Kreativno proliće
Za ne povirovat (nemreš bilivit, za sjevernjake) kako je nekome palo napamet povezat razne manifestacije ča se u Kaštiliman održavaju poza Uskrson i deboto kroz cilo proliće, dodat malo "Vegete" i na ti način boravak turistima u našen gradu ugodnijin i zanimljivijin.
Jerbo su se počeli pojavljivat sve ranije i u sve većemu broju. Furešti, ofkors  ... A pravo da van rečen, i naš domaći čovik će nać sve više razloga da učini đir, vrimena se prolipšavaju i bilo bi lipo večernju šetnju začinit sa kojin zanimljivin događanjen.
Tako je manifestacija otvorena u 9. četvrtoga u Biskupovoj palači (Podvorje, za Sućurane) predavanjen i degustacijon Kaštelanskog crljenka i spize spremljene po antičkoj recepturi
Svaka čast "Crljenku", ali mene je večeras ipak malo više zanimala spiza spremljena po starinsku.
Makar i platonski, jerbo nisan jema vrimena za detaljno degustirat, ali evo van par slika, da vidite na ča je to sličilo ...
... a evo van i dokaza da stari judi baš i nisu bili žedni, nego su i oni znali učinit dobar napitak ...
Zanimljivo, kako se ono reče, tiraš zeca a istiraš lisicu ... šetajuć malo meju exponatima, gledan ča muzej prodaje ka suvenire ... i naletin na jedan zanimjiv knjižni naslov 
Kalma bonaca
Kako je Zlato Mamino (tm) u sridu partilo na brod, preuziman sanitetske suluge. Tako me je tokalo (dopalo, za sjevernjake) vodit mater na terapiju u Kambelovac, kod Tranfića. I ča ću sad radit skoro uru i po dokle ne završi? 
Nije mi se dalo sidit u kafiću, lipo vrime, malo sunca, nigdi bave (daška vitra, za sjevernjake) pa krenen učinit đir ... najprin na Gojaču ...
Poznata zgrada, nekad restoran, pa disko ... sad je dom "Torcide Mašograd" ...
Dokle san to slikava, zamao san pa priko ova dva šćapa.
Dobro obavješteni izvori govoridu da se ovod ne vata ništa manje od sabljarke. Već čujen kako se stari Hemingwayev ribar Santiago vrti u grebu ka ventilator
Bilo je tot raznorazni brodov/kajići/whatever ...
... stari Garbinov brod ... sada Pagarov ...
... od veliki ...
... pa do oni deboto za pod ruku odnit ...
Malo vizure naše ambulante za Đardinon u prvome planu ...
... pa san moga krenit nazad ... kad su se već i zadnji ribari vraćali sa posla
Još par slik kajići isprid peškarije ...
... i polako dolazimo do treće štorije (priče, za sjevernjake)
Tulipani za Anu Rukavinu
- Filko, jesi li to na poslu? - pita me Alenka Rokov (SDP)
- A oli ti moran reč? - odgovaran spremno ...
Ne znan zašto, ali svi mislidu, kad me vidu sa fotoaparaton, da slikajen za nekoga "po zadatku"!
A ja san, kako se ono reče, "freelancer" (Slobodni strelac, za engleski nepismene) ... ili po domaću o svome poslu. Dobro, priznajen, ako naletin na koju dobru sliku završit će u "Mašogaduru" ali i to je neprofitna organizacija, je li  ....
Prolazin kraj maloga Geze, a on me pozdravlja:
- Di si, Čuto! -
Dozvizdilo mi jer objašnjavat da niman nikakove veze sa "gajnc novin elektronskin medijen", kad po sela misli da san barenko veliki dioničar  
Morat ću reč mome kumu @pechini, kad je već tako, da je red i da mi plaću poveća
Dunkve, vratimo se mi Alenki i njezinome pitanju ... zamolila me je da i slikan, a kako i ne bi, kad se radi o plemenitoj stvari, ča ne bi tribalo jemat veze sa pulitikon!
Skupljali su pineze za "Zakladu Ana Rukavina"   ...
Tulipan pet kun!!!!!
Nije ni puno ... brojin na prste, taman mi je jedna ruka dotekla ... Vinkica, Zakonita, Mater, Punica, Jelica.
Jušto san toliko pinez i jema ... pet tulipani i odo po mater sa terapije.
Odveja san je do podan skal, sad već more lagano sama uzgor
Da san jon tulipan za nju i Jelicu ... i odjaha prema "Auto Antoniju" ... meknit litnja prednja kopita na "Moju Kobilu Suzi" (tm)
Zdravi i veseli bili!!! 
|
