Rekuperacija. Oliti oporavak ... Krasnoga li razdoblja ... od 21. 10., kad je bilo 9. izlučno vatrogasno natjecanje za djecu i mladež naše županije, nikako na zelenu granu 
Ka ča san i napisa u prethodnome postu, odonda san prisilni ljevičar ... i to ne, šporkačuni, nima veze sa političkon orjentacijon, nego sa otin koju ruku duperan (služin se, za sjevernjake)
Silon prilik, mene ka dešnjaka od rođenja, tokalo je sve činit livon rukon, da van sad ne nabrajan ča sve sa njon triban činit, jerbo bi tija bit pristojan 
Dvi šetemane (sedmice, za sjevernjake) san leža u bolnici sa rastvorenon šakon/podlakticon, ka Švarceneger u prvome "Terminatoru", kad je sam sebi "popravlja" ruku. Srićon, to je izad mene, u prošli petak su me imbazdali, i u subotu poslali doma. Na oporavak. Koji gre, doduše, ali pomalo, teta dotoresa je rekla da tako i triba bit 
Jučer san čak uspija dvi beside napisat desnon rukon! Na papiru, penkalon ... A i utakmicu san gleda, previše mirakuli za jednu večer ... em su naši igrali "ka veliki", em je bija pun-puncat Maksimir, a da nisu dilili mukte šalove i kobasice. U njanci misec dan, prišli su ovi naši "kockasti" ča trčedu za mijuron put od trnja do zvizda. Ča se to prominilo u malo vrimena? Najbolje je na to pitanje odgovorija naš golman Subašić: Ča se prominilo? Izbornik!
Eto tako! I dosta o balunu. Bar do nedije ...
U međuvrimenu, kako su mi lagano proradili oni "črvi u guzici" ča mi ne dadu na miru sidit ... Prvi put san vazeja fotoaparat u ruke, posli onoga natjecanja u Lori, 21. 10. ... Umira san od straja da mi ne ispadne
Najprin jedan probni snimak, u kući, E.V.E. ... glavna "glumica" u filmu WALL-E ...
... pa san polako, bojažljivo, izaša vanka na sunce, isprid kuće, snimat jesenje kolure ...
... i ovi zaostali šipak, koji je samo pukin slučajen, zato ča san ja blesiran, dočeka duboku starost na svojoj grančici ...
... inače bi i njegovo zrnje završilo u terini na koju bi svako malo neko od ukućani navraća, bilo sa žlicon, kučerinon ... ili golin rukan, već prema afinitetima 
Pozdrav od mene, (još uvik!) lagano blesiranoga u desnu šaku, iz Zapadni (još malo!) Kaštili.
Zdravi i veseli bili!!! 
|
