Govori pametan svit da je ponavljanje majka znanja. Nemojte me sad tlačit da to napišen na latinski, ne da mi se na ovu vrućinu njanci pitat barba Googla, odnosno njegovoga rodijaka Google Translate. Ako ste baš kurijožasti, obavite to zanamisto mene. A zašto ponavljači? Vidićete do kraja, ne bojte se 
Dunkve, na ovu vručinu se i ne more izač vanka prije smiraja dana, prije vengo ona velika žuta pećica priđe do svoje posteje na zapadu i pribaci u ler-gas, pa nan malo dozvoli i disat ...
... da nas malo mola s miron da bez straja za opekotine prošetamo sebe i svoje ljubimce, koji moradu učinit ono ča i je priroda natirala ...
... makar to bilo i na čiju biciklu, ča na moju veliku žalost nisan uspija slikat. Nagleda san se u ovo malo vrimena svi vrsti najbolji čovikovi prijateji, od ovi ča san već slika, priko oni klase „pantagana“, pa do ovi, koliko-toliko normalne veličine, ča bi i neiskusno oko zaminilo za morskoga pasa ...
... dok bi koje iskusnije oko, ka ča je moje oli ovega friško ustoličenoga dida ...
... ta beštija prije asocirala na znamenitoga Floka, iz crtanoga romana naše mladosti „Komandanta Marka“. Mladi dida mi je, usput, objasnija ovo svetogrđe u doba evropskoga prvenstva u balunu:
Ča u ovoj pivskoj priči radi gajba od Coca-Cole naa stoljetnome tamarisu?
Ona je tu samo jer jema bužu (rupu, za sjevernjake) na pravo misto, pa se u njoj namisti projektor koji baca sliku na veliko platno priko puta, pa cili štekat kafića more gledat utakmicu. I slučajni putnici namjernici, hvala na pitanju.
U ugodnome razgovoru je brzo vrime proletilo, vrućina je malo popustila, pa su nan se i misli počele brže rojit. Ponovili smo jednu pozu od nazad par godin, na isto misto, samo su moje dvi prinčipese bile pinku mlaje, samo pinku, ali kafić i njegov štekat su isti: Pink Panther u Kaštel Starome ...
... a stigli smo i isprovat je li more dobro za kupanje. Rezultat je vidljiv na Vinkinome licu pa je pa dogovor da ča pri moramo poć kupit kostimić za nju, jerbo je lanjskoga, je li, prirasla ...
Vrime nan je lagano isteklo. Zadnje četvrtfinale se približilo, vajalo je poć doma.
Zdravi i veseli bili! 
|
