Odavno već čekamo ovogodišnje maškare ... čak smo obalazili i butige od kostimi, na kraju je izbor pa na mladu indijansku squaw,
... more bit da bičve baš i nisu odgovarajuće, ka i čizme, ali na ovi led niko neće postavljat suvišna pitanja. Na kraju krajeva, jesu li maškare oli nisu  ... i jemajte uvik na pameti, da se spremamo i na turneju do Rijeke, a ko zna kako nas vrime čeka gori, teplije sigurno nije ...
Dočekali smo i tu nedilju ... spremili smo se kako triba, uz pomoć naši bivši susidi, koji su odavna ovod u dijaspori ...
... pozdravili smo se sa teton Bepinon, ča nan je radila kostime prijašnjih godina, na ulazu u gradsku dvoranu ...
... i ka ča se vidi iz priloženoga, moramo nabavit, do Rijerke, novu periku, jerbo je ovu Vinka, očito, prirasla ...
Je lipo, ovod u dijaspori, ove dane, samo triba obalazit okolo po selin i šetat sa maškara na maškare ...
A kako naša dičica uvik vridno prepišiju od roditelji, tako i oni, uz pomoć svoji vridnih teta u vrtlićima, daju svoj nemali doprinos ciloj maškaranoj euforiji u ove dane prid Korizmu.
Ovu nedilju, zadnju u prvome misecu, tribala se održat dičja maškarana povorka, sa polaskon sa Lucijina puta, pa priko Donji seli, ali, kako su se usaglasili i Vakula i domaći meteorolozi, postojala je velika opasnost da nan dica pokisnedu. E, pa da ne bi bilo povečane potrošnje šudariči, meda i Sumamadi, sve je primišćeno u Gradsku dvoranu ...
... koja je bila ispunjena skoro do zadnjega mista, isto ka da gostuje Barcelona, a ne naša domaća dičica.
Izredale su se maštovite tete i vridna dičica iz SKORO svi kaštelasnki vrtliči ...
... sve je lipo bilo pod kontrolon, sa prigodno umaškaranima voditeljican, koje je onako utiho, iz prikrajka, kontrolira meštar Miljenko pl. Kuzmanić ...
Svi su se dobro zabavili, kako i priliči vrimenu «miseca od mašaka» ... kiša nije pala, nego tek uvečer, ali ajde ti budi pametan pa u slučaju kiše organiziraj egzodus dice u dvoranu, a ovako je ispalo sve kako triba, i po onoj ...
... ko se zadnji smije ... najslaje se smije.
Update
granica 04. na 05. veljače:
Skoro da san se zaboravija pofalit, iznaša san modalitet rješenja stambenog pitanja ...
... koja godina više, neš' ti, među pravin ljudima se sve da dogovorit    
Zdravi mi i veseli bili, a Vinka i ja ujutro odosmo put Rijeke. Dičje maškare, eto nas ...
|
