... da ne zamirite, i ja san, davno, obaša cilu županiju, i šire, sa mlaznicon u ruci i brentačon na kostima, ma koliko mi šutjeli o tome ...
E, i zaboravija san napisat, član sam DVD "Mladost" čin san uspija nagovorit mater da mi se potpiše na pristupnicu, od 1977. godine.
Neka san u dijaspori, zahvaljujuć dobrim ljudima i naročito dobrin jeziciman, skroz san u toku događanja u naše malo misto. Tako da san na vrime bija obavješten da se priprema HUMANITARNA predstava u kojoj najbolji rvacki meštar od improvizacije na samo sebi svojstven način priča priču o našoj svakidašnjici. Znači, jema san dva razloga da pođen. Na vrime san nabavija karte ...
... ča je bija pun pogodak, jerbo su mi se neki, ča sve činidu u zadnji momenat, požalili da nisu karte mogli nabavit. Znajuć kako su prošle nika prošla humanitarna događanja, malo me zeblo oko srca da ne bude opet njanci polak dvorane. Ali ovi put se nisan jema ča plašit. Tete i barbe iz organizacije su to pošteno rastrubile, tako da je, ka malo puti do sad, kino dvorana bila puna «do čepa».
Koliko mi je bilo drago da je Mašograd još botu pokaza koliko veliko srce jema, toliko me je i steglo u prsima kad san se sitija zašto se ovo sve radi. Čubi je svoj dil posla odradija junački, onako po svoju ...
... najpri govorin u svoje ime, a mislin i u ime velikoga broja posjetitelji te večeri u kino-dvorani. Ne pantin puno puti da se moja Vinkica ovako ismijala, a za ne falit kraj mene je sidila i diplomirana kutija za smijanje zvana Mario Miškovac, koji je između dvi provale smija beštima na mobitel, pokušavajuć potegnit koju sliku sa njin. Ne znan koliko mu je to uspilo, ali evo van samo mali dil onega ča je bilo sinoć ...
... jer, da prostite, i ja sa gušta gledat, i makar samo tu večer izbacit malo crnila iz sebe. A govoridu svi likari da je smij najbolja likarija za sve boleščine, stres i depresiju pogotovo
Naravno, posli predstave, uz «standing ovation», Čubi je strpljivo pozira sa malin ...
... i velikin obožavateljima, i pogotovo, obožavateljican
Krasan završetak ovi Uskrsni blagdani, i ne ostaje mi ništa drugo nego da van i ja svima čestitan ovi Uskrs i da van poželin, ča mislin da bi i vi volili, da ovakove predstave gremo gledat iz čiusta mira, a ne iz humanitarnih razloga.
Zdravi i veseli bili!
