geomir

PANODA

Ovo djelo je plod fikcije. svaka sličnost sa stvarnim osobama i događajima slučajna je.

Kliknuti na link i slušati originalni izgovor teksta


I u ono vrime govorilo se „kruh naš svakdašnji“,
ča hoće reć da je od kruha bilo potriba svaki don.
Ma kako je u famejima bilo puno justih,
a za novo vino u bačvi tukalo je čekot cilo godišće,
potriba je bila molit - apožito 2–3 miseca prin jematve -
manje Boga, a veće targuovce,
da bidu se smilovoli i stavili u dug koju vriću mukie.
Žienske su misile turte u kopanjima i pekle kruh u pećima,
ma somo jedonput na šetemonu
da bi kruh otvordi i da ga se ča manje ji.



Da bidu naložile ogonj na komin mame i none
su išle do suside za vaziest žeravu u suhi cimij,
jerbo je tukalo zašparenjat furmin,
puhale su u žeravu dok se cimij ne razgori,
i tako užegle ogonj na komin.

Isikle bidu na bokune suhi kruh u vodu,
u kojuoj je bilo malo maslinovega uja i soli,
i stavili lopižicu u žeravu ili tećicu na trinoge
i tako bidu iskuhole panodu,
koju je bilo lipje vidit i slaje jist
kad bi se u nju izrizola i čarnjeno pomiduora.




Pametnije mame su dovale dici panodu izjutra,
jerbo ni bilo obilato kozjega i ovčjega mlika.
Ako je i bilo mlika, onako friško pomuženo,
dici ni lipo vonjalo pok bi mater
stavila u žmul mlika žicu čornega vina,
i tuo se zvola hmutica, ča bi dica slolko popili.

Dica bi slotko izila i pjatić teple panodice
puno slaje nego ča sad izvicijona dica
jidu čokolino, frutolino ili medolino.
Posli pjata panode bi si sigur da ti se tega dona
tarbuh nieće prilipit za škina.



A kad je rič o kruhu i panodi,
kurijuoža je stvor da imomo puno Tomislava,
Mislava, Krunoslava, Vjekoslava
i drugih … slava i slavnih, a da još ni
ni jednemu ćaći i ni jednuoj mami palo napamet
da sinu stavi lipo ime - Kruhoslav.



Ma i u ono vrime bilo je panode ča se ni kuhola na kominu
zose i svoju fameju nego za druge.
I ondar je bilo /ne/judih ča bidu činili panodu bez lopižic i tećih.
I tako je bilo panode za vrime izborih,
za izbor poteštota, panode s partitima na vlasti,
panoda s particelima, i dohuodkon (ča se dovo gospodorima pojih),
s porezon daržavi, panoda sa sansirima i targuovcima,
a i drugih većih i manjih privarih i skondalih.

A da ne govorimo obo današnjon panodi
ča non je činidu svukuda di guod gledoš,
a i tuo non još svaki uboga don pokažijedu na televiziju.



I na kraju moremo reć
da je panodu i tad i sad bilo dobro jist, ........ ma ne i kusat.


Autor: Dinko Matković
Autorov blog: Insulano

prošti: Geomir
foto: Geomir


Manje poznate riči:

Panoda = popara
tukalo zašparenjat furmin = trebalo uštedjeti šibicu
apožito = naročito
vriću mukie = vreću vrašna
za vaziest = da uzmu
cimij = smilje
žmul = čaša
izvicijona dica = razmažena djeca
kurijuoža je stvor = interesantna je stvar
zose i svoju fameju = za sebe i svoju obitelj