Marketing
POCELI SU, MARE BALI !
- Čuhaj me vamo, jesi čita u nediju Novi List?
- Čita san, pa ca?!
- Kako pa ca, ca nisi pročita Šuljićev tekst o Borisu Caskinu?
- Pročita san.
- Zadnji si mi put reka, da Ti prepišuješ a ja bi reka da je Šuljić od tebe prepisa tekst.
- Mi smo Borisa poznivali svako od svog kantuna. Verujen da ga je Branko više pozniva i bi boji sa njin nego ja, na koncu oba dva su Novajci. Ja san svoje osjećaje stavi na kartu, pa posli na svoj blog. Nisi bi jedini ki je reagira na onaj tekst i to mi je drago.
- Nekoliko san put pročita ono ca si napisa o Boži Berciću, nisan najprvo verova ono ca pišeš o rodu, pa san na kraj doša do toga da su i teta Ruža i sin joj Šime, nani ti Katici Lučinki bili pervi rojaci. To mi nikako ni hodilo uglavu. Kako to more bit?
- Ja san to lipo napisa, a Ti mi na pervu nisi verova i zato mi je drago da si doša do toga. Vidiš kako je u Pag isto moguće da se pozakoniju a da imaju isto prezime, nemoj me opet bledo gedat.
- A, ki je to osta na isto prezime?
- Odma ću Ti reć. Naša teta Marija Bercika sestra od barba Bože, bila je Kustić i udala se Kustić, to Ti je Diogenova mat. Onda Ti je Marija 'ćer od pokojnoga inženjera Mićela bila Fabijanić i pozakonila se Fabijanić. Onda žena od materinog rojaka Andreje Luče, bila je Crljenko i udala se Crljenko. Eno Ti Sabastijan i žena mu, bila Karavanić, pozakonila se Karavanić.
- Ma ti se mene popizdi. Kako ti to sve znaš?
- Ki pita, ne skita!
- Neću više sa tobon govorit o tome ki je kome u Pag rod, jer ću sveršit u ovu žutu kuću do tebe.
- Vidiš da si u Pag, moga si lipo poć na socij i zatancat.
- Jebi se ti i sociji. Ca su to sociji?, sada su i to deventali.
- Da si malo više u Pag, morebit bi zna ca su sociji, ovako i ti, kako i puno njih u Pag, nemaju pojma ca su to sociji.
- Nego da te pitan, kada si već kod tih socija, oćeš poć za karneval u Pag?
- Oću, kako ne, pa trajekt cekat u Stinicu i tri kvarti od ure se vozit do Stare Nevaje.
- Pravo imaš, već san zaboravi da trajekt više ne vozi od Prizne. Jesi vidi koliko nan znači ta Prizna. I, o njoj si pisa.
- Da si u Pag nebi ti triba veštit, ka ca ga sad nosiš. To si se ranđa za terapiju, nebi triba mislit oćeš se maćat ili nećeš. Na koncu, kad je karneval, možeš po Pagu i u piđame hodit, niki ti neće reć da si za žutu kuću, nego će svi govorit: "Pogedaj kako se lipo maškara", još ti ki si od plemenitaške fameje.
- Samo ti zajebavaj, dobro si reka da je sada piđama najboji veštit. Samo vidiš ca se dogaja, da je svit sve više doma uz televiziju, jer nima šoldi nanki za papar, a kud na tanci poć, zato je najboje bit doma uz piđamu.
- Ca ti ja mogu. Poceli su, Mare bali! Baren je tako cera Obersnel reka na tiskovnoj konferenciji, to se sada tako rece. Ko Te bude voja, moremo se poć zipit pa ćemo bit pametniji.
- Odi ti mujenjace, ja ne gren.
- Ma misli san sa ženamin, ne ja i ti sami, ca si mujen u ova sumnjiva vrimena.
- Ala, vidimo se sutra, još da zduran ova dva tri dana ca mi je ostalo pa da te moje oci više ne vidiju.
- Baš ti fala!
Post je objavljen 17.01.2014. u 17:34 sati.