Tato
Svaki dan se domislin na te
ne samo za mrtvi dan
svaki dan sidin na tvojoj ruki
ti se držin za kolet od kušulje
a ti me nosiš kako pupu ud majolike
da ne padem,
dricivaš mi lase
i kotulicu
da se ne zgričan
me nosiš u hlad
da ne žmarim,
i mi ubuvaš črlene pastoliće
da se luštram
miljare čavlići
miljune šimencini
jenega po jenega
si zatuka
da drži
da bude kripko
da bude štanjo
i je bilo
ma sada ni
uprosti mi
nis vela šinjora
ni grofica
deboto san jeno niš
a san stila te poslušati
veselo bin bila
ma nis
lumbrija
pod kujon si me nosila
me je ubranila uni bot
ud unega dažda
ma drugo je ni
uprosti mi
ti biš bija već učinija
i bolje biš bija godija
i vidija biš više svita
i na već pliesi biš pliesa
i z već judi biš se pozdravlja
i pokusija finijih jileši
i nazdravlja z lipjih mižoli
da si ima oca kako ja
ti biš ima štabelije pastole
i fešnije veštite
i biš bija bolje kumparija
da si ma oca kako ja
si mi se skuživa
rada biš mi već da
si stija ma nisi riva
pur ki si brzo prikura
samo kvas si mi da
a ja neka umisim ča ću ja
vero si
vero da
ni se mii ubiknulo
ni mi pošlo za rukon
dobro da ne vidiš
dobro da ne čuješ
dobro da ne znaš
ki zna ča biš pensa
ti biš bija još veći čovik
da si ima oca kako ja
Post je objavljen 01.11.2023. u 10:30 sati.