A jesan se pofalija da san jedva lito dočeka ...¸bolje mi je mučat, evo, sve je deboto izgnjijalo od puste kišurine. Ajde, nije nan ništa poplavilo, ali smo se tresli, ča od munji i gromi, a ča od pravi potresi  
A tako san mislijaa poć ovi vikend odvest vinku do Metropole u Zoo, oni priko puta Maksimirskoga rugla, da ne bude zabune 
Ali vrime mi baš i nije po volji. Kiša ne fermaju ... a i Punto se ništo bija pobunija od velike vlage, ali ništa ča dobar autoelektričar u tren oka ne more riješit.
... vidi, vidi, baš lipo Puntu stoji crvena boja ... a o plavome svitlu da i ne govorin ;-)
A glede vrimena, nadan se da će se sveti Ilija smilovat do idućega vikenda pa nan poslat malo sunca, ipak je već sedmi misec a ja se doma pokrijen dekicon ... ča je ovo?
Ajde, strpiću se još malo ... isto ka ča molin i cijenjene gledatelje kviza "1 kontra 100" da izdržidu još dvi emisije ...
Pravo da van rečen, dozvizdilo je i meni ... bija san četiri puta gori, svaki put devet emisija, ako me prsti dobro služidu, to je 36 emisija, a misečno je cca 8 emisja. Ispada da san bija nazočan u cirka otprilike polak emisija ove sezone. I portir na HRT-u me je pozdravlja zadnja dva snimanja, više mu ne triban ni osobnu kaživat, a di me ovakvoga ne bi zapantija 
Znan, čin nabavin sliku od paštete, oštampaću je na majicu, jer mi po Mašograda prigovara da i je više straj i paštetu otvorit, da ne izletin 
Ponavljan, strpite se još malo, sa naglaskon na onu zadnju zadnju emisiju, fotofiniš, kraj, nima više ... a ako Vinka i ja napokon krenemo put ZG, zaobić ćemo Prisavlje u širokome luku.
A dotle jedna Vinka čuva drugu, jedan dan se gre u vrtlič a jedan dan se ne gre ...
... Zlato Mamino je prihajalo sa broda, šta je mali netijak Toni već počeja debelo koristit, pa se svaki posjet trgovačkome centru oporezuje ...
... a ja se pomalo privikavan na novu adresu. Evo i jedne prilično ažurne fotografije iz zraka ... doduše, ne vidi mi se točno misto di stojin, ali to je sve tu blizu ...
Kaštel Novi iz zraka ...
... fala lipa za sliku, Vinko ...
... i eto, pomalo, reka san van sve ča van smin reč. Jema puno lipi stvari, ali ne smin kazat ... kako bi reka Keko iz "Veloga mista" ... jer ...
... i ča bi van još triba, nacrtat?
Stojte mi dobro, i zdravi i veseli bili? 
Update:
Kako sad stvari stoje, foto finiš, olitiga zadnja emisija kviza, je odgođen za nedilju, jer je priskočen jedan termin emitiranja kviza, naravno, rič je o "1 protiv 100" ... jesu se potrudili oni u montaži, ali in je jučer, u nedilju, pobigla jedna čestitka Tarika za Dan državnosti koji je bija u četvrtak. A sad adio!
|
