Marketing
SITNOSOPSTVENIK
Judi ki se javjaju me pitaju ca ti je sa prijatejon, ne pišeš više ništa o njemu, čak san dobi i poruku da kada u Riku pijen kafu sa njin, da ca se dinjan popit i kafu sa ton prijatejicon. Ma, dajte judi moji, nima dana da se ne cujemo, baren na minutu, sve zna i tenta svaki dan. Svaki dan bi moga jedan post posvetit njemu i njegovim podmetanjima. Radi njega me je Gligora stavi u svoju kolumnu u Zadarskom listu.
- Sitnosopstveniku vidiš kako ti Gligora diže popularnost, više te nikad neću pitat ako si vidi da je dobi nagradu za sir. U Zadrski list si sverši, ali ne radi sira, nego radi čipke, sve napak.
- Neka njega i njegovog pisanja, triba imat obraza za drugoga popjucat bez da imaš razloga. Vidi si i sam da se ja u njega nisan dira, a on je mene napa koda san zadnji razbojnik, koda sam mu sir ukra. A, ca se čipke tiće, tu ću se borit do zadnje kapi kervi, a Gligora i njemu slični mogu perdit koliko god očeju.
- To Bebiću, slažen se sa Tobon za svaku besedu ku si napisa za čipku. Ja jako dobro znan u našim razgovorima koliko si ti po pitanju toga doma i tome se jedan put mora stat na kraj. Ca ti barba Ivo Madona ima manje prava zalipit čipku na sir. Baren ti se nana Kate našila tih čipki i to koliko put san doša u Studeno da san je naša kako šije. Zna san je reć:- teta Kate nikad mira nimate, ca se malo ne odmorite. Ona bi mi odgovorila:- sinu moj, ovo je meni odmor.
- Ti jako dobro znaš da svaki coban ima svoj bilig koga mora stavit na sir i to je jedina garancija da je to njegov sir i garancija kvalitete tog istog sira. Tako je i sa Parmezanon. Na Parmezanu je samo bilig ki ga je ucini, nikakve etikete na tom siru nećeš nać. Hvala Bogu svi znamo da je Parmezan jedan od najbojih ovčijih sireva na svitu.
- O tome nisan nikad misli, ali sada kada govoriš ne mogu se spametit da li oni lipiju etikete na sir ili ne. Cini mi se da si u pravu.
- Provjeri pa mi se javi.
- Uživaš u paškom kulturnom litu?!
- Imaš raznosvrsnu kulturnu ponudu pa možeš uživat, recimo brudetijada, pa etno večer, pa srednjovjekovni sajam, pa dani kolacića i baškotinov, to ti je sve kulturna ponuda na ton kako ti govoriš, paškon kulturnom litu.
- Bi si na izložbu Jelkice Mujšike.
- To je jedino ca je vridilo i Jelkici kapa do tloha. Razumin ja kako se u Pag govori, ali njoj svaka čast ca prkosi i gre naprid. Ja kulturu malo drugacije doživljavan od nabrojenoga.
- Upozna si Šibenčanina u Pag pa ti je serce namisto.
- To je velika vridnost za mene. Upoznat tog covika je više od kulturnog paškog lita. Vidiš da se oni nisu spametili ton coviku posvetit malo prostora na paškon kulturnom litu. Covik je ima svoju vecer na splitskom festivalu, a li ca je splitski festival za paško kulturno lito?!
- Bogami, kada san pročita ca je sve covik napisa, nisan verova pa san ša provjerit na Internet, jer ja tebi svaku ne verujen i stvarno sve te pisme, kako si ono malo prije reka:-kapa do tloha. Crićujen ja toga covika u Pag i vidin ga ki put u Valentina da popije bićerin kako si napisa, ali nisan zna da je to toliko veliko ime hervatske estrade. Dalmacijaaaa u mom oku!
- Di more Dalmacija bit u tvon oku kad si ćorav.
- Vidiš kako si mato-malicijozo, samo da ti je podbost i onda bi sti da te judi begenaju. I tebi će oci iskopat ako ovako nastaviš. Bebiću, pamet uglavu.
- Ne baculaj ti za mene, ja u Pag nikome nisan osta dužan da bi me moga za rukav potezat, a da su šegaviji mogli bi imat kulturni spomenik za ono ca in godišće dan nudim i ca bi svaki pametan sa oba dvi ruke uze, a oni od toga bižiju ka vrag od tamijana.
- Ca in ti to nudiš?
- Kada dojde vrime za to ti ćeš pervi znat.
- Cekan i to iznenađenjeeee, kako je reka onaj štrumfić.
- A, baš da si štrumfić sa gemištom.
- Odi ća jer te ne mogu više ćuhat.
- I, gren, jer se sam sebi cudin ca sa tobom posla imam.
Post je objavljen 26.07.2018. u 09:47 sati.