geomir

HUBOTNICA

Ovo djelo je plod fikcije. svaka sličnost sa stvarnim osobama i događajima slučajna je.

Kliknuti na link i slušati originalni izgovor teksta



Obo hubotnici se ne govori somo na peškariji,
ili za stoluon u kuhinji, po restoranima i otelima
nego smo dopokon imali priliku čut o njuoj, i vidit je,
u našemu nojvećemu zakonodovnon tilu.



A u počietku je bilo ovako:

U ono vrime bogi nisu somo pensali kako će
kaštigat i strašinat jude, nego su niki meju njima
bili milostivi i dobrostivi ča se vidi i po temu,
jerbo su uz hubotnicu i muzgovce učinili i čudo
koluronih ribih s riepima da ne bismo
puno gledoli tuo morsko strašilo kojemu iz glovie,
ča je zovemo i muja, izahodi osan trokih,
a na svakemu troku po dvo pora većih i manjih čupkih.



Izgliedo da garški buog muora Posejdon
i rimski buog muora Neptun nisu imali isti opinijun
pok je jedon reko da jon ti troki služidu ko noge,
a drugi buog da su jon tuo ruke, ma su se složili
da tuo morsko strašilo, bez riepa i perajih,
zalijedu žutokafenin, sivokafenin i zelenobilin kolurima
koje ona more duperat po voji i kako jon je potriba,
a kad ocini da jon priti perikul,
more pustit i čarnilo i ko roketa uteć ća.



Ma Buodili su judi od pratike i nisu puno gledoli
kako tuo morsko stvorienje izgliedo.
nego su uz hubotnicu vidili i gradikule, teće i saće,
ča zavisilo obo temu hoćedu je izist
pečenu, kuhonu ili s kunpirima pod peku.



U vrime kad još nismo imali makine za mlit mieso
i činit polpete tukalo je grist bokune od hubotnice
ča su čiesto bili tvordi i žilavi, apožito bokuni od store hubotnice,
a dica bi te bokune grizla i vartila po justima ko danas žvakalice.
Ma slaje nego ča su jila, dica su slušola od starijih
kako se hubotnice lovidu, a lovili su se na veće muodih.



Ostima pod sviću, ma nojprin je vajalo vidit di šieto po dnu,
ili noć rapu di žive, a ondar je istirot vonka zoč se duperala vidrijuola
od čega je bižola ko javal od tamjana.
Znala se zaplest i u voršu, a ćapovala se i na tunju,
ča se zove mota, na koju se vieže kosmieja.

Za dite ča je palo u more rekli bismo da je „ujo hubotnicu“
i tuo bi mu se bidnemu reklo
i posli nego ča bi se doma probuklo.

Po osušenima hubotnicima u gajeti spugorih
znali smo i kakovo se vrime parićoje:
kad bidu oni duošli uz rivu ni bilo potriba gledot u nebo i muore,
jerbo je tuo bi siguri sinjol da će bit kruto slabo vrime.

Da judi nisu vidili na hubotnici toko trokih i čupkih
ne bidu znali učinit daržave ča ko hubotnice
daržidu svoje podanike fiermo
i od njih vučedu šuolde za punit bužete.



A za onu hubotnicu ča smo je vidili u Saboru
ne znomo dobro kakova je bila, jerbo smo je vidili
somo priko televizije, a pari se
da se njiezini troki još dondanas tamo rastiežedu.

Autor: Dinko Matković
Autorov blog: Insulano

Prošti: Geomir
Fotografije: sa interneta

Manje poznate riči:
dopokon = napokon
pensali = mislili
kaštigat i strašinat = kaznit i strašit
isti opinijun = isto mišljenje
duperat = koristiti
perikul = opasnost
apožito bokuni = naročito komadi
na veće muodih = na više načina
šieto = šeta
rapu = rupu
zoč se duperala vidrijuola = za što se koristila modro galica
vieže kosmieja = veže raka
kruto slabo vrime = veoma loše vrijeme
parićoje = sprema
toko trokih i čupkih = toliko krakova i prianjaljki
a pari se = a izgleda

P.S.
Interesantno je pogledati koliko je ovo stvorenje inteligentno!!
OVDJE i OVDJE