ma ča je sve došlo na ovi svit judi moji!
gledam ove današnje ženske…mlade, stare, poznate, nepoznate…glavna in okupacija punit justa, sise, gujice i ča sve već ne nikin silikonima…
e, znan da je oduvik žensko čeljade nekog đavla tokalo punit…
nekad je to bija sić s vodon ča su ga išle punit na izvor, čatrnju oli fontanu pa ga elegantno nosile na glavi doma…
punila su i barila vinon pa i' prteć na leđima nosila žednin težacima u vrila litnja doba…
svaki dan bi morale punit gladna dičja justa barenko mrvon kruva i mermelade, o radnoj muškoj čeljadi da ne govorin…
dojiljama su prsi bile pune od mlika - ranile svoje, dikad koje tuđe dite...
za gladne sinove, muževe, divere punia se bronzin oli sa ribon i kunplirima, oli sa kupuson i kaštradinon, oli sa puron prelivenon kokošjin tingulon - pjat je triba bit napunjen za dat force, a i čašu je tribalo napunit bevandon…
bili su tada i bavuli punjeni divojačkon spremon čekajući dan da i' mlada spoža odnese u mužev dom…
divojačke su parsi bile punjene čežnjom za dragin ča je poša navigavat na daleka nepoznata mora…
majčine oči punile su se suzama dok je ispraćala sina u rat…
ženama su ruke uvik bile pune posla - kuvanja, spremanja, kopanja, krpanja…
ženino je srce uvik bilo puno jubavi - mazile su dicu po malin glavušicama, šumprešale košuje i gače, njegovale bolesne starce…
zašta danas ženske samo pune justa, sise, gujice?
zašta ne punidu svoje glave?
gren ča radit, ispunit normu…
voli vas sve vaša
kaše
(i punjene i nepunjene )
|
