umorno

28.10.2006., subota

Kof, kof, i malo domaćega, neprskanoga grozja ...

Mora san se javit, već me je iznapadalo da oli san vazeja godišnji, a judi moji, ča ću van poć govorit, nije mi bilo ništa padalo na pamet za pisat, a i ono ča bi mi padalo napamet nije za pisat rolleyes

tako da van je rezultat isti ... Ča to nije za pisat?E, oli van triba crtat ... Evo, kad san u subotu moga barenko malo duže spavat, mora san se ustat. burninmad

A bilo bi boje da nisan headbang

Ne znate ča me probudilo? Vinka. I njezin kašalj ... Nikako ga se deliberat! Fala Bogu, to su gušti iz vrtliča ... ako se dite i oporavi, infeta se od drugega. Kad je doveden ujutro, još onako sa očiman na po kopja, uvik čujen kako barenko dvoje, troje dice kašju. I onda se dodaju ka na štafetu. Projde, pa se opet uvati, pa opet. A nan roditejima ostaje samo umirat o straja. Ka lipo mi je slušat kako kašje. Molin Boga da nju pusti a mene uvati, ali očito me Oni Gori nije dobro razumija ... ni to ne pomaže. Peškali smo i Zakonita i ja niku priladu sa kašjanjen, ma Vinku još ne molaje mad

Evo, jedva čekan da malo izajde sunce, barenko na zrak da je izveden ... Srića i Bog da nima fibre, a i da je lipo vrime, posli oni nikoliko dan bljuzgave južine nut

Gledan kroz ponistru, more je ka uje ... nigdi daška vitra ... da barenko oće malo potrajat ovako.
Tija ne tija, naučija san sve službene i narodne likove protiv kašja ... te islandski lišaj ... te prospan ... te sirup od kaduje, ča ga moj pape zna skuvat ... svaki put mu ispadne boji vengo iz butige, ali ovi put mu se omaklo, malo je ka zagorija, mislin sirup, ali isto pomaže. Čekan svaki momenat da se Njezino Veličanstvo probudi, pa da dobije svoju porciju bibiti. Bilo bi boje da zobje malo grozja, ka na slici, ali ča se tu more, kad ga višje nima na trsima, ... a ove ča jema kupit u butigu paru ka da jiš plastične balunčiće.
Always looking on bright side of life ... ne, judi, nisan rebambija lud

, vengo uvik, kad mi je puna kapa, sitin se onega filma od ludi Ingleži (Brajanov život - Monty Python), a dotični tekst je piva, da prostite, Isukrst, kad je već visija na križu (je li tako, @carla). Bože mi oprosti, koje i meni pidaije padadu na pamet lud

Evo je, Njezino Veličanstvo Princeza od Mašograda se probudila. Dobre je voje, i odma je istresla igračke. Čekaj, najpri ljekove popit ... Moran odit ča, sad jeman pametnija smijeh

posla ... triba slagat kocke mah

- 07:30 - Komentari (19) - Isprintaj - #

19.10.2006., četvrtak

Usuvo manistra ... i druge priče

Rečedu zli jezici da ja sve pri oli posli okrenen na spizu njami

. A ča ću kad san taki. I vidi se, rekli bi oni ča me poznajedu osobno ... Ali, ovi put nije radi mene. Pitan ti ja svaki put Vinkicu posli vrtliča da ča in je bilo za obid. Nakon dva tri dana zaredon odgovora tipa "usuvo manistra" meni je već postalo sumjivo, pa san deboto već iša napast tete da ča in tako jednoličnu spizu spravljadu ... kad ono, da prostite, tete ni krive ni dužne, vengo je moja mala Vinka velikia laživica naughty

. Ali nije ni to bez razloga. Rekle su tete da kad zapravo bude "usuvo manistra", da je ton brzinon i gušton izi, da to još nisu ni one vidile. I ne triba jon davat, sve to ona sama smaže. Eto, prispija san jedan dan u babe Slobodne na "usuvo manistru" pa san je uspija uvatit sa kojin to ona gušton ji, i još je jedan put vadila. Evala Vinka! U slast!

A ono ča je bilo sinoc ... judi moji, niko se ni tija mašit za fotoaparat. A i nije tribalo. Našli smo se, posli pusti dogovori, @broduboci, @čuvitar, @carla_bruni i moja malenkost od 140 kg, za prvi put samo na piću, u Baletnoj školi. Meju mrižan, sideć za drvenin stolon, malo smo proćakulali, popili piće & nazdravili i daje svak svojin poslon. Nije tribalo iz nikoga vadit beside špurtilon, nije nan stala voda, tako da sad nas četvoro međusobno znamo kako ko izgleda i koliko piza, zapravo i u prinesenome značenju thumbup

A oni ča su se mislili doć, a nisu došli, neka in bude žaj. Ja in ne mogu pomoć, a neka in bude upamet za drugi put da se ne mislu puno. Niko nikoga nije izija, niko nikoga nije napada, a nismo tribali sami ni pivat jerbo se u drugi kantun prostorije skupila jedna klapa stariji pivači ča su malo zakantali za svoj gušt party

, a mi se, fala Bogu, nismo bunili. Kad ćemo opet? Nedokučivi su puti Gospodinovi rolleyes

, ja bi sutra ča se mene tiče, ali vidićemo ... @čuvitaru sritan put, a ostalima sritan, je li , ostanak wave

- 22:59 - Komentari (15) - Isprintaj - #

17.10.2006., utorak

Demonštrancjun!

Eto, da san i ja doživija da ova naša božeprosti Novina, objavi na naslovnici ništo ča i mirita (zaslužuje, op. a.) prvu stranu. Koja Novina? Neću jon njanci ime spominjat jerbo se, okad je prominila gazdu, skroz prokurbala ... Dunkve, nije ovod besida o novini ... Znate ča mi je prvo palo napamet kad san vidija naslov? Ne moreš se Smoje nikako deliberat (oslobodit, op. a.) ... Početak jedne od epizod Maloga Mista, kad je Pošćer, koji je sve vridno bilužija, pita Roka, kroz ponistru, sa koliko se slovi "N" piše demonštrancjun? Mogu mislit kako je bilo jučer zanimjivo na Rivi, letile su i ograde u more ... dobro je sve dokle ne uvalu u more i kojega majmuna, ali ne onega iz one rigotine od reklame na našoj Katedrali Hrvatskog Duha. I opet mi pokojni Smoje pa na pamet, ovi put iz justiju Njegove Svitlosti, da "kaki je ovo grad, sve bi tribalo prolit petrojen i užgat". Oho, posta san i destruktivan! Još bi, kako je sve krenilo, i ja moga u kroniku 92 dospit. Mislin da se pokojni Miljenko sad slako smije dokle u kojoj nebeskoj oštariji (gostionici, op. a.), uz srdele i botiju (bocu, op. a.) crnoga vina, gleda ča šimje (majmuni, op. a.) činidu sa njegovin gradon i kažije Svetome Petru iz kojega se kažina (bordela, javne kuće, op. a.) na vrime izvuka ...
Sića li se ko od Vas kako je parila (izgledala, op.a.) Riva pri vengo su je, bidnu, osandeset i nike godine, barbari ASFALTIRALI! Je, ali to su napravili ONI, ča su ionako za sve krivi, ča su nas ovod i doveli. Di su nas doveli? Da jedno s**nje gremo ispravit sa još većin! Sićan se onda, kad su jadnicu ASFALTIRALI, da je niko, ne mogu se sitit ko, napisa da je to ča su učinili deboto isto ka da su ARENU u Puli inkartali (ožbukali op. a) i piturali (obojali op.a.) u zeleno. Ko je to moga napisat? Ne znan, po motu bi moga bit i Smoje, a moga je to onda reć bilo ko normalan. More bit da je to onda reka i trenutačni Poteštat (gradonačelnik, op. a.) ovega napaćenoga grada. Mogla je to onda reć i teta Brankica, jema i ona utakmic u nogan ...

Znan da će se svi relevantni čimbenici (je li se to tako reče?) umrit od straja od ovoga ča san ja napisa ... ali eto, mora san ovo napisat, jerbo oću sutra mojoj maloj Vinki pogledat u oči kad me bude pitala da zašto su upropastili najlipje šetalište u Splitu ... Je ćerce, pape je reka, ali ga niko nije sluša. Meni je savjest čista, a oni šporkačuni (nečisti ljudi, op. a.) neka se mislu! Bajamontuša? E, to je nika sasvin druga priča ...

- 09:12 - Komentari (13) - Isprintaj - #

15.10.2006., nedjelja

A skoro smo i zaboravili ...

Već su mi niki prigovorili da mi se blog malo udaljija od teme, ali da provamo to malo popravit. Kako se blog "preziva" - "kako se osjeća četrdesetgodišnjak ka otac po prvi put", pa bi prema tome jema prav pisat samo o sebi. e, ali kako život ipak piše romane, i nikad ne ispadne onako kako smo miuslili. vengo kako bi dica naša tila, ovo je ispa blog o Vinki. Neka, ne bunin se. Meni drago slikavat thumbup

Zlato tatino. I sutra Zlato mamino, akoBogdazdravlja yes

.. ali, da opet ne uteknemo od teme, amo mi ovako, spominjaće se svi koji, blo po po zapovidnoj odgovornosti, bilo po slobodnome sudačkome uvjerenju, jemadu veze sa njezinin Veličanstvon.
Ka i ovo doli: spomenili smo sve o Strikanovome piru, a nismo one ča su, po zapovidnoj odgovornosti, barenko suučesnici. Znači, ako se gre na Bilice, triba i njima nosit naranče ...

Je cvitaju, a! A kako i neće, kad su se i drugoga riješili ... Baba Slobodna, koja je inače obašla sve odjele na Firulan osin psihijatrije i Božeoprosti, patologije, oti dan je stisla zube i bila je ka curica. A Dida DIne? On ionako ne govori puno, ali uvik učini Mašo (puno, puno, op.a.) Ono je bila, makar pinkicu, i njiova večer. Doduše, to ča je Dida plesa nije bija mirakul ka na mome piru, ali je sve obaveze izvršija i nije ronza. Bog in da zdravje, a i poželija bi in da i ja skoro postanen Strikan, a oni da ponovu titulu babe i dida ...
A Vinka? Di je Vinka u svemu tome? Doma. U vrtiću. Napokon je uspila spojit cilu jednu šetemanu (sedmicu, op. a.) u vrtiću. I mogu Van reć da jon se lagnje ustat ujutro vengo meni. A kako sad Zakonita radi ujutro, meni je dopala dupla muka ježova. Moran se najpri ja na vrime ustat, otvorit obadva oka, dovest se koliko-toliko u red, probudit Vinku, spremit-dat mliko, obuć je, razbudit je, snit je niza skale, jerbo i kad je budna gre nizdol po ure, uvalit u auto, odvest u vrtić/jaslice u Kaštel Gomilicu i prispit na posal. Bez make-upa i frizure. E, zaboravija san na još jedan modni detalj. Sve to triba učinit pri sedan i po, jerbo su nan na poslu uveli kartele i video nadzor, pa se sve biluži. Rekli bi zli jezici da nan tako i triba. Je, više glede toga neće patit proizvodnja i bolje mi je mučat vengo da me vučete za jezik. Eto, ja toliko, a vi kako vas voja! Zdravi mi i veseli bili, a Vinka neka gušta još ovo malo na suncu dokle se more ... mah

- 14:55 - Komentari (5) - Isprintaj - #

08.10.2006., nedjelja

Veni, Vidi, ne Viči ...

Tako je to reka pokojni Toma Bebić. Fali još samo da nacrtan oni pet olimpijski obruči od bačve, pa da Huan Antonijo Vrdoljak reče da igre moredu počet, isukrstati, e! Evo da i ja dan moj skromni prilog tome itanju sa digitalcima, te mega ovako, te kilo onako ... Da van odma rečen, zadojen san. oli zli jezici bi rekli zatrovan headbang

, tehnikon od ditinjstva, i uvik mi je bilo draže jemat "bržega" i "jačega" ... ali sa godinan počinjen više igrat na duge balune ka Asanović, a manje šprintat ka Zlatko Vujović. Još da naučin baratat lakton, di bi mi bija kraj thumbup

Moje slike ovod su mahom plod slučaja, u pravo vrime na pravo misto, jer, ponavljan, umjetnik nisan, a i tek san nedavno dobija makinjetu ča more malo više od dva na nogu učinit ... uostalon, većina ovi slik je snimjena sa staron Kodakovon raminon od dva megapixela, 2003. godište, brez zuma. Ali ka ča me je davno moj prijatej Đuro iz Siska naučija, moraš znat mogućnosti aparata i slike ispadnu kako Bog zapovida.

Podmladak Al Qaide, Maškare u Kambelovcu

... gren malo na zrak ... plaža u Maslinici, otok Šolta

Nije baš najlipša plaža na svitu, ali je moja ... Gojača, K. Sućurac

... ko govori da se samo sa bengalkan može napravit ambijent ... Poljud, Split

... mama, kupi mi bager ... Grohote, otok Šolta

... sve piše ... vol. 1, Klis Megdan

... sve piše ... vol. 2, Kaštel Sućurac

... povratak prirodi ... maškare K.Sućurac

Bonaca na Svetu Luciju ... Mašograd

... a skoro san mu mrižu razbuca ..., Krijal, otok Premuda

... ča se sve more učinit od sniga i priručnoga materijala ..., Split, na semaforu

... u šest uri ujutro poslin neprospavane noći, gledan ja njega, gleda on mene ...K. Sućurac

... vjenčanje jednog bajkera ...K. SUćurac
... i šećer, ovi, tija san reć, Njezino Veličanstvo Vinka , na kraju ...

... plač!, šmrc! ... vratite mi moju ogradicu ...K.Sućurac
... a i ovo san mora radi Vinke stavit. Zašto? Pitajte je kako se zovu ova dva labuda smijeh

... labudi u Solinu ...
Eto, ja san svoju reprezentaciju pokaza, pa vi pucajte ... valjda ću proć zeru boje vengo oni jadnici iz Andore večeras ... Dovidova! mah

P.S. A ovo je za one koji govoru da Sućurac nije ribarsko misto ...

E, sad je stvarno dosta ... Zdravi i veseli bili!

- 01:12 - Komentari (10) - Isprintaj - #

04.10.2006., srijeda

Lipoga li dana :-(

Ajme dana, judi moji! Oli još boje da rečen ajme noći. Jerbo dan još i more izać na dobro ... ali noć je definitivno crna, i CRNA, jerbo su mi tek nikidan objasnili da kad na internetu pišeš velikin sloviman, da je to ka da se zapravo DEREŠ olitiga URLAŠ. Vika bi ja, ali me od otega samo glava zaboli još i više.
Zašto crna noć? Opet san nosija podočnjake u rukan kad san odija na posal, ali ovi put, nažalost, nisan radija cilu noć, vengo nan Njezino Veličanstvo nije dalo spavat. Boli je. Kašje. Pa diko malo od kašja zapiva i Rigoletto. Ka da je u Veronu bila, i to brez bicikle. Malo fibrice, ništa zla, sad je već šoto one crvene rige ... ako Bog da zdravje sutra će u vrtić, a danas je na bolovanju. Ajme njoj! Doša san na marendu doma, donit zakonitoj spizu da ne izalazi vanka po ovoj bljutavo-kišnoj južini, a mala cila sritna kad me je vidila, skače mi u prsi i viče "sad će mene tata odvest u vrtić ..." thumbup

Ali kad san jon objasnija da danas neće u vrtlić, nego tek sutra, onda je udrila u plač. Gospe moja, najprin plače da neće u vrtić, a sad plače da neče ostat doma. Pa ko bi to razumija ... ni dragi Bog, oni ča i je od Adamova rebra stvorija :-)
Ali eto, kiši vanka, ali nije ni svako zlo zanavik, ka ča se vidi i na slici ... jerbo san prvi put u životu uspija slikat DUGU.

Znan, sad će se nać profesionalci, dobronamjerni i oni koji to nisu, pa če mi poč objašnjavat da nije vako vengo onako. Prvi moj kum Foto Munja. Biće da i jesu u pravu, ali meni je ova slika posebna, moja prva duga, nadan se ne i zadnja, a kasnije ću se već i naučit slikavat, ako sad čako i ne znan ...
Zdravi i veseli bili, jerbo ne smin nikome oko sebe reč dobar dan da ne bi dobija plesku. Južina je južina, ma koliko šutjeli o tome. mah

- 14:57 - Komentari (15) - Isprintaj - #

02.10.2006., ponedjeljak

35000 tovari i jedan pametnjaković!

Je, priznajen, bija san jučer gledat ONO na Poljudu. Zašto ONO? Zato jer ONO sve je, a balun nije. Hajduk je tuka u kornerima, a Dinamo u faulima. Iskra san se ka lupež jučer iz kuće, da Vinka ne bi skužila di smo Strikan i ja išli. I sve je bilo lipo, puno auti okićeno zastavan, truban, svircima, odsvukud ... Sve je slutilo na lipu zabavu. A i karte, "#$% bija san kupit tek u subotu, pa san mora vazest Zapad, i to sektor C, olitiga tačno do Pizdeki ... Strikan i ja smo se dogovorili da ako budu na nas itali bengalke, da će on vraćat a ja ću izvut patike pa ću i gađat sa njima, makar u Haag završija, glede korištenja bojni otrovi ...
Ušli smo uru i po prije namo, ali nije bilo dosadno, ekipa je pivala, a ne da je bilo puno, vengo je svit i na Zapadu sidija na skalan, a bilo ko ča je ikad bija na Hajduka zna ča to znači.
Neriješeno je odgovaralo jedino Dinamu. Da je Dinamo SLUčAJNO izgubija, Maminjo mora minjat trenera (koga ce stavit, Katalinića? lud

) gubi i ovo malo mira u svlačionici, Bandinjo ga vuče za uši i zatvara ZG špinu sa pinezima ... Ovo je ideala za NJIH, a i NAšI su, ne znam na čiji nagovor ili za koje pineze, pristali ... najveći je problem bija isprovocirat Carevića, a DINAMO je ionako pun "Materazzija", od Agića pa dalje ... Kad već ne smiju Francuzima to radit, nama mogu ... nekažnjeno.
E, da ne zaboravin, kad je Dinamo da gol za 2:1, nas dva smo preventivno utekli sa mista zločina nad balunon ... u zraku je mirisalo na pidaije, jadan Sudac je jedva dočeka sudit drugi elfer za Hajduka, a nadoknadu je prikinija skoro minut ranije da ne bi Hajduk SLUČAJNO da gol za 3:2 ...
A 35000 budala će opet doć na utakmicu, zanima me samo kad je Maksimir bija OVAKO ispunjen, i kad se OVAKO navijalo ... ali to su ionako nevažne priče u ciloj ovoj situaciji ...
Dokle god gledamo ovakve pidaije, sve osin baluna, dotle ćemo cvikat od raznorazni Šelburni, Okseri, da one albanske i ciparske anonimuse njanci ne spominjen.
Da je od ove dvi ka najboje hrvatske ekipe sastavit jednu, ka najboju, ne bi izdržali njanci godinu dan ni u jednoj od "ebete" liga, a da lige petice njanci ne spominjen. Muka mi je, riga mi se od onoga ča san gleda. Ne znan ko je komentira na TV, ali ako je Sušec (bilo koji) onda bi siguro povratija. Evo, sad slušan Maminjovu izjavu i ne znan kako mu ne nareste nos ka Pinokiju koliko more pricat laži i pidaije. Eto, sad kritizira Vulića da je sad bezobrazan, on, čisto oličenje Bečke škole ... Bljak! headbang

Bljuv! I još se fali da su "istukli Hajduka"
Žali bože sto kun za kartu mah

- 13:22 - Komentari (4) - Isprintaj - #

<< Prethodni mjesec | Sljedeći mjesec >>

Ovaj blog je ustupljen pod Creative Commons licencom Imenovanje-Nekomercijalno-Dijeli pod istim uvjetima.

umorno_oko

Opis bloga

Linkovi ...

Ovamo volin povirit ...

Moji E-mailovi: