BAČA MATO V PEČUHU
Drage moje pajdašice i pajdaši, već se dugo spravljam, da vam spripovedam, kak sem ja, vaš pitomački Bača Mato letos bil na izletu vu Pečuhu v Mađarskoj. Dodijalo mi je stalno biti doma i v Maru buljeti, pak sem se raspištoljil i prikrpal izletnikima kaj su z avutobusom išli na organizerani izlet. Dok sem sel v njijov avutobus skontal sem da tam ima sveta ne samo z Hrvatske nek i z okolnijov držav. Si oni su bili "oboružani" z velikema skupema foto aparatima i kamerama. Ja sem siromak, samo gledel kak se oni igraju z tema svojema igračkama, a ja svojega posuđenoga maloga aparateka nesem se ufal ni pokazati toj gopspodi. Bojal sem se da mi se ne budu smejali. V Pečuhu šofer nas je dopeljal na skorom najvekši breg v stari del grada, blizo Kaptola. Tu smo se zrinuli van z avutobusa, a vodič je rekel – sad ite kam očete, slikajte i delajte kaj očete, a v tri vure popolne dojdite tu k avutobusu, kaj pemo doma. Na takvoga nekaj ja nesem bil spremen. Počel sem briguvati. Božeg dragi, kaj bu z menom? Pak ja od te gospode malo koga poznam. Kaj ako se zgubim vu tem velikomu gradu? Ko bu mene bogca tu našel? Al vremena za spremišljanje neje bilo. Družina od okre 35 ljudi, kaj ženski kaj muškijov, za čas se je rasprlantala po gradu. Raztepli su se kak listje dok ga v jesen veter nosi. Nestali su spred mojijov joči, saki na svoju stranu. Ja sem se odma prišljisal jenoj maloj grupi i mislil sem si – strela boža od ovijov me niko nebu raskoljil. Ako me ovi ostave ja bum spropal. Ko me bu našel v temu velikomu gradu?- Skupa sem z njema došel na nekakov veliki trg. Rekli su da je to pečuhski Kaptol. Si skupa išli smo po nekakvema visokema štengama, da bi ondar došli na veliki ravni plac. Tu sem spazil čoveka napravljenoga od sprepljetene žice. To se je Franc List nagledaval z svoje rodne iže, tak sem bil vpučen. V tem kvartu na najlepšemu mestu bila je velika stara bazilika s pet tornjov po kojema je, rekli su mi, Pečuh negdar zdavna dobil ime. Nuz to su mi ti moji pajdaši rekli da su si oni tu već bili. Kak ja te lepote nigdar nesem videl, a vi znate da sem znatiželjen kak nebeski mesec, vputil sem se to videti. Kaj sem drugo i mogel? Lepo je to i bormeš se ima kaj za videti. Samo, brati dragi, dok sem ja z tijov katakombi zišel van na sunce, od moje družine z avutobusa više ne bilo ni traga ni glasa. Si su se razišli kak rakova deca. Bormeš sem si gadno počel zmišljati kaj bu sad z menom? Ondar sem glavu zdigel kak puran dok kani iti – bulj, bulj…, pak sem rekel - Kud si Turci tud i vaš Bača Mato. Motal sem se po Pečuhu, kak pezdec po turu. Okre mene je bilo turistov ko zna otkud se, al zmed sega toga sveta, ja sem bil sam, kak prst. Španceral sem se po gradu. Nabasal sem na nekakvu vuljicu punu lokotov. Potlem dok sem pital kaj je to, rekli su mi da je to delo zaljubljenijov parov kaj su se prije venčanja tu došli zareči na večnu ljubav i ostavili svoje zaklučane lokote. Videl sem kipe, cirkve, kule, muzeje, dučane pune robe, al z malo mušterij kaje bi to kupuvale. Sem si mislil – oni su u Evropskoj uniji, mortim je to nama za mustru. Sečam se bila je sobota pak je i avutov na vuljici bilo nekek malo. Študeral sem, gruntal, samuval, a imal sem vremena, pak sem si mislil da je i Mađarima skup benzin. Ondar sem se z visokoga brega spustil v nižeše vulice v gradu. Potlem sem pak išel v breg i tam okre dve vure popolne spazim ja našega avutobusa. Je, od dve do tri vure popolne još je cela vura. Avutobus je bil zaprt, pak sem odlučil još malo odati po gradu, da tu vuru nekak zatrajbam. Zmislil sem si da bum još malo razgledal Kaptola z gornje stranu. Tak vam se ja španceram, kak posran golub, po Kaptolu, okre te valjdar najvekše cirkve v gradu, kad najemput spazim ja nekaka velika visoka vrata. Kolko sem videl, napravljena su bila od debeloga crnoga drva, na kojema su švarbom napravljene strele, koplja i kaj ja znam kaj još se ne.Vrata su bila otprta, lepo su se nijala na pantima i zvala me z vuljice k sebi. Z druge strane vrat moje joči su zgledale takve lepote kakve si ni v najlepšoj senji nemrete zmisliti. V nutri je bil srednjovekovni, prelepi stari perivoj. Potlem sem čul da se to tak zove. Bilo je tu najlepšega cvetja i grmlja sijov feli.
Cvele su i dišale šipkovaće, oliti crlene ruže. Z starijov fontani, prav za prav, prelepi kamenitijov kipov tekla je u okrugla jezerca, čista bistra voda. Se, to, me je vleklo k sebi, kak čmele na med. Ko bi mogel vujti takvoj silnoj lepoti? Kak se razme, došel sem v nuter. Ja sem se vuto zagledel, kak tele v nova vrata, a noge su same išle se dalje i dalje. Tak sem došel v jeden čošek toga parka, koj je bil tak lep kaj sem mislil da sem v raju. Okre visoke vode kaj je štrkljala v zrak raslo je v redu okre deset preveč lepijov agavi. Se su bile vekše neg ja. To kaj sem videl, vele da se zove botanički vrt, kad je bilo sakakvoga niskoga grmlja i cvetja. Bila je to milina, da ti joči van skoče od silne dragošće. Tu sem zvadil z žepa svojga maloga aparatljina pak sem napravil slike koje i vi sad gledite. Celoga toga ograđenoga dvora, v kojem je v jenem čošku bilo puno avutov, v drugom starijov kameni kipov, starcov, kaj su se tu počivali. Ondar mi se preblješčalo pred jočima i setil sem se da je vreme da ja od otud zidem van. Tak zanesen kak pustinjak, došel sem pred ona ista visoka vrata, kaj bi zišel z toga velikoga dvora van. Brati dragi, kaj mislite kaj sem spazil? Velika vrata kaj su se zibala i domamila me v dvor, bila su čvrsto zaprta i zasunjena z debelem drvenem zasunom na struju. Gledim ja vrata, mortim su ona gledela i mene. Gledim zasuna. Gledim na vuru. A kaj sad? Kak bum ja z toga prelepoga dvora zišel van? Se sem spregledal, zopipal, zpreodal i znal sem samo jeno: Zaprt sem v rešt v prelepem parku, sam, samcat kak Job i nikak si nemrem pomoći.
A kaj bu sad? Ko me bu z toga rešta zvadil? Plot je bil cigleni, meter debel, visok okre dva metra, a ja trifrtaljec. Kaj da delam? Na jenem mestu našel sem nakakva nova vrata polešce naslonjena na zid spram vuljice. Spuzam ja gore, al kaj mi to vredi. Dignem visoko ruku, a ona dosegne do vrja ograde. Mene znutra, van niko nemre ni čuti ni videti. Moj prelepi perivoj preobrnul se je v srednjeveki rešt, z kojega nikak nemrem vlesti van. Samo sem se mogel bogu moliti da me stoga rešta zvadi. Počel sem stiskati nekakve gumbe na stuji na visokema vratima. Tri put je zažvenčala sirena po gradu. Ni to nikaj neje pomoglo. Najemput vutema mukama i jadima, spazim ja zmed zida i tijov visoki vrat, reška deset cm širokoga. Mene čez njega niko neje mogel videti, al zato sem ja spazil nekakve ljude kak idu po vuljici. Vičem ja njima – ljudi ja sem turist, zaprt sem. Zašel sem vnuter i sad nemrem van. Prosim vas pomognite mi -. Divanili su se po hrvatski i primetil sem da su me čuli, al su zbrisali, kak megla v proleće. Skorom sem se rasplakal od muke. Nesem se više odvajal od luknje v pljotu. Tak sem bil sreten dok sem pak za neko vreme spazil čoveka i ženu, kaj su se divanili ne baš dobro, al ipak po hrvatski. – Oslobodite me ljudi z ovoga rešta, kak boga sem prosil – počel sem vikati z nutra. Ja sem z Hrvatske. Tu sem samo turist i bu me ostavil avutobus. Nikaj bez bože pomoći. Ljudi su zastali i šteli su čuti moje jade. Divanili su se tu i z nekakvom susedom koja jem se javila prek puta. Čul sem da je ta suseda rekla da tu, gdi sem ja bil, idu turisti, koji se prvo najave. Tu mora biti nekakov porter koj bu otprl ta vrata. Neje me napušćala nada da me ti dobri ljudi nebudu ostavili bez pomoći i da glede da mi pomoru. Ja sem se z njema divanil i zadržaval je da me ne ostave samoga. Rekli su mi da žive v Batini na Mađarskoj strani i da su Hrvati. Dok smo tak pripovedali, pred vrata je došel i stal jeden gospon v avutu. On je stisnul nekakvoga gumba. Moja zarobljenička vrata su se rasprla i ja sem, kak tica z krletke, zletel na slobodu. Kak bez duše nabežal sem v naš avutobus. Neko bi mogel misliti da sem se ja v Pečuhu zgubil. Nesem, brati dragi. Ja sem bil zaprt. Presreten sam bil dok sem se vrnul k mojoj ženi v Pitomaču. Itak mi je v našoj Hrvatskoj najlepše na svetu. Celem putom v avutobusu prema domu sećal sem se i počkoma govoril onu Gunduličevu - O mila o draga o slatka slobodo -.
Vaš Bača Mato
|