Eto, ka ča je i red u ova doba godine, Njezino Veličanstvo van u svojoj Poslanici želi sve najboje za nastupajuće Blagdane, a i one koji su deboto prošli, ka ča su Sveti Mikula i Sveta Lucija. E!
Skužajte ča san se opet malo ulinija, a pravo da van rečen gušta san ča mi je Šefica napokon doma , i nije mi bilo do pisanja, jerbo san svo slobodno vrime provodija sa njon . A pravo da van rečen, slobodnoga vrimena i nisan jema baš puno, jerbo Zakonita radi pozapodne. Neki su se od Vas pitali da zašto Zakonita, da to možda podrazumijeva i neku Nezakonitu  .
Čisti nedostatak poznavanja Mašogradske psihologije ... mislin, to ne piše u knjigan. Ili možda piše, ko će ga znat. Svečano, pod prisegon, izjavljujen da ne postoji Nezakonita, tako da je oni naziv Zakonita iz čiste dragosti. Taman posla, jedva izađen na kraj sa jednon, a ko bi sa dvi priživija  .
Uostalon, kod nas van je sve u kontru. Ko se od vas siča onega beka Hajduka, Milana Petrovića, ča je bija čelav ka biljarska kugla? E, pa ko se sića njega, sitit će se da su ga na Poljudu zvali Rico. A kose je jema taman ka oni Gustav iz crtanoga filma . E, to van je to o čemu govorin!
Eto, posli ovega maloga objašnjenja, da ne bi više neke od Vas dovodija u nedoumicu, da van svečano rečen ča mi se dogovilo ove dane. Lipo  i manje lipo !
Ča mi se lipo dogodilo? Dobili smo Božićnicu . Dobila je i Zakonita. A dobila je i Vinka dar za dicu. Kad već neće moć ič u vrtić vidit Dida Mraza, jerbo je previše rizično. Mislin, još se nije ni rekuperala od ošpidala. Znan da bi ona sad revala kako bi išla, jerbo nije odavna vidila ekipu, zato je boje da jon ne govorin. Ča je siguro, siguro!
A ono manje lipo ?
E, pa čestita mi je i gazda od stana prošle i nastupajuće Blagdane. Proda je stan, ča je njegovo demokratsko pravo. I ponija se ka kršćanin, pa ne moran iselit do Nove Godine, vengo milošću Božjon mogu još ostat i cili prvi misec. Amen! E neću više ništa napisat o ovome, da ne kvarin, kako se ono reče, blagdansko ozračje. Samo ću vam reč da ne triban pit kafu, jerbo mi je tlak na trista. Ja toliko!
Ali kako ono piva TBF, ništa mi neće ovi dan pokvarit  . Bija san spreman na ovi potez, pa san aktivira Plan B, a bogami i Plan C.
I još jedan put da se zafalin svima koji su se sitili moje Vinkice. Oni od koji san očekiva, a i oni od koji to baš i nisan. Iznenađenje. Ugodno!
I Fala svima. U moje i Vinkino ime! 
P.S. Uspija san napokon obavit prvi prikomorski razgovor sa SKype-om. I to sa kameron. Ako meni ne virujete, pitajte @navalnoga. Je da je bilo trči, trči pa slika ... ali bitno da smo se razumili. I vidili. I on moju Vinkicu, i ja njegovu Zakonitu. Jerbo me je mola na zvučnike, pa se morala i ona uključit u razgovor. Sva sriča da znan i nju, odavna ...
|
