Marketing
VRAG TI NE DA MIRA
Nakon one nevere cera isto san odluci poć do grada. Ne verujen da neće bit na Korzo. Pojde ne velu pijacu, pa malo proškiće po Korzu da vidi ca ima novog. Ne moreš falit za nać ga. Ovo mu je kako i kancelarija.
- Ca je Bebiću, doni te je vrag ugrad, jer ti ne da mira. Koga Boga stalno tentaš. Ca ti misliš da će ti ta Lokunja samo tako proć. Koštat će te to, to ti ja govorin.
- Jebe mi se i za to. Ti misliša da triba mucat. Morebit bi ja i muca da me se to ne tiće, a ovako ne morem bit miran. Žal mi je ca nisam moga doć na radnu akciju u Lokunju.
- Lipo si poca sa lipin besedami, jedan intelektualac, možeš mislit. Ca bi ti falilo da se lopate uvatiš.
- Ne Ti si intelektualac, Ti ki si celoga života u kancelariju sedi. Ja san misli da nećeš doć dograda, jer gori kod Tebe lokav više nego u Studeno. Vidiš ko društvo imaš na Korzo danaska.
- Vo je za popizdit, di gre vaj svit. Da hari krišna?!
- Ja Ti govorin da su oni falili datum, jer karneval je pasa. Da ovo lito dojdeju na litnji karneval u Pag, sa ovon karjolon, ja Ti govorin da bi bili najveća atrakcija. Ca bi ki virova da je to pokret, da je to vira. Da pokret. Da je sa njima poć u rat, ne bi došli nanka do Kukuljanova. Moga si se zmercit i sa njima pivat: hari hana-hari krišna-piška piška.
izvor:internet
- Da ti se zajebavat, ajme kako si maliciozan. Kako ti to odma u možjani dojde.
- A vidiš kako, danas mi je dan od ružnih besed. Nisi mi ništa reka za blago ko su našli na Mikulu.
izvor:radio pag
- Da ti buden iskren samo san nešto malo pročita o tome. Ni to loše Bebiću, samo ca će u Pag bit problem di to stavit ca budeju izvadili iz mora. Cu san da koludrice parićivaju otvorit muzej. Kada neće vlast, onda neka koludrice otvoriju, jadna in pamet.
- Pa ca si Ti kontra koludric, a kada si mi govori ca je sve paško, onda si i baškotini nabroji. Koliko namin te koludrice vridiju? Zlata, ja ti govorin.
- Imaš to pravo, ali ca svaku stvar u Pag mora potaknut crikva.
- To pitaj njih u općinu.
- Kada greš u Pag?
- Za Festival čipke.
- Nemoj aparat zaboravit. Cudin se da ga danaska nimaš sa sobom. To je zato ca Matea nima. Ca cini u Istru?
- Pobira crišnje. Ca mu fali pored deda i nane. Jedva su ga docekali.
- Ca govoriš za Gligorin sir, opet je dobi neku nagradu.
- To san Ti već jedan puta reka, da je cramota da na svoj sir lipi etikete sa paškom čipkom. Mene odma serce zaboli kada vidin da je čipku zmerci smašću i da niki ništa ne govori. Svi se ponosiju sa velikim uspjesima Gligore. Neka njemu njegovih sirov, samo neka ne lipi čipku na te sireve, jer je to svetogrđe. A, to ca on tlapi da je to reklama čipki, neka plati Udrugi čipkarica ca koristi taj logo. Ako kafići plaćaju ZAMP-u rentu za muziku, zac on nebi plati rentu ca etikete sa čipkom lipi po sirevima. I ne samo on.
izvor:radio pag
- Vidiš nikada nisan tako misli. To je istina ca govoriš, jer stvarno triba zaštitit tu našu čipku.
- Zato ja gren doli na Festival čipke, da sve to ovjekovječin.
- Morebit i ja dojden doli, pa se možda vidimo.
- Samo ćeš mi Ti falit doli. Vidiš kako vrime pasa u čakulama. Još se moran poć cimat.
- Ca?
- Cimat se, pošto ne razumiš, moran se poć ošišat, je se tako rece ervatski.
- Ki će sve besed zapametit.
- To je zato ca si se Ti cima kod Bartula Škarice.
- Ne moren verovat da se Bartula sićaš i kako Ti je on pa napamet.
- Kako se neću sićat Bartula, kada mi je bi sused.
- Ma di je tebi Bartula bi sused.
- Mi smo živili kod tete Jerke u Reje, a do nas su bili Pere i Jacinta, a kod njih je sta i Bartul Škarica.
- Ki ti možjani imaš. Ala, odi se cimat.
- I gren, ca ću ovde ćuhat Tebe i ove sa ovim karon.
- Bog!
Post je objavljen 09.06.2018. u 23:56 sati.