Marketing
KAD SE VELE RUKE SLOŽE !
Fala dragon Bogu da su se usijane glave i vele ruke složile i da se danaska svečano otvara Paški zimski karneval. Ki je to po redu? Od pamtivika. Tu vijest je danas doni Novi List, pred dva dana i portal BNB. Napisali su da je organizator ovogodišnjeg karnevala ipak Grad Pag, Turistička zajednica Grada Paga i karnevalska udruga "Markova kumpanija". Pa ca in je tribalo toliko vrimena i ovih gluposti da to odluciju. Ali, nebi Pag bi Pag da odma od pocetka ne gre napak.
Jebe se mašakrama i svima judima dobre voje, ili baren onima ki su veceras odlucili poć se natrinketat, ca ni donesen proračun Grada Paga, koda njima ti šoldi greju u tašku.
Veceraska kako pišeju navedeni mediji u sedan i po će službeno pocet karnevalska ludovanja sa pervin "socijen". Oni ki nećeju poć na socij će morat organizirat maškaranu vecer po kafićima. Ca je pašku mladost briga za sociji. Ca se ne more nać jedno misto ili dignut šator kako to ciniju ovde u ovon Primorskon kraju, di će se svi judi zabavit. Sociji su samo za viđene. Opet u karnevalu nismo svi isti. Onda to ni karneval. Karneval mora bit isti i onima pokrivenoga i gologa obraza, jer jedino tad karneval ima smisla.
Svi oni ki greju u maškare ili na tanci, greju samo sa jednin ciljen, a to je dobro se zabavit, zismijat se, ako triba i natrinketat se, jer to jedno bez drugoga ne gre, Baš koga briga kon trason će hodit gradska kanalizacija od Vodic prema Velon Boku. Ala, neka se javi jedan ki gre u maškare a da jedino o tome vodi računa ili da ga briga ca gradonačelnik ni proša.
Morebit grišin pa su se vrimena prominila, pa sada kada dva kumpanja onako već dosta namoceni vodiju razgovor za šankon to izgeda ovako:
- jesi cu ki je sve ucini da Želka makneju?
- ki? ca ti znaš ki je to ucini?
- pa ca ti triba sto put reć, oli si ćorav.
Ja u to ne verujen, sto posto. To sigurno u vrime karnevala nikoga ni briga, pa san siguran da mediji donose krive vijesti.
Ca Ti Stipe na vo sve govoriš, na ove gluposti ke su se dogajale ovi dani i ke se još dogajaju u oveme necritnom Gradu?
- Ja svima želin lipi divertimenti a neprijatejima porucujen da ćemo i ovo godišće kako i svake godine bit jacji, jer ipak najviše judi voli zabavu, život i njegove radosti, kako ca pokažuju i ovi ca su u Zvonikovu ulicu imali pervi socij ovo godišće. Prema tome, neprijateji danas ili sutra, ceka vas sigurna propast. Sada je jušto svejedno. Došli su dani ludosti, radosti, i maškara. Ako nan glazba ne pokvari raspoloženje, zato ca ih
Općina neće platit, svejedno će bit kola, mi ćemo isto kolat. Bar je to stari paški običaj. Ima ruzinavih bacav, ako ne provat ćemo dovest ove ca sviraju na socij u Zvonikovu, tako da neće bit straha. Jesi kuntenta odgovoron?
Ja kako Verhovni pučki sudac donit ću odluku ka se neće moć poništit. Dane karnevala proglasit ću danima "Opće narodne radosti", i da se ozakoni korišćenje obaveznog zajedničkog – kolektivnog dopusta, jer nas i onako ne plaćaju, a mi niš ni ne radimo, pa je zato boje da se veselimo i zabavimo.
Fala dragon Bogu da baren neki misli svojon glavon u ovome lipon maškaranon Gradu.
- Sestro moja vo se ne more više zdurat, koliko munješćin ciniju u ovome Gradu. Kada ćemo više stavit pamet uglavu?
- Kada karneval ferma.
- Boje ikad, nego nikad !
Upregnite sve ca morete da se zabavite, ostavite brige po strani zato je i izmišljen karneval. Matere i nane neka van budu potpora i neće bit straha za Paški zimski karneval.
Veseli i zdravi bili uz Iskonskipag se zabavili.
Danas kola oće biti, danas kola oće biti
A prejsutra oće neće, a prejsutra oće neće.
Post je objavljen 17.01.2015. u 16:22 sati.