Marketing
USPOMENE VITAR NOSI, ŽIVOT NAN U PAPAR MRVI !
Zvoni telefon, još nisan nanka na posal doša. Ki je sada vako rano? Javjan se na telefon:
- Cretna ti Nova godina, greš zarađivat kruh svagdašnji.
- Cretna i Tebi, di si se uputi vako rano?
- Ne moren spat pa govorin, gren mu se javit, znan da greš na posal.
- Lipo or Tebe.
- Kad si pobiga odzdola?
- Partili smo u subotu pokli ubeda, vidin san da se zlo parićuje, pa smo pobigli i dobro smo ucinli, jer kada smo došli na Kukuljanovu već je palo sniga za popizdit. A, znaš kako smo ja i snig?, na Vi.
- Ca ima doli novoga, jesi koga vidi?
- Ima puno lipih stvari, ali nesmin reć.
- Samo ti zajebavaj.
- Kako san svaki dan šeća po rivi vidi san da je baza za političke pregovore kafić kod Burina i da se tamo strašne stvari dogajaju.
- Ki se tamo sastaje?
- Ca da Ti ih poimenu recen?
- Manda ca si misli, utajno.
- Je to kako i ona u Pag: "mislila je da se neće znati, već u tajno da će se jebati".
- Kako ti munješćine mogu rano jutro padat napamet?
- Pa Ti si me natenta na to.
- Nego reci ti meni kada govoriš da si vidi političke pregovore u taj kafić, oće Tino Marco opet bit gradonačelnik?
- Ima velike šanse, jer san jedino njega vidi da je svako malo sa pregovaračima izlazi vanka i kako ono gori utajno sve nešto dogovara.
- Pa to ti je tvoj hadezeovac.
- O, tome bimo mogli govorit ki je hadezeovac, a ki je hadezeovac sa rožima u tašku. Znaš kako je noga puta bilo, bilo je komunistov, ali je bilo i onih ki su morali bit komunisti, tako da ti ni danaska ni ništa boje. Vo lito kada smo Mateu slavili rođendan onda je jedan "hadezeovac" sused, stoji preko puta mene, kada je vidi kuma mi Willija pita ga da ca cini kod ovoga četnika? Pita ga Willi, kod koga četnika. Pa kod ovoga ca slaviš rođendan kod njega. Vidiš ni vo nisi zna da san između ostalog i četnik. I to ki četnik?,stari moj. Ne zove se svaki četnik Branimir, i po tome san jedinstven.
- Pustimo mi politiku po strani, nego Ti meni reci kako je bilo doli?
- Ca ću Ti reć, ako ništa drugo vridilo je ca me je vrime pustilo da uživan bit doma. Ka je to lipota da vidiš, pa još kada onaj lipi friški zrak dojde sa Velebitske strane, covik ne more drugo nego bit zadovojan.
- Sve san obaša i sve san vidi. Dodar san do Bošane bi i to je govor za sebe. Nećeš verovat da je i turistov bilo i to iz Poljske, voziju se biciklamin i uživaju. Merkacići i sipe se sa rive vaćaju, to ne moreš verovat.
- Ispred Renca je bila tumbula, svirala je glazba i paška mladost, uz onako zubato sunce, ono malo svita je uživalo. Ilo se i pilo, Renci je časti, primjeti san da je narod zadovojan. Tamo san najviše poša jer je Mateo sti tuć po bubnjevima. Nikad mira sa njin.
- Na polnoćnicu malo judi, sutradan na dan Božića isto tako, crikva napol prazna. Di su svi ti veliki katolici, ti veliki hadezeovci?, ti veliki vjernici, oni navodno to u koludric obavjaju. Pita me jedan Pažnin: -ca nećeš slikivat? Ca ni dosta ca mi brat sve uredno snima i ca će to već sutra moć vidit celi svit.
- Govoriš koda si se ispisa iz HDZ-a.
- Ne minjan ja bandire, vo je jedina stranka u ku san ja djelova i neka tako bude do smerti.
- Zato ti je Kolinda dobila izbori na Čavle.
- To Ti je isto koda je u Pag pobjedi Rabjanin, a nebi se cudi kada bi se to u Pag dogodilo, sa kin ja to judima živen?!
- Nego da te onako usput pitam, ca ti je bilo da si kala slike sa portala?
- Da san drugima šansu da dojdeju na verh, već san posta dosadan sa svojin slikamin.
- Vidin da ti faliju dvi vide uglavu, ali se više neću karat sa tobon jer ti uvik i ovako i onako uciniš po svome.
- Nego ca ću po Tvome?
- Jese on mali parićiva za Dondolaši?
- Da parićiva?, još smo u Pag našli dvi bacuke i popizdi me je sa tin Dondolašima. Madonka mu je obećala da će mu ucint kožicu i svas je u tome.
- Još malo pa će pocet maškare.
- Znaš da ovde pocme od Antonjskog roga, mi smo parićani.
- Boje parićani nego spremni.
- Bit ćemo mi i spremni, bude tribalo samo neka je zdravja.
- Ala stoj mi dobro pa se cujemo.
- Kada bude izabran gradonačelnik Paga ja Tebe zoven.
- Deržin te za besedu.
- Ala, Bog.
Post je objavljen 02.01.2015. u 16:45 sati.