Marketing
KORIZMA
Pasala je nedija karnevalskog ludovanja od Lovrana sve doli do Paga, sve je utihnulo, koda se cekalo da sve ferma i da se judi malo odmoriju i da se parićaju za "Korizmu". Cera smo se našli u grad na kafu nas dva i prijateji. Doša je ugrad sa ženon.
- Dobar dan gospođo, ku čast imamo da ste nam i Vi došla u posjetu.
- Baš san došla u posjetu, njega pušćan neka sa vamin pije kafu a ja gren po butigamin.
- Jesi cu Bebiću, je ti serce namisto?
- Cu san. Danas ćemo mira imat vidiš da nanka maške nima ugrad.
- Ca te briga, ca ni boje ovako?
- Je boje je. Sedimo ovde na sunce, ki će bit uhlad, vidiš da i puše.
Nakon ca smo seli i zauzeli pozicije, narucili piće, mogli smo pocet sa govorima. Znan da će danas sve biti na tapetu, i maškare, i politika i sport, ma sve.
- Jesi vidi Bebiću parti je Koprivnikar, još jedan veliki riječki sportaš.
- Je vidi san, bio san član Skupštine Riječkog sportskog saveza kada je on bi predsjednik i on je našu Udrugu primi u tu zajednicu sporta. Znali smo se i sa bazena, to njegovo društvo san jako dobro zna, i Joba i Tombu i Ćira.
- Ti si veliki covik, čast mi je bit stobon u društvo.
- Ca si misli da san ja lular, vidiš ki me sve pozdravjaju.
- Onda, naslikiva si se. Ca te briga, ima si ti akreditaciju i moga si cint ca te voja. Moran Ti reć da bi se više mora družit sa barba Ostojićem da te još malo poduci slikivat, vidim da si napredova od kada si sa njin u društvo.
- Ja se ne bojin ucit, jer ja nisan kako i Ti, ki sve znaš.
- Ca nisi poša u Pag slikivat? Jesi vidi na ca lići karneval u Pag. Di se svas taj narod zgubi? Na Vodice, kako i Ti? Još je Škofunaro piva "Robinju".
- Da san moga poć sigurno bi poša u Pag. Žal je i meni da je malo svita, da grad više ni ca je nekad bi u zimskon karnevalu. Više ugrad niki ne žive, i to Ti je to. Prije su Paškinje baren pošpijat došle na kantun ili ca in ćere ciniju, danas više toga nima. Onoga kolorita po kantunima pijace više nima i to moramo prihvatiti kao tako. Ca se "Robinje" tiće, ja ne odlucujen ki će pivat Robinju. Ako su oni tako odlucili neka tako bude, najvažnije je samo da se tradicija oderžala. Bila je televizija pa se tribalo pokazat. Ali ni ni to nevajano.
- Fali Stipe Koren !
- Koga nima receju da se bez njega može, ali je jedna istina ca si reka da taj covik fali i da je on u "Baš me briga" puno toga bi unaprid predvidi i zapisa, samo ca to niki više ne čita. Šteta. Mi kao da se cramimo povijesti. Ca misliš da ovi ca danas ciniju carataniju od karnevala nećeju stit bit del povijesti. Ja Ti govorin da sigurno očeju, a Ti govori ca očeš. Neće pisat da san ja piva Robinju, nego Ivo Fabijanić. Ovo godišće su slavili dvajset godišć "Škojovizije", ca misliš ca će bit za drugih dvajset godišć, izdat će monografiju.
- Pa ca je tebi krivo?
- Ne, Bože sačuvaj, ja samo govorin da se ne smimo i ne cramimo povijesti, ni karneval poce od njih danaska, jer između Paga i karnevala možeš staviti znak jednakosti. Cekan dan kada će se neki uvatit toga posla i napisat jednu cjelovitu knjigu o paškon karnevalu.
- Zato si se onako napisa o barbi Madoni, da ga povijest ne pojde.
- Ni on meni barba, nego mojoj materi, a mi smo u fameji svi jako ponosni ca je on bi del te fameje i kada se već ne trudiju oni ki bi morali, onda se baren mi iz fameje moramo potrudit da ga se ne zaboravi. Ca Ti misliš da njemu ni misto meju tih 101. Pažanina kih san ja zibra i za kih mislin da ih tribalo u Pag štovat.
- Ja Bebiću moj mislin da on već sada zaslužuje bit više tamo nego neki o kima si pisa.
- Pustimo judima neka imaju svoj sud o tome. Ja Ti samo govorin da ovo ni nimalo laki posal, da drugacije ne recen u ca san se uvali, ali neću stat na pol puta. Bit će ih sto i jedan pa makar se ja više ne zva Branimir-Bebić, samo strpljenja. Cekan da mi i neki judi u tome pomogneju, najprije fameje od nekih judi o kima ću pisat, da mi daju prave podatke. Ja se nadan da će tako bit.
- Za ki dan ću napisat o coviku ki je bliski rod sa barbon Madonon kako si Ti reka.
- Cekan, da vidim ki će to covik bit.
- Za ki dan ćeš pročitat, pa ćemo se opet karat.
Korzo ni danaska bilo puno svita kako i ovi dani. Karneval je ucini svoje. Svi su uzeli malo odmora. Tribalo je ono izdurat. Kako je i Mateo bi smanon, a on nidi nima mira više od pol ure, cudi san se kako je ovu uru vrimena zdura. Pred namim je Korizma, triba se pripravit za to.
- Čega si se odreka za Korizmu?
- Jebi se ti i Korizma.
- Ja Te lipo pitan, a Ti si odma spreman za boj. Gren ja doma boje mi je nego se ovde nastavit karat sa Tobon.
- Odi ća, boje ti je.
Tako je prošlo još jedno naše subotnje druženje uz kafu i čakule. Znan da sada ceka ca ću napisat da me more odma zvat i iskritizirat sve ca san napisa. Sve jedno sam mu zapiva prije nego smo partili pismu od Grdovića, "Da Te nima". Bilo mu je drago.
Post je objavljen 10.03.2019. u 15:17 sati.