... da ne zamirite, i ja san, davno, obaša cilu županiju, i šire, sa mlaznicon u ruci i brentačon na kostima, ma koliko mi šutjeli o tome ...
E, i zaboravija san napisat, član sam DVD "Mladost" čin san uspija nagovorit mater da mi se potpiše na pristupnicu, od 1977. godine.
Navalno vozilo ... zvuči li van ovo malo, ono, zastrašujuće/agresivno/whatever?
Ne znan kako bi van to objasnija ono, da svak more razumit; navalno vozilo gre prvo na požar, tuče sa svin ča jema, dokle ne dođe pojačanje, bilo u ljudstvu bilo u tehnici ... ili koja dodatna cisterna za napojit žedne rezervoare
Ili još bolje, da van objasnin ričima jednoga mulca (klinca, za sjevernjake) koji od 16 godin ka profesionalac dežura za MIS ka vatrogasac, i izlazi iz Doma DVD Mladost u vatrogasnome vlaku, naprid komandno vozilo (sad bi se reklo zapovjedno), pa spomenuta navalna, pa za njima cisterna ako nestane vode. Da, ja san bija ti mulac, to mi je bija prvi posal u životu, i da, sidija san u navalnima.
Malo je reč da san se osjeća ka Steve McQueen ili barenko na Paul Newman, jerbo smo se onda svi ložili na film Pakleni Toranj
Odonda je mašo vrimena prošlo, zgradili smo vatrogasni dom sa svin popratnin sadržajima, i za ona doba, u mraku, jemali smo sasvin pristojan vozni park ... ali onda se malo ka zastalo, prid zoru, prije nego je svanilo ... iz objektivni i subjektivni razloga, dugo nismo dobili ništa novoga ... kažu, ne more se!
A drugi su mogli
Ikskjuz maj frenč, 'ebe me se za druge ... doduše nismo na noge išli gasit, a bome nismo ni jemali navalnoga Fiću, ka DVD Kučiće ...
Zapravo, kupili bi mi tu i tamo koje vozilo oli cisternu, dobili smo od Republike Hrvatske 2008. g. tehničko vozilo na šasiji Mercedes Atego kojega smo svojin sredstvima priuredili u NAVALNO vozilo ... ali ono pravo, ROĐENO navalno vozilo smo čekali od 1986. kad je zadnji novak kupljen za DVD Mladost sredstvima SIZ-a za zaštitu od požara.
I tako, malo pomalo, ujedinjenin naporima Republike Hrvatske, Županije i lokalne uprave nikidan je u naše dvorište doletija pravi kapitalac
(Video: Joško Šarić)
Priredili smo mu pravi doček isprid garaža ...
(photo: Bruno Jurić)
(photo: Bruno Jurić)
Doša san povirit u subotu, kad je fešta prošla. Snimit našu novu MLADOST JEDAN na miru, u ladovini garaže...
Pravi pravcati svemirski brod, rekli bi pjesnički nastrojeni među nama „kuva kafu, čuva dicu ... nastavak znate“
Fala najlipša SVIMA ča jemadu prste u nabavi ovega lipotana, ne bi sad nabraja, jer znan da bi sigurno koga zaboravija
I neka ča duže vrimena odmara u garaži, da se ne vere po ovin našin dalmatinskin požarištima
Zdravi i veseli bili!!!
