Pregled posta

DJEČJI KARNEVALSKI KORZO U OPATIJI

Jedan Bodul je stalno moli Boga: - Bože daj mi da dobijem na Loto.
Bog mu je jedan dan odgovori: -Kupi više tu tiketu.

Tako bi moglo pocet moje izvješće sa današnje dječje karnevalske povorke u Opatiji, ku san još najavi u postu od Crikveničke dječje povorke. Kako ćeš ca imat ako ništa ne uložiš, di to još ima, baš bi voli znat?
Mateo se parićiva celo jutro dok nismo partili. Vrime nan ne gre na ruku, svuda okolo nas je sniga, vidin da je i na Cres palo sniga. Febrar je najhladniji misec u godini i pokazje svoje zube. Organizatori u Opatiji su najavili da se povorka premešćuje u sportsku dvoranu, ipak su to dica da se ne porazboliju i doboro su ucinli. Triba poć na vrime da se parkiramo ca bliže dvorani. Bilo bi najboje u Volosko, jer je to najbliže dvorani. Turistička zajednica Opatije i Grad Opatija su ovo oragnizirali. Pa da ja previše ne tlapim sve ću Vam pokazat koliko su u Opatiju uložili u ovaj karnevalski korzo, kroz slike. Ca su dobili nazad? Najprije pitajte dicu, pa onda svas onaj svit ki je da sve odsebe da se ovo veseje dovede kraju. Ca je malo ca su svi mediji već u udarnim vijestima izvješćivali iz Opatije.
Ajmo redon.
Ovako je izgledalo Volosko u podne.

Ne mogu verovat koliko je autobusa poštivano ispred dvorane. Jeli to moguće?

Onda smo naletili na Teinu prijatejicu ka radi u škulu Kantrida i parićiva sebe i kolegu.

Sve je parićano, ispred dvorane se skupja svit, maškarana dica, i svi oni ki ih pratiju.

Mateo se pomalo penje uz škale sa materon, iza njega bandira Vinkovačkih maškarica. Judi moji jeli to moguće. Neznan ca bi na ovo reka.

Ima ih ki prodavaju kokice, peceni kostanji, šećernu vunu.

Jednako tako i on ca prodaje bonboni i lizaljki svih versti. Ispod njega parkirani autobusi.

Ne moreš se maknut a da nekog ne trefiš. Teina kolegica i suigračica iz Zameta Vanda, sa mužen ki je bi tenor klape Grobnik Ener i njihov junior Franko, se slikivaju.

Parićan je i njamnjam tunel (šator) di će dica nakon povorke moć se okrepit. Domaćini su in puno toga parićali.

"Radnik" Opatija je parića od krafni do sokova i ca ti ja znan ca sve ne.

Klaun iz McDonald's-a dili balune i kartice, di van ako dojdete poklanjaju gazirano piće po izboru, a kartica vridi do 30.04.2015. Ka je to poslovnost. Kako oni imaju interesa za ovako nešto? Ni bilo diteta ki ni uze tu karticu.

Ca mislite, jesu Mateo i Franko uzeli baluni i kartice?

Neizbježni baluni i kokice uvik sprmni za dicu. Morali smo i njima uzet kokice.

Kada smo došli u dvoranu, onde se nude drugacije usluge. Da Vas zimerciju pa ni baš tako jeftino, ali judi se svejedno merciju i niku ne pita za cijenu, ceka se fila.

Majce, borše, sve su to suveniri za uspomenu.

Mateo sa balunon ulazi u dvoranu, a tamo ga ceka more iznenađenja.

Mauro Staraj i La banda su pomalo zagrijavali goste i povorku ka se formirala.

Ma binu su se popenjali i voditeljski par: Mario Lipovšek-Battifiaca i popularni voditelj sa Radio Rijeke, Josip Krmpotić. Malo maškarano ludilo je moglo pocet.

Onda su voditelji na binu pozvali pusnoga gradonačelnika popularnoga Duška Duleta Jeličića ki će dici dilit čokoladice iz škrinjice Grada Opatije.

Kjuci grada pusnom gradonačelniku Duletu, preda je dogradonačelnik Grada Opatije gospodin Kirigin.

Doša je i meštar Riječkog karnevala Toni sa svojon novon krajicon Stellom Paris ka je Grobnišćica, pa se voditeljski dvojac šulaca da neka Grobničani kandidiraju nekoga za Predsjednika Vlade i da nema straha da neće pobjedit. Nakon Kolinde, Stella.

Toni i krajica Stella stali su na čelu kolone i povorka more pocet, najprije domaćini u obliku kockica.

Za njima Opatijske mažoretkinje.

Bez Lovranske glazbe ovo veseje bi bilo nezamislivo.

Ovi su došli iz Čakovca. Blizu in je.

Pingviniči sa Viškova.

Dječji vrtić "Bajka" iz Vinkovaca. Ca je to njima doć u Opatiju, kako i namin od Paga poć u Goricu. Svaka in čast.

Pa domaća dica iz Opatije.

Dušan Paro je piva da se Ićićima dići Istrijan, evo i njihove dice.