na fakultet, i tak pomogla da bumu bliže ekonomije znanja kaj Sanader reklamera. I tak mesto da ste svoje 3.66 kuna ili više (na digitronu napišete 3.66 pa * pa unda broj kuliko put ste zvali pa = ) uložili v znajne vi ste svoje kune potrošili na gluposti. I tak se sad taj Hamdija sprema v Dubaji. Tam je segde vrući pesek, jedino su napravili veliku dvoranu za turiste da se skijaju. I tak bu Hamdija išel na vrući pesek da se skija v ote dvorane. Valda su mu se ludi na Slemenu smejali kak se nezna skijati pak je otišel tam de ga nigdo domači nebu videl dok opadne na rit. A morti bu posle i v Kaliforniju otišel. Morti je i tam kakvo skijalište. I se to, bedaki moji, z vašemi penezi. Mene zgledi da bi barem 3 frtalu naše bedakov trebalo zeti pravo glasa. Koji kurac da glasaju kad neznaju zebrati? U slučaju Hamdija neste baš preveč krivi. Konkurencija je ne bila kurcu vredna. Niš koristi. Je, ampak se mene čini da skoro si kaj su tam v iže bili imaju fajn penez. Ili jem japa ima fajn penez. To se imaju restorani, frizeraji, a morti i više od toga. Krivi su oni tam na erteelu. Nesu znali zebrati prave lude i žene z naroda. Ili se je morti za sudelovajne v tem Bik Braderu moral dati nepovratni polog? Moja Bara ne poslala nijednu poruku za Hamdiju. Štela je ona, ampak je imala tehničke probleme. Najprije je ona štela glasati za Iveka, a unda je Ivek počel z redovnum terapijum šamaranja svojega maloga Iveka v gačami, unda je štela glasati za Matka, ali je se ne dopal negov muški fundamentalizem, a unda je štela glasati za Hamdiju...znal sem ja kaj se sprema čem je počel taj Bik Brader, znal sem ja da bi se ono kaj na placu dobi za sir i jajca ona potrošila na to jebeno glasovajne. I unda sem je odnesel mobitela na servis i rekel majstoru nek ga ni za dragoga boga ne popravi prije neg kaj taj Bik završi. Majstor je zvadil bateriju i nutre del komad dreva tak da more Bare svaki put pokozati kak mobitel ne dela i kak bi saki čas trebal dojti rezervni del z Finske. Išla je ona, posle sakoga placa, čem bi prodala sir i jajca, k majstoru. Več ga je počela mrsko gledeti pak sem ga ja moral saki put posle toga pelati u birtiju na rehabilitaciju. Čem je Bik završil, majstor je donesel mobitela moje Barbare direkt v ižu. Ona se je celi tjeden unda durila na mobitela. A sad se opet po celi kurčevi dan esemesera z babami. Čekala me je pred vrati čem sem se z birtije vrnul. Več sem mislil kak mi se nekaj jako grdo sprema. A veli unda meni moja Barbara: 'Viš dragi moj čovek, baš je dobro kaj mi se taj moj mobitel pokvaril, sam bi peneza na gluposti potrošila, a zgledi mi da bi onaj Hamdija i bez toga milijona čist dobro živel.' Kušnul sem ju i otpelal v krevet. Če sem baš ovomu svemu dal rejting NC-17 nebum vam povedal kaj se je unda zgodilo. ;-) |
:: 06:59 :: Komentari (3) :: Isprintaj :: #
Dnevnik.hr |
|||||||||||||||||||||||||||||||||||||||||||||||||
|
Piknjice i črknje
Črčkę na slovami su naši kajkavski glasi. I to ovak: â - kak v réči jârek ě - kak v réči rěčem é - kak v réči réč ô - kak v réči nôvo
Rečnik
Ak vam nekakva reč ne jasna pitajte... balta, baltica - mala sekirica, koristili su je mesari ili tesari, kak koji kača - zmija najža - tavan, došlo je od na iže - na kući pees, po peesu - skračeno od P.S., ne Post Scriptum več Pravilo Službe, to je poznati termin sakomu kaj je služil vojsku v propale Jugoslavije strmopizditi se - poniranje v stilu Japanske kamikaze sam kaj je mesto aviona v glavne uloge čovek |
|||||||||||||||||||||||||||||||||||||||||||||||||