Marketing
MAŠKARE, CA MOGU MAŠKARE !
Kako vrime brzo leti. Pred tri godišća sam na jednom paškom portalu koga više ni, napisa jedan tekst ili boje reć proglas o pocetku karnevala. U ton proglasu san pozva svih da ne stojiju doma, nego neka se parićivaju i daju sve od sebe za karneval.
Iman osjećaj da se ovaj blog čita i prati više nego ca se prati taj pokojni portal, pa verujen da ima judi ki nisu pročitali taj tekst. Kako je sve opet cera pocelo, a naslov tog teksta je bi: "Pocelo je, pocelo" pa da se sitimo još jedan put tog proglasa.
Svim paškinjamin i pažanima i svima onima ki voliju karneval dajemo na znanje da sva vlast prelazi u ruke «Karnevala», od ove subote do pocetka «korizme» ili ciste sride. Time smo dobili svu vlast, a sve grihe uzimamo na svoja pleća. Govorim Vam, nima boje stranke od «Karnevala». On ne išće da grete glasovat za njega, nego samo govori: «dižite se, išćite robu za maškare, aktivirajte sve one ki moraju vodit računa di ćete sve svoje grihe i brige, utopit u žmuj paške žutice, u tren jubavi, po paškim škurin kantunima, kada Vam niki ne smi reć nanka jednu besedu». On ki ni zadovojan ovim proglason, neka gre u Bilinu konobu i zipije se od nemoći. Bepo će mu bit zahvalan.
Nema, bojeg poretka od «Karnevala», niki Vas neće zatvorit radi toga. Niki Vas neće pitat: «jesi glasa za karneval !?». Ca mujeniji to boji, ca maškaraniji to još boji, a naš Lovro Kantirić je reka: «vedro pasivajmo ulicamin, smijmo se i veselimo čak i onda kad bi nan suze morale doć na oci, jer tu je karneval ki će sve uredit, tu su dani kad se sve zaboravi i kad sve pomunješa ili se pravi munjeno», i u to ime, držimo se našeg izborničkog slogana:
BAŠ NAS BRIGA!
Novi portal ki promovira paški karneval je najavi da u subotu pocimjeju "Karnevalski sociji". Lipo je da su se obnovili sociji. Svi se pitamo ca znači ta beseda "socij".
Teško je nać tu besedu bilo di, međutim naša san jedno tumačenje te besede, ko mi je bilo najbliže ovin našim paškim socijima, a to je da su sociji mista za druženje. Ca mene najviše pjaža, to je da se na socijima tanca pod mišnicama i armonikon. Drago mi je ca su pokojni barba Božo i teta Tatjana bili učesnici pervog socija, i verujen da se "Komunist star" neće jutit ca sam mu ukra jednu sliku sa bloga sa barba Božon na pervi socij.
Takvi su bili u Pag sociji, dok se Pag ni pojavi kapelnik Šime Dešpalj i napisa paško kolo.
Jedno je sigurno dobro od toga da je tim kolon maestro Dešpalj svas paški puk dove na pijacu. Sve one ki su se mašakarali, do onih ki su došli samo zakolat, i na kraju do onih ki su samo stali po kantunima. Najviše su bile matere ke su nastojale ca in ćere ciniju, i oni ki su škvadrivali, i svi su doboro došli. Sa druge strane time su nestali sociji. Neka paški karneval ostane dio onoga ca baštinimo od starih i ca je jedna tradicija ku se nesmi zapustit. Ca više, triba je njegovat i oplemenjivat, jušto ovako kako je ucinla Markova kumpanija sa socijima.
I ovo godišće, kako i lani, a već tradicionalno na blajdan Sveta tri kraja, dizanjen i prvom zvonjavom velikog željeznog zvona službeno su poceli karnevalski dani ovde na Grobnišćini, o tome morete pročitat na ovom blogu. Naš barba Duško Žeželić doša nan je reć da će sutra selon proć "Dondolaši", pa neka dojdemo na gušternu di docekamo "Dondolaše".
Kako nećemo doć. Lani je Mateo imao šest miseci, sada godišće i pol i toliko pokazuje voje da neće bit straha za njega.
Već je ovo lito u Pag na litnji paški karneval bi glavna atrakcija. Nana ga je obukla u nošnju kako je i obećala.
Frenki je ovo godišće avancira od Dondolaša je posta kapo, i sada vodi Dondolaše na čelo kolone. On upravlja njima, kuda ćeju hodit, kako će se ponašat, kada će dondolat, a kada fermat. Bilo bi lipo da usporedin kako je to izgledalo lani a kako ovo godišće.
Dio paškog duha san da i ja, pripomoga san in u pismi, ca ih je malo iznenandilo, jer me takvog neznaju, ali su mi lipo na kraju rekli: fala na glasu. Bilo mi je drago, jer je pored mene bi sused glazbenik ki je i učesnik MIK-a, pa me i on sa cudon geda. Ca im ja mogu, kada mi je pisma u kervi.
Neki judi ovde govoriju da je doba karnevala, peto godišnje doba koliko dugo zna trajat. To mašakarano godišnje doba ovo godišće će trajat od 11. jenara pa do 5. marca, ca oće reć osam subota ludovanja, a onda veseju i zadovojstvu karnevalistima nima kraja.
Ca još za kraj reć?! Paški karneval je osta prkosan vrimenu i prostoru, on bi treba postat brend grada Paga, on je del hrvatske prepoznatljivosti, on je otvoren svakon coviku dobre voje ki želi pobić od ove jadne svakodnevnice, di nas političari kradeju i varaju i ki su mašakarani toliko da ih ne moremo poznat, koliko maski na licu imaju Zato iskoristite karneval za smih i zabavu.
Sva vlast karnevalu, živi i veseli bili!
Post je objavljen 12.01.2014. u 18:31 sati.