Ili kako lipo piše na plakatu, ka podnaslov: "Ko preživi, pričat će"
Oli je to mala stvar, u današnje doba, da neka neprofitna udruga, doživi DVADESET godin kontinuiranoga rada ...
Bilo je tot svega, i beštimji, i štufavanja, i "gren ja ča", i petavanja "rogi čačini i materini" jedni drugima, ali poslin bi se opet skupili, kako mi volimo reč, "oko jednoga šćapa" i nastavili dalje.
Naravno da govorin, među ostalin, i iz osobnoga primjera ... jedne godine san se i ja štica, pa iša ća ... ali kad san vidija ča su mi učinili od "Mašogadura" odma san se dogodine vratija nazad. Zašto san iša? Zašto san se vratija?
Reka bi van moj kum @pechina "A kad van neću reč!"
Neću sad u detalje, ali bilo je malo i dišpeta ... ne mora bit uvik po onoj "došli divji pa istirali pitome" ... i tako smo sad opet svi na jarpi, jerbo triba dostojno profeštat godišnjicu 
Jedan od komadići velikoga mozaika proslave je i predstava "Stayin' Alive"
A ko će je učinit, organizirat, režirat i sve ostalo ... nego naša Marijana Vulas. Fala Bogu, nije jon prvi put ... činila je ona sa nan predstave ka ča su "Zvizde Plešu" i mnoge druge ... ali ovi put, barenko ča san ja, ono malo, vidija ... pribacila je samu sebe!
Ne smin puno ni govorit, evo di koja slika sa probe bez kostima ...
Marijana je budno, na podan pozornice, pazila je li sve kako su se dogovorili ...
A onda su se redali više ili manje školovani plesači i glumci ...
... a bome ni glumice/plesačice ... ali one su malo sramežjive, pa se nisu tile slikavat. A i nije baza da sad sve otkrijemo 
Ko ne zna, ko je prispija sa strane, reka bi da je to neki uigrani profesionalni ansambl, koji već godinama nastupa zajedno ...
I zato, lipo van na plakatu piše "Ko ne dođe, plakat će, a ko dođe isto će plakat" ... ne smin van više ništa reč, osin da nije po sridi čišćenje ogromni količina kapule, iako se ni tome ne bi iznenadija kad su naše Maškare u pitanju.
Ova subota, 23. vejače, u sedan i po pozapodne, u mašogradskome kinu .... ulaznica je samo dvadeset kun. Nemojte posli reč "nisan zna, niko mi nije reka" ... puno je selo plakati, obavijesti se šire društvenin mrižan i usmenon predajon brzinon munje ... to je bilo sinoć, u nedilju. A jutros, u ponediljak ... jema bit da je oni ča puše i diže valove noćarija, pa je jutros kasno otvorija svoje krmeljave okice.
Ne bunin se ... ne događa se baš svako jutro da je more „ka uje“ i da se moredu učinit OVAKO lipe slike
Do subote u sedan i po uvečer ... Zdravi i veseli bili!!! 
|
