Pregled posta

ŽIVOT JE MASKENBAL

Ca je sad, ca se dogodilo?, obeća san mu da ću ga zvat kada se izabere gradonačelnik, tako san i napisa. Sad san se siti. Obeća san mu da ću mu pitat za doktoricu i javit mu. Bit će popizdi.
- Ca si navali tako na taj telefon, koda je ki' umra?
- Da se je natebe oslonit, covik bi stvarno moga umrit.
- A, ca se dogodilo?
- Zva san te da vidiš kada me možeš narucit kod doktora, a ti koda si uzemju propa. Ca se bojiš potrošit na telefon.
- Ne bojin se, nego mi je pasalo preko glave, pa me ubi ako očeš.
- Jušto ću radi tebe poć u peržun.
- I ta ti vridi.
- Nego da te pitan, vidin kako pratiš karneval i tamo svih napadaš. Judi se zabavjaju i uživaju na sociji a ti si kontra toga.

- Najprije si ti bi, protiv socija, sada meni deržiš predavanje. Di si ti to pročita da san ja kontra socija? Ja samo pišen ono ca pročitan, ca cujen, ca vidin. Vidiš i sam ca se ovde na Kvarneru svi ovi dani dogaja, ki je to šušur, kako se ovde judi zabavjaju, koliko šoldov ostaviju. A, na ca je doša Paški karneval? Kakvi smo mi to svit? Sićan se da je teta Marija Šantinika govorila, da se za zadnja tri dana paškog karnevala, pušćalo godišnji ili hodilo na bolovanje, kako bi doša u Pag.

- Takvi smo, kakvi smo.
- Pa ca ti misliš da je to dobro?!
- Ni, ali jebi ga, ca ćeš sada svaku malu iskat.
- Neću, imaš pravo, ali to mi govori da se u Pag jako dobro žive i da nikoga ni briga za ništa, osim za šoldi, a o tome san već pisa, to si pročita. Ca nećeš ti za misec dan poć doli poredit apartmani?, a koliko je takvih u Pag?, more Jadransko. Pa ca je njih briga za karneval. Oni se samo moreju potuć, kada se zipiju.
- Sada bi ti reka da se u Pag tuceju.
- Pokazat ću ti Novi List u kome je pisalo:"Paški karneval završio napadom na policiju".
- Ma kada je to bilo?
- Dvi ijade i sedme, morali su zvat interventnu jedinicu iz Zadra da ih umiriju. To ti je paški karneval, karneval u kervi. Pa budi ti pametan.
- Pa ako ih je Policija provocirala, nisu drugo zaslužili.
- To ti je pametan odgovor.
- Jesi vodi Matea na dječju povorku na Korzo?
- Bi bi ga pove, da ni bi bolestan. Cetiri dan je ima visoku temepraturu, pa se nisan sti igrat, da još ne uvati upalu pluća.
- To si pametno ucini. Vidi san da si ga pove u Opatiju, pa san misli da ćeš ga povest i na Korzo. Ca u Pag dica imaju, a ovde su došla dica iz cele Hrvatske.

- Nisi ni za to u pravo, jer su dica u Pag imala Karnevalfest, zac ga više nima, neznan kome moreš postavit to pitanje. 2007. je u Pag bi održan 7. karnevalfest u Pagu i dica su došla iz devet Hervatskih gradova na taj festival. Jesi to zna? Zac se to ni oderžalo. Umisto da ih je vo godišće bilo 50. skupina, to se više nanka ne spominje. Ca ni to žalost. To ti je ca ti celo vrime govorim, da ste svi puni kaj brod i ca se svih vas jebe za karneval, za neka zbivanja ugrad. Dajte nan malo mira, padavica vas juta uvatila. To ti je Pag, kumpanjo moj.
- Ca ti očeš reć da je drujdi boje.
- Ma je ca si mujen. Ovogodišće je bilo više tekstova u Novom Listu o Novajskon karnevalu nego o Paškom. Baš bi voli da me sada pocmeju uvjeravat kako je tradicija maškar i karnevala uvik bila prije u Novaju nego u Pag. Ili je meni krivo da Novajci imaju karneval. Bože sačuvaj. Samo gedan kako smo plitki.
- Sada si me užga, kada si to pročita?
- Čitaj Novi List pa ćeš vidit. Tradicionalni Novajski karneval.
- Ca pizdiš, ca nisi i ti svira jedan karneval u Novaju?
- Je svirali smo u Novaju, to imaš pravo, jer su u Pag svirali Zadrani. Znaš kako je bilo di će "Novi Horizonti" svirat paškoj gospodi, ca mi znamo svirat. Znaš kako su govorili, i ca su još svašta govorili protiv nas, da mi odma slabo dojde. Koda mi nismo znali ca se u Pag govori, koda smo nazad kartama. Ali, je zato puna "Loža" bila Pažaninov, baren onih ki su nam bili lojalni, a ni ih bilo malo.

- Cu san te čakule, a ca san moga reć?
- Ništa, ca će reć, nego uživat u tim porkarijama i zlocestoćama ke samo u Pag moreš doživit, zato je i došla Policija razdvajat ih, jer su oni odlucili tuć batarelu kako je njih voja.
- Bi si mi spomenu da ćeš zadnji tri dana karnevala poć u Pag. Ca se dogodilo da si odusta?
- Bilo bi to 34. godine da nisan bi na zimski karneval u Pag. To znači da nisan više Pažanin. Kako je Portada napisa za Duška Para, da je porijeklom iz grada Paga. Tako san ti ja sada porijeklom Grobničan i samo me Dondolaši interesiraju. I ovako Mateo piva: "rojeni san Grobničan". Ali kako ne pratiš medije vidin da nisi pročita vijest kako se lucidno i eksplozivno krilo Zameta i sada Senie, na radost ljubitelja ženskog rukometa ponovno aktivirala Tea ( ex Linić) Maričević. Tako da smo nas dva u subotu u Senj, di Tea igra pervu utakmicu protiv Zadra. Morebit posli utakmice ostanemo u Senj na maskenbal. Zato me niti vo godišće za zimski karneval, neće bit u Pag.

- Kako to da se nisi pofali odma, nego mi sada govoriš.
- Pa zato ca san misli da ti čitaš novine, a ti si samo na "Smokvinon listu".
- Samo ti zajebavaj.
- Vidiš kako smo se raščakulali. Nisan te pita ca govoriš za izbori u Pag.
- Sve san napisa i to si pročita, a reka san ti da ću ti se javit kada dobijemo novog gradonačelnika.
- Sti san ti reć da imaš vrimena poć u nediju u Zagreb, kada si se toliko veza za Grobnik.
- Oli sumnjaš da neću?
- Koliko si mujen nebi se iznennadi da pojdeš gori.
- Javit ću ti se preko Vibera.
- Nemoj mi zaboravit vidit za doktoricu.
- Bez brige budi. Bog.
- Bog.



Post je objavljen 13.02.2015. u 22:55 sati.