Da lipoga, a kakvi će drugo bit, VInka me pustila spavat sve do devet i po, onda se pribacila na moju posteju i udri điha điha po kostima dragoga tate. Sva srića da jema samo osamnajst kili ...
Ka ča san već reka, odnosno Vinka je rekla, auto mi više ne prdi, pa je tribalo to poć iskoristit malo za maknit se ... nigdi daleko ... do Piska, recimo. Možda se čak i okupat.
Povirit prijateja Ivicu, koji doli jema kućicu, i doša je pripremit za lito ... je li ...
Mora san skupit Zakonitu sa posla, a ona je morala igrat produžetke, tako da smo se namisto na uru, uputili tek u tri ure.
I uvatija san prijateja malo na krivoj nozi, taman se sprema glumit perestrojku za sude ...
A sudeć po šestu kako je uvatija SEDAN čikar odjedan put, moga bi komodno radit i na Oktoberfestu u Minkenu, samo da malo depilira noge i obuče one flanelaste kratke gače sa tirakan ...
Danas je to ionako u modi ... ionako je na natjecanju za Euroviziju najbolje noge jema jedan transvestit ...
Mislili smo se i okupat, jesmo oprtimisti ... malo se namrgodilo vrime, pa samo nakon obida i ćakule krenili do more. E, krenili ... jema njanci dvadeset metri do more, zračne linije.
Nizdol, barenko pedeset 
Male, uske skale, pa smo i to polako salazili, usput nalazeć i lipe primjerke kaktusa, koji je taman procva ...
... i ne znan kako se zove. Majke mi. Meni je to samo kaktus. Ako će mi ko reć koji je, neću se bunit.
I ne mislin nikoga vatat u đir.
Do I make myself clear? 
A kad smo došli doli, jema san ča i vidit, ka da je ko ukreja po plaže. Od lani kad san zadnji put bija, kraća je barenko metar. Onda mi je Ivica objasnija da je to direktna posljedica tega ča je davno još jedan mudrijaš, kakvi jema svugdi, zagradija potok koji je sa Biokova donosija vodu i žalo, kad bi padala kiša. Sad voda i žalo gredu na drugo misto, a jugo radi po svoju ... rezultat je očit ...
Ali Vinku baš nije bilo briga za to, ona je samo itala kamenčiće u vodu, i nikako jon nije bilo jasno kako to tati kamenčić poskoči dva puta, a njoj odma upadne u vodu ...
Vidi se i po njezinoj robi da je bilo malo friško, pa kupanje stvarno nije dolazilo o obazir ...
... posli smo lagano odjezdili u zalazak sunca, čin san ja uspija uvatit zraka. Dunkve, lako je sać skale, triba i uzać gori  ... kod babe Vinke su je dočekale trišnje  , tako da nisan moga odolit da provan napravit remake slike od lani, 14. svibnja ...
... ista terina, ali Vinka starija godinu dan 
Dovidova, svitu, i stojte mi dobro 
|
