Pregled posta

GE-GE-TE !

Lupi san u covika, koliko me Mateo poludi, kada san diga glavu, bradon i likon on.
- Da smo stili nebimo se ovako našli, ca si u spizu doša?
- Da ti recen di san doša?
- Nemoj, boje Ti je mucat.
- Ca je mali? – obrača se Mateu, te čuha otac? – Mateo ga čudno geda.
- Ajmo na kafu dok imamo vrimena.
- Ajmo ča.

- Baš san misli na tebe, sti san te zvat, bi san kod doktora i cini nalazi pa su mi rekli da mi je ge-ge-te povišen.
- A, nisu Ti rekli da Ti se pamet povisila.
- Pa neka covik sa tobom ozbilno govori. Ja svima govorin: - Bebić je ozbiljan covik, a ti mene svako malo u đir.
- Ca se nabodeš na svaku. Manje bumbit pa će Ti i ge-ge-te bit manji.
- Kako ti odma sve znaš?
- Nisan to ja reka, nego Tvoja kerv i ge-ge-te.
- Jebi ga, to mi je isto i doktor reka ali mu nisan verova.
- Nisi mujen bilo kome verovat, a najmanje doktoru. Ništa se ne javjaš, ne pratiš me, nisi pita kako je bilo na rukomet, dali mi Golija fali, ništa. Glavno da Ti je hladni gemišt i neka ge-ge-te gre unebo. A, kad se critimo uvik receš, ajmo popit kafu pa Tebi kafu serviraju u žmuj od dva deca.

- Ala, fermaj više, malo nju doma čuhan pa češ mi i ti sada ovde drobit. Ja ću pit koliko je mene voja, jebe se meni za ge-ge-te.
- Pa ca si se onda prestraši, umrit ćeš i ovako i onako, ni boje sa više ge-ge-tea nego bez njega, pa će te teže rivat u onu karjolu.
- Kada malo razmislin koliko ih je već partilo od moje generacije, još bi sti malo poživit.
- Donesite mu makijato veći sa više mlika. Oćeš hladnoga ili mlakoga?
- Fermajmo više sa ton zajebancijon, ca bude bit će. Nego reci ti meni kako ti je na Vodice, vidin da si i boju dobi, to znači da se kupaš, bit će sa čehinjamin.
- Ca mene briga ki se narod tote kupa, glavno da je Mateo zadovojan, on nikada od mora nebi izaša vanka. Društvo nam ki put cini i Jadran od rodice mi Lidije, a dojdeju mi i rodice Ogujke, pa sa njima čakulan. Da znaš ca mi se dogodilo pred neki dan?
- Ca? Cekaj ke rodice Ogujke?
- Ćere od Davora Oguića.
- Pa kako su one tebi rodice?
- Ajmo, opet Jovo – nanovo.
- Jesu Davor i moja mat drugi rojaci, jesu in nane Telerovice, kako da ja to više Tebi objasnin. Tebe muti tako velika razlika u godišćima između moje matere i Davora. Ja ću to morat ucint sa slikamin, da bi Ti razumi.
- Imaš pravo. Bogami, ti moraš dobro ovome malome objasnit rod da se nebi zajeba.
- Vidiš kako su se oni zapleli oko prezimena Fabijanić, da je teško poverovat da nisu ništa u rodu.
- Kako?
- Pa Telerovi su po prezimenu Fabijanić i Davorova nana je šla u Oguića. Davor je oženi Fabijaniku, ćer mu je šla u Fabijanića i Davorova sestra je šla u Fabijanića. Oguići u Fabijanića, Fabijanići u Oguića. Nikad kraja.
- Pa sada ti budi pametan, a ki je to covik koga si prepozna?
- Gedan covika, pa nisan siguran dali je to covik za koga mislin da ga poznivan. Sti san ga pitat, ali da covik nebi reka da san mujen, nisan ga ništa pita. Sutra dan doša je do Jadrana, pa me Jadran pita: - znaš ki je vo covik? Cekaj malo još cera san geda, cini mi se da je to Šime Dudo. I njemu je sestra u Fabijanića i mat ovoj ca je šla u Oguića.
- A, ki ste vi? – pita me covik.
- Ja san Van sin od Marice Madonke.
- Baš san ti bi kod matere pred neki dan, znaš kako su moj otac i tvoj ded Madona bili povezani. Mi smo bili jedna fameja. Znaš da je moj brat Nedeljko ki je šesnaest godišć mlaji od mene i tvoja teta Neda rojeni po dogovoru.

- Nisan to zna, ali da su generacija to san siguran. Moran Van reć da kako sređujen svoje stare filmove ke san slika, baš pred neki dan prije nego san doša na godišnji san naleti na Vašu sliku kada san Vas slika za legitimaciju pred puno godišć, više od cederset.
- Možeš mi kako dostavit tu sliku?
- Ako imate mejl odmah ću Van je poslat.
- Niman ti ja toga Boga, ali ćemo izmislit kao to more doć domene.

- Tako smo ti nas dva ostali još dvi ure u čakulama. Vidiš da meni ni dosadno na žal, uvik se najde neki sa kin možeš čakulat. Ali ni ovo di san ja doma. Ono malo ca san živi u Pag, najviše san živi na Goliju, tako da san tamo bi najsigurniji. Život je takav, gremo naprid.

- Prati san sve ca se dogajalo, drago mi je da su te zvali na oproštaj rukometaši jer ti si to i zasluži, isto kako mi je drago da si napisa za Dodu i Vijolu jer ono je istina i oni su to zaslužili. Općinari samo gedaju ako si akademski obrazovan onda more bit konkuriraš za nagradu jer oni misliju da su svi drugi nepismeni. Ca je koludrica bila akademski obrazovana da su njoj dali nagradu. Morat ću in reć jednome i drugome da pojdeju u fratre pa morebit dobiju nagradu.

- Da Ti je podbadat.
- Isto kako i tebi.
- Lipo smo se raščakulali, pasala je ura vrimena a da se nismo okrenuli. Sva srića je da je Renci ucini ovo igralište za dicu, jer ki bi izaša na kraj sa Mateon, ovako smo baren malo mira imali. Ja se nadan da se nećemo više ovako critit da lupimo jedan u drugoga, nego se moremo još ki put nać na čakule.

- Jušto, ću tebe doć ćuhat. Rijeka ti je dobila pa si kuntenti.
- Šampioni!!!
- Zajebavaj, samo zajebavaj.
- Zaboravi san Ti reć da san vidi jedan gerb Hajduka u Pag pituran u cerno, pa mi ni bilo jasno ca ste prominili boju i tugujete za titulamin.
- Ili reci di je taj gerb ili ću te bertvolinon.
- Poceli smo se i pritit. Prošeći malo Pagon pa ćeš nać taj gerb, to će Ti bit dobro i za ge-ge-te.

- Odi ća više, molim te živin Bogon.
- I gren, sam sebi se cudin ca san toliko vrimena izgubi stobon. Bog kumpanjo.
- Bog Bebiću. Mali neka ti otac kupi čikulatu.
Ni Mateo previše abada na njega, niti ca mu on govori, on je bi u svom filmu sa dicon na igralište. Lipo ga je uvik critit i pogotovo kada mu malo temperaturu dignen. Koliko god se on pravi da mu je sve jedno, ja san siguran da to ni tako. Verujen da ceka da mu otkrijen identitet ali još će se malo nacekat, a i njemu je to drago. Cuvaj se kompanjo. Na Tebi je da odluciš oćeš kalat ge-ge-te ili nečeš.

Post je objavljen 13.07.2017. u 20:38 sati.