Pri tri godine, kad je bila prva inkarnacija Mašokuvara, onda pompozno i pomodno nazvanoga Mašošef, bija je to pokušaj da se razbijedu, već onda u izgledu, sličnosti svake fešte, koje su se od početnoga elana i raznolikosti, pritvorili u vještinu da se nabavidu najjeftinije čevape, lepinje i piće, i kako sa najmanje liganj i sipe napravit crni rižot.
Onda se čak uspilo u žiri dovuć i suca iz pravoga Masteršefa, šjor Radovana. Kasnije, kako je kriza odgrizla svoj dil od pinez, za takve zvučne članove žirija više nije bilo uvjeti, ali nisu ni ovi naši za bacit, svi se odreda razumidu u dobru spizu, i jemadu utakmic u nogan 
Lani su pobjedili Vatrogasci, pridlani Maškare, obedvi su godine bili štufi oni ča mislidu da sve znadu i da se u sve razumidu. A koji to? A kad van neću reč! Uvik jema zli jezici, samo is poslušajte, i čut ćete upravo ono ča želite čut 
Lanjski pobjednici, DVD Mladost, nije bilo među prijavljenima, da branidu lanjsko prvo misto. Zašto? Opet, ovisi oćete li slušat zle jezike oli nećete, a meni je više nji pun kua i osansto. Zli jezikov, naravno 
Cilo lito ovo čekan, spreman se kako ću povonjat svaku teću, guštat u kulinarskin umjećima Mašograda, ali su me obaveze spriječile. Tako da san se samo na brzinu pojavija oko osan, kad je počelo, i računan izist jednu porciju i šmugnit. Nakon njuškanja po svin tećan na Rivi, odabir je pa, vrlo dalekovidno na „vinski gulaš ala Pela“, od ekipe „Veterani HNK Jadran“. Zašto dalekovidno? Pacence malo, pročitajte do kraja, enti sto!
Mislija san se ne potegnit njanci jednu sliku, na miru guštat u spizi ... ali uzalud van trud, svirači! Nisan moga njanci žlicu donit do justiju, a da mi ko ne blicne u facu. Jema bit da je svaka mona sa fotoaparaton otu veečer na Rivi svratila do mene. Ne znan jesu li se dogovorili ili je to bilo onako spontano, ali zaludu in je, nisu me baš puno uspili snervat. Samo malčice!
Nisan se da smest, i polako san dovršija svoj gulaš, a ča triba govorit, za prste polizat. Doduše, nije mi to bija službeno prvi komad spize, ali ona pohana srdela ča mi je Tica na brzinu uvalija da provan se ne rečuna 
Opet su mi planovi propali, kad san naletija do Buiša: „... ajde, provaj, ajde maši se ...“ i nudi me sa „letećon pašticadon sa njokima“. Taman malopri Edi sa menon za stolon to papa, i stalno se oblizije. Ajde, nije me Buiš triba puno nagovarat, uzeja san i to. Sa ton porcijon san bija bolje sriće, pa san je uspija na miru izist. Ne bi da san ja koja posvuduša koja se rani sa blicavanjen i kameran 
Reka je oni drugi ča je sidija do mene, najbolji centarfor Mašograda za 2013. godinu, da je to specijalna piletina iz Varaždina koja se raspada kad je samo pogledaš. Ajde Antuniću u smokve, zamalo mi se zalogaj završija u dušnik! Triba li nabrajat da san se nagušta i te „leteće pašticade“, isto ka i u onome „vinskome gulašu“. I onda san se dositija, neka mi je tribalo malo više vengo profesoru Baltazaru da mi se upali lampica!
Slučajno ili namjerno, ja san izabra spizu ča su je spremali Mande Zokićeve dica, Pela i Marija. Svaka čast, kulinarska familijo!
Sad kad san se naranija lipon spizon, i napojia Hajdukovon „PiPi“ limunadon, onda san ka triba poć doma ... ma mi vrag isto ni da mira, „naoruža“ san se aparaton, zavrnija blic i krenija slikavat okolo, samo san pazija da se svitu ne unosin u facu sa perunon u justima, jer san se na svojin špalan uvjerija kako to zna smetat.
A odakle ću krenit ako neću od časnoga žirija, u sastavu Dijana, Sandra, Zoran, Nada, Lela, a ovi na desnu bandu je, po izjavi novinarke, samo doša malo odmorit noge, i ni na koji način nije utjeca na odluku žirija ...
Za ne izgubit dobar običaj, evo malo izbliza kako je to izgledalo, gotovo, spremno za razdilit ljudima koji su nestrpljivo čekali u redu ...
Malo umjetnika od kuvanja u punoj akciji ...
... i tu i tamo kojega slučajnoga prolaznika ...
... ili košarkaškoga suca Iliju Matijevića koji je tu bija inkognito ...
Kako san već reka, spremija san se poć ranije, već malo iza devet uri, i tija san slikat ovega Sulejmana, blaženoga meju ženan na penšjunatskoj šentadi, ali su se nike pripale od fotoaparata ...
... ma neka is, i ovako se Bare neće bunit. Iša san ća, obaveze zovu, tako da nisan dočeka proglašenje. Fala Bogu, dobija san odma nakon završetka vijećanja poruku od člana žirija koja je glasila: „ ... žiri odlučio da je najbolje jelo vinski gulaš veterana Jadrana, drugi MK Uspomena i crni rižot s plodovima mora, treći KU Kampanel sa "pizdica od sipe s domaćim njokima", četvrta Torcida s orzotom ... „ Fala lipa, Dijana!
Foto: Ante Mandarić Tojo
Eto, sad, iz trećega puta, rekli bi niki, sad su napokon stvari na pravome mistu! Možda i jesu pobjedili „Veterani HNK Jadran“, ali su pravi pobjednici ove večeri ipak MANDE ZOKIĆEVE DICA, Pela i Marija.
U slast svima, neka patu oni ča in se nije dalo izač tu večer vanka, dovidova, do idućega „Mašošefa“... Zdravi i veseli bili! 
|
