Marketing
FINILA JE I OVA !
- Fala dragom Bogu, da je i ovo sveršilo, već san se štufa svaki dan dohajat ovde na ovu terapiju.
- Koda san Te ja tira da dojdeš na terapiju. Da Te ni bolilo nebi bi doša. Pa je Ti ca boje?,nisan Te ni pita, svi ovi dani.
- Da mi ni boje, nebi bi osta dokraja, ca bi bi mujen čuhat ovde tvoje pizdraije ca stalno govoriš.
- Onda, za karneval ne greš doli ?
- Reka san Ti da mi ni ni na kraj pameti poć doli.
- Kada bude tribalo parićat apartmani, pervi ćeš bit doli. Di štivaš više ti šoldi?
- E, moj haenesovac ti meni govoriš za apartmani, tebi kome je Borko pervom ucini hotel ispred kuće, da nanki more više ne vidiš, koda živeš na Vangrada, a ne na Goliju.
- Mi smo bili za napredak našeg grada pa se nismo bunili kontra hotela, a koliko ja znan u Pag se govorilo da je to Čačićev hotel.
- Zato ti je mujenjace Borko pervi izaša iz haenesa, ca su ovoga potirali iz stranke.
- Ca mene briga, nisan ja Čačiću derža šteriku nego Borko, pa neka on misli zac su ovoga potirali ća. Morebit ga zato boliju lebra.
- Ka lebra?, ne govori u zagonetke.
- Ništa ja ne govorin u zagonetke, Ti jako dobro znaš ca san reka.
- Nisan zna da je Rika igrala u Pag. Jesi vidi ti na onu sliku ku si stavi na internet kako se najdeju igrači istog sluha. Pokojni Ive Benzija je sta do sada pokojnog Minte, dva veznjaka a Patka Bošanar napadač do napadača Radovića. Baš san se malo zageda, pa mislin, je to slučajno, ili je tako Bog sti.
- Ni ono u Pag, nego u Vlašići, ki su jedini na otoku onda imali ravnu ledinu di se mogla igrat ta utakmica.
- Ca nisu mogli igrat u Hunjci?
- Ne, nego u Mirožić. Samo Ti zajebavaj, intanto Škufo sigurno nima one slike, a pisao je knjigu o paškom nogometu. Ca mu ja mogu.
- Kada se sitin koliko je judi od otoka igralo nogomet, znaš da bi se mogla složit jedna dobra ekipa.
- Sada nemoj cekat godišće dan da dojdeš na terapiju. Vidiš kako Ti je pomoglo. Nisi više u godišća kada nebi triba mislit o svome zdravju.
- To si dobro reka. Pozdravi mater ako se cuješ sa njon, jer Ti oca ne vidin. Više ne gre ugrad, pa ga ne mogu vidit. Mate je dobar covik, uvik je bi miran, još dok mu je kum Mikić bi živ doša bi namo na Macel, pa bismo se znali zismijat, ovako ca moreš, godišća i zdravje ciniju svoje. Pokojni Mikić je pripovida kako je u Dinjišku kada su se bili požalovat, jer mu je od prijatelja sa broda umerla mat, malo se zipili, pa Ti je otac zapiva:"Uzmi sve što ti život pruža", umra san od smiha.
(dva kuma sa ženamin, a di drujdi nego u Belvi na tanci, u kerneval)
- Doni san ti travarice kako si naruci, drugo nisan moga.
- Mito i korupcija, a' kumpare.
- Jebi ga, dok moreš nemoj nikad reć, ne. Ala Bog i stoj mi dobro.
- Ala Bog i vidimo se.
Post je objavljen 29.01.2014. u 18:47 sati.